Read Car_Nicobarese MANEUTNYI 35 Bible Online

MANEUTNYI 35 - Car_Nicobarese bible

MANEUTNYI 35

¹Ngaich Môsös nö hamūl yik ṙôngö kūön Israĕl nö ṙòkhöre, ngaich ngö ṙô tö cha, Në nun ṙô në hachöngten ngam Mā Tēv, nö kahëken yīö.

²Tafūöl sumkam min la-en nö kēkaṙen, im sinātö pöri sakāmö töhet angū-ö sakāmö nö in meh, anôilö nö haneūheu tö hayīchö i ngam Mā Tēv: kumpaha min öp kamëken la-en hē e.

³Keuheūtngöre chūök elyöngö yīö öt tōttökūö tameūyö yī-ö öi el anôilö.

⁴Ngaich Môsös nö vë-ekūö yik ṙôngö kūön Israĕl nö ṙòkhöre, nö ngö ṙô, Angū-ö ön ngih hachöngten ngam Mā Tēv, nö ngö ṙô,

⁵Kēḵ in re yin tö tökētu im Mā Tēv: öp töng hōḵolōn, hökngen ò nö kētö e, nö tökētu nö i ngam Mā Tēv; humlum, rupīö, mās inrē;

⁶Tölingūṅ, tököinyö nganāvö mat, laturë, tövai hilā, sanôi pököre inrē;

⁷Uk kōiny kūön sīṅp töhangāvö mat, uk kapëông, sittim chōn inrē;

⁸Tavī-i ëāṅvö, tötahūsa hol tavī-i incham, tinhuslö lōpān inrē;

⁹Ònik ihong, ihong inrē tö haṙākö ip efòt, ip lanak elngòh inrē.

¹⁰Kö yihtöre yip yēḵ tarik in yīö yip tö-akahaṙa ellōn, nö vī nup töhōtuṙen tö ngam Mā Tēv;

¹¹Ngam rūkui inmūlö ngam rūkui e, tö ngam kinṙul tö kui e inrē, kinvòk kūö e, machööḵlö, löp e inrē;

¹²Ngam kasòng, nup kaneun e inrē, ngam anūichö miṙēlōn, tö ngam ranangkūö inrē;

¹³Ngam mīs, nup kaneun e inrē, ṙòkhöre nup chehen e, töhet ròtī inrē;

¹⁴Ngam chūök rööntö manyaṅk inrē nö chūök ëāṅvö, nup chehen e, nup ëāṅvö e, tavī-i ëāṅvö inrē;

¹⁵Tö ngam tahāklö lōpān, nup kaneun e, ngam tavī-i incham, tötahūsa lōpān, innyat kūö inkūp inrē im inkūp ngam rūkui inmūlö;

¹⁶Ngam tahāklö töföngö tökētu, töp tö sā mat inhāṅl mās e, kaneun e, nup chehen e, ngam chūök sanöich öp lā kūö e inrē;

¹⁷Nup ranangkūö ngam el milūkö, nup machööḵlö e, nup löp u, öp ranangkūö inkūp ngam el milūkö,

¹⁸Nup tumnôkö ngam rūkui inmūlö, nup tumnôkö ngam el milūkö, tö nup tökuvaha u inrē;

¹⁹Nup tö vāyö vinī-i inyut, hē el mineukṙen el ngam töhet chūök, nup töhet inyut Āròn öp Kūönṙô, nup inyut yip kikōnyö kūön ò, nö el chūök Kūönṙô.

²⁰Ngaich ṙòkhöre yip ṙôngö kūön Israĕl nö kiröönngöre, nö ṙā-ang i kūö Môsös.

²¹Ngaich cha-a nö yihtöre, ṙòkhöre yip töharuhka ellōn, ṙòkhöre yip tövīhötvö ellōn nö hōḵ, ngaich kētö nup tökētu nö i ngam Mā Tēv, nö i la-en ngam rūkui inmūlö, i nup la-en e inrē nö ṙòkhöre, i nup töhet inyut inrē.

²²Yihtöre cha-a ngaich, hĕnghöre kikōnyö kikānö inrē, sā tumtak i yip tö hōḵ-olōn, ngaich kētö pin, kinlöl nang, kinlong, merkul, ṙòkhöre humlum yanöṅtö; ṙòkhöre yip tarik nö kētö humlum nö tökētu nö im Mā Tēv.

²³Ṙòkhöre inrē tarik, yip tö aṅhaṅv in tö tölingūṅ, tököinyö nganāvö mat, laturë, tövai hilā, sanôi pököre, uk kōiny sīṅp töhangāvö mat, uk kapëông, nö kētu tö cha.

²⁴Ṙòkhöre yip kamëtö rupīö mās inrē nö tökētu nö kumtö u nö i ngam Mā Tēv: ṙòkhöre tarik tö aṅhav-in tö sittim chōn tö vanīten nö ip la-en e, nö kēten u.

²⁵Ṙòkhöre yik kikānö tö akahaṙa ellōn nö aṅtī tö kuntīre nö kupāt ngaich kētö nuk kupātre cha-a, tölingūṅ, tököinyö nganāvö mat, laturë, hilā inrē tövai.

²⁶Ṙòkhöre inrē yik kikānö tö haruhlöng alaha tö ellōnre nö i mikah nö kupāt sanôi pököre.

²⁷Ngaich yik mākūö inrē nö kētö ònik ihong, ihong inrē töhaṙākö, nö ip efòt, lanak elngòh inrē;

²⁸Tötahūsa, tavī-i inrē; tavī-i ëāṅvö, tavī-i incham inrē, lōpān inrē tinhuslö.

²⁹Ngaich yik kūön Israĕl nö kētö kanahanglōn tökētu nö i ngam Mā Tēv; ṙòkhöre kikōnyö kikānö inrē, yip tö vīhötvö ellōn nö hēk nö kētö nup mi-im la-en, nup ahōtö ngam Mā Tēv nö vī-i nö lökten eltī Môsös.

³⁰Ngaich ngö ṙô Môsös tö yik kūön Israĕl, Yĕh meuk, minë-enyu ṙô an ngam Mā Tēv nö havëken Pisalël öp kikōnyö kūön Urī, ök kikōnyö kūön Hör, aṅ i miyöngö Yūtā;

³¹Ngaich anga-aṅ nö hatööḵlen ò tö ma-alaha aṅ im Tēv, i mikah, mikah elmat, inkaha i tökeuheūttöre mihëṅṙö inrē tövī-i;

³²Ane inrē vī insā nup tömilichngen la-en, vinī-i humlum, rupīö, mās inrē,

³³I ṙinatö ihong tö vīhötvö, i kin-īpö chōn inrē, i vinī-i nup tö ṙōl mihëṅṙô tömilichngen vinī-i.

³⁴Ngaich anga-aṅ nö vīhöt ellōn ò pòn hōten ò nö haköphöti, anga-aṅ, Oholiāp inrē, öp kikōnyö kūön Ahisamak, aṅ i miyöngö Tën.

³⁵Acha-a hatööḵlö ellōn ò tö mikah, nö vī tökeuheūttöre mihëṅrö vinī-i, kam-ip, tömilichngen vinī-i inrē, chamôktö mirun, i laturë, i tövai hilā inrē, in yip kumpāt, in cha inrē yip vamī insā tömilichngen vinī-i.