Read Car_Nicobarese MANEUTNYI 36 Bible Online

MANEUTNYI 36 - Car_Nicobarese bible

MANEUTNYI 36

¹La-evṙen nap min nā Pisalël nā Oholiāp, ṙòkhöre inrē tarik tö-akahaṙa ellōn, yip tökēhötvö ellōn tö ngam Mā Tēv tö mikah, mikah elmat inrē nö huveū-en nö vī nup la-en nö ṙòkhöre el ngam töhet chūök, nö sā inchöngten u tö ngam Mā Tēv.

²Ngaich havëten Pisalël ang Môsös Oholiāp inrē, ṙòkhöre inrē tarik tö-akahaṙa ellōn yip tökēhötvö ellōn tö ngam Mā Tēv tö mikah, ṙòkhöre yip maharuhkö ellōnre nö yihtöre nö im la-en nö vī-i e.

³Ngaich in Môsös cha-a nö kēḵ nuk tökētu nö ṙòkhöre, nuk kahëtö yik kūön Israĕl nö i la-en ngam töhet chūök, nö vī-i u. Ngaich hēk cha-a nö kētö nup kanahanglōn tökētu nö in ò öt hĕng hang pumheū-euṅ.

⁴Ngaich ṙòkhöre yik tö-akaha tarik, yik töla-evṙen tö nuk la-en el ngam töhet chūök, nö yih nö ṙā-ang i nuk vahīṙenre;

⁵Ngaich vë-ekūö Môsös cha-a, nö ngö ṙô, Yahlö ṙôken tī yin vē tarik nö kētö tövī-i la-en, ngam tövī-i hachöngten ngam Mā Tēv.

⁶Ngaich kētö Chöngö ang Môsös, ngaich cha-a nö hōten e nö ahangnyu nö keuheūtngöre chūök nö el ngam elyöngö, nö ngö ṙô, Un tariku un rēhĕn kikānö tö hēk nö la-evṙen nö i nup tökētu el ngam töhet chūök. Tahaiṙen ngaich yik tarik nö kē-ĕti.

⁷Pò nuk in cha chehen nö ngaich nö kô-òre nö i nuk la-en nö ṙòkhöre tövī-i, yahlö ṙôken inrē.

⁸Ṙòkhöre inrē yik tarik tö akahaṙa ellōn in cha yik tö vahī-envö nö sömö vahī tö hilā ranangngökūö ngam rūkui inmūlö; tö tövai hilā, tölingūṅ tököinyö nganāvö mat, laturë, nö aṅ mat tö kërup vahīṙen tömilichngen vahī anū-ö.

⁹Ngih tö hĕng hilā ranangkūö nët anāi hëvhöre sumkôngö rôta, fën sumkôngö ṙôktāk ngih tö hĕng hilā ranangkūö: höng hēngö kinlaha ṙôkö nup hilā ranangkūö.

¹⁰Taptu nup tö taneui hilā ranangkūö nö in höö tö ò: ane inrē nup tahëng tö taneui hilā ranangkūö taptu nö in höö tö ò.

¹¹Ngaich anga-aṅ nö vī chūök yanòhkūö tö tölingūṅ nö i taseū ngam tö hĕng hilā ranangkūö nö lā uk ngam raneh tanaptö kūö: ngati tī anga-aṅ nö vī nö i taseū ngam hilā ranangkūö ngam lamā uk takô im innëtö tanaptö kūö.

¹²Taneui anāi vahī anga-aṅ i tö hĕng hilā ranangkūö tö chūökkūö yanòh, taneui anāi vahī inrē anga-aṅ nö i taseū ngam hilā ranangkūö im innëtö tanaptö kūö: kamlö minë chūökkūö yanòh nö in höö.

¹³Ane inrē anga-aṅ taneui anāi vahī tö humlum kinvòk, ngaich taptö kūö minë hilā ranangkūö nö in höö tö minë kinvòk; höng hĕng ngaich ngam rūkui inmūlö.

¹⁴Ngaich inrē anga-aṅ nö vī ranangkūö ngam rūkui i kui ngam rūkui inmūlö tö sanôi pököre; kahuk sīön nup ranangkūö tövī-i tö ò.

¹⁵Lūöi anāi sumkôngö öp tö hĕng ranangkūö; höng hēngö kinlaha minë tö kuhuk sīön ranangkūö.

¹⁶Ane inrē anga-aṅ hatapkūö nup tö taneui ranangkūö tö höö, ane inrē hatapkūö nup tö tafūöl ranangkūö tö höö.

¹⁷Ane inrē anga-aṅ taneui anāi vahī tö chūökkūö yanòh nö i taseū öp ranangkūö öp lā uk takô ip tanaptö kūö, ane inrē taneui anāi vahī anga-aṅ tö chūökkūö yanòh i taseū öp ranangkūö öp lā uk takô im innëtö tanapkūö.

¹⁸Ane inrē anga-aṅ taneui anāi vahī tö mās kinvòk nö tanaptö kūö ngam rūkui nö in höö pò e nö hōtu nö hĕng.

¹⁹Ane inrē anga-aṅ vī uk kōiny sīṅp töhangāvö mat nö kinṙultö kui ngam rūkui, lā tulöng inrē ök uk kapëông kinṙultö kui.

²⁰Ngaich vī nuk savaich ngam rūkui inmūlö anga-aṅ tö sittim chōn, nö asökö.

²¹Söm sumkôngö rôta tö hĕng savaich hĕng sumkôngö ròngti inrē tö hĕng savaich.

²²Kö anëtö inheūngkūö öp tö hĕng savaich, ngaich kuṙōlhötvö kūö nö in höö: ngati tī anga-aṅ nö vī nuk savaich ök rūkui inmūlö nö ṙòkhöre.

²³Vī nuk savaich ök rūkui inmūlö anga-aṅ; lā lòhngö, nö kū-ö tö lòhngö nët anāi savaich:

²⁴Fën anāi vahī anga-aṅ tö rupīö löp nö i rööntö minë tö nët anāi savaich, nët löp i rööntö öp tö hĕng savaich chūök nup tö nët tö-aheūngö in e, nët inrē löp i rööntö öp tahëng savaich nö chūökkūö nup tö nët tö-aheūngö in e.

²⁵Im innët lā kaha ngam rūkui inmūlö, lā kapā, nët anāi vahī anga-aṅ tö savaich

²⁶Tö nup rupīö löp u fën anāi; nët löp i rööntö öp tö hĕng savaich, ane inrē nët löp i rööntö öp tahëng savaich.

²⁷Vī savaich anga-aṅ inrē tafūöl lamā rit ngam rūkui inmūlö nö kū-ö tö la sūng.

²⁸Vī savaich anga-aṅ inrē nët nö mī-i sinkeukngö ngam rūkui inmūlö, nö lā rit.

²⁹Ngaich anū-ö nö hachāpö röönti, ngaich ngatī anū-ö nö söl lā tulöng nö hĕngö chūökkūö töp töchuvī-ël; ngati tī anga-aṅ tö u nyöre; i minë tö nët sinkeukngö.

³⁰Ngaich hëvhöre nuk umuh savaich, tö nuk rupīö löp u, tafūöl sīön, kö kö anëtö löp ngih tö hĕng savaich nö i rööntö re.

³¹Ngaich vī kinrān u anga-aṅ tö sittim chōn; taneui i nup savaich tö hĕng lā im rūkui inmūlö,

³²Taneui inrē kinrān nup savaich im tahëng lā kaha ngam inrūkui, taneui inrē nup kinrān ngam rūkui inmūlö nö lā rit kū-ö tö lā sūng.

³³Ngaich anga-aṅ inrē nö vī öp lā ṙat kinrān nö tufuni nö ellōn nup savaich löktökūö im tö hĕng manā-angkūö söl im tahëng.

³⁴Ngaich lūöp nuk savaich anga-aṅ tö humlum ngaich vī nuk töchuvī-ël chanit nö humlum nö chūök nuk kinrān, lūöp nuk kinrān inrē humlum.

³⁵Vī rananglö anga-aṅ inrē tö tölingūṅ, tökööinyö nganāvö mat, laturë, tövai hilā inrē: aṅ mat tö kërup vahīṙen tömilichngen vahī.

³⁶Fënö vahī anga-aṅ inrē tö sittim chōn machööḵlö, lūöpö anū-ö tö humlum: humlum nup kinvòk u; vī rūpīö anga-aṅ inrē, fën, löp u.

³⁷Ane inrē anga-aṅ vī ranangngökūö inkūp ngam rūkui inmūlö tö tölingūṅ, tököinyö nganāvö mat, laturë, tövai hilā inrē, vahīṙen chamôktö mirun;

³⁸Nup tö taneui machööḵlö inrē tö nup kinvòk u: lūöpö nup kui u tö humlum, humlum inrē nuk tachöklö u: mās inrē nuk tö taneui löp u.