Read Car_Nicobarese MANEUTNYI 39 Bible Online

MANEUTNYI 39 - Car_Nicobarese bible

MANEUTNYI 39

¹Vī tövai cha-a inyut tölingūṅ, tököinyö nganāvö mat, laturë inrē, nö inyut mineukṙen ngam töhet chūök, vī töhet inyut Aròn inrē; sā tinöölô Môsös tö ngam Mā Tēv.

²Vī efòt anga-aṅ tö humlum, tölingūṅ, tököinyö nganāvö mat, laturë, tövai hilā inrē.

³Röm nuk humlum cha-a nö ahööyö ngaich vī-i u nö lōt, nö vītu nö im tölingūṅ, im tököinyö nganāvö mat, laturë, tövai hilā inrē, vahiṙen tömilichngen vahī.

⁴Vītö nup elṙanôṙö e cha-a nö taphen höö: taptukūö anū-ö nö i nup tö nët taseū u.

⁵Ane inrē öp tömilichngen kinpātö sörplis, töhapālöng nö in e, nö sörplis e, nöng hĕng nö tö sā vinī-i e; nö humlum, tölingūṅ, tököinyö nganāvö mat, laturë, tövai hilā inrē; sā tinöölô Môsös tö ngam Mā Tēv.

⁶Ngaich cha-a inrē nö vī ònik ihong, lömhötvö nö el nup inlaphöt humlum, ka-īpö tö tösā kin-īpö kinlong minkahngö, sā minë-eny yik kūön Israĕl.

⁷Ngaich anga-aṅ nö vī-i u nö elranôṙö ngam efòt, nö ihong inköpkölōn tö yik kūön Israĕl; sā tinöölô Môsös tö ngam Mā Tēv.

⁸Ngaich anga-aṅ nö vī lanak elngòh, tömilichngen vinī-i, sā vinī-i öp efòt; nö humlum, tölingūṅ, tököinyö nganāvö mat, laturë, tövai hilā inrē.

⁹Fën mirëṙö angū-ö, vī ngam lanak elngòh cha-a nö hachāpö; ṙôktāk eltī (22 centimetre) öp rôta e, ṙôktāk eltī (22 centimetre) inrē öp ṙôktāk e nö hachāpö.

¹⁰Ngaich cha-a nö fën mitöökö hatöökti tö ihong nö in e: hĕng mitöökö sātis, tôpas, karpöngköl inrē im raneh mitöökö.

¹¹Im innët mitöökö, hĕng safir, hĕng inrē taimön.

¹²Im linūöi mitöökö, hĕng chasin, hĕng akēt, hĕng inrē emetis.

¹³Im finën mitöökö, hĕng peril, hĕng ònik, hĕng inrē yaspis: el nup humlum anū-ö nö halaphötvö nö ip mitöököre.

¹⁴Ngaich nuk ihong nö nët sīön nö sā minë-eny yik kūön Israĕl, nuk minë-eny cha; sā nup tö ka-īpö ip kinlong minkahangö, keuheūtlöre anū-ö nö kö i minë-eny cha, yip tö nët sīön miyöngö.

¹⁵Ngaich vītö sayōk cha-a nö im lanak sā tökuvaha, nö tötkatĕhka humlum nö chuvīṙi-ël.

¹⁶Ngaich nëtö vahī cha-a tö humlum inlap, nët inrē humlum töchuvī-ël; ngaich vītö minë tö nët töchuvī-ël i minë tö nët nang ngam lanak elngòh.

¹⁷Ngaich inrē cha-a nö vīhöt minë tö nët töchuvī-ël humlum sayōk, nö i minë tö nët töchuvī-ël i nuk nang ngam lanak elngòh.

¹⁸Ane inrē cha-a vītö nuk tö nët inlap, i nup tö nët töchuvī-ël i minë tahëng nang e, ngaich vīlö u nö elranôṙö ngam efòt, nö lā kūö.

¹⁹Nëtö vahī cha-a tö humlum töchuvī-ël, ngaich vīten u nö i nup tö nët nang ngam lanak elngòh, ip taseū e, öp lā im efòt nö lā ël.

²⁰Ngaich cha-a inrē nö nëtö vahī tö hulum töchuvī-ël, ngaich vīten u i nup tö nët elranôṙö ngam efòt lā ël, nö lā kūö e, röpta ip tanaptökūö e, i kui öp tömilichngen vinī-i tökupātö sörplis ngam efòt.

²¹Ngaich cha-a nö nyëktö ngam lanak elngòh i nup töchuvī-ël in e nö i nup töchuvī-ël im efòt nö aṅtī tö lēs tölingūṅ, pòn hōtö e nö kui öp tömilichngen kinpātö sörplis ngam efòt hòṅ ngam lanak elngòh inrē nö öt tayōla nö im efòt sā tinöölô Môsös tö ngam Mā Tēv.

²²Ngaich anga-aṅ nö vī tökiröng inyut ngam efòt, tö tökupātö, höng tölingūṅ nyöre;

²³Mëngö ellōn ngam tökiröng inyut, sā manëngö vët inyut kumyung, holtö nyanëkngöre nö havīṙi im tömëngö in e, pòn sōtu angū-ö nö takaich.

²⁴Ngaich cha-a nö vītö ṙòng anār i kui kinhôi ngam tökiröng inyut tö tölingūṅ, tököinyö mat, laturë, tövai hilā inrē.

²⁵Vī kungkrū cha-a inrē tötkatĕhka humlum, ngaich vītö nup kungkrū i hôi nup ṙòng anār i kui nup kinhôi ngam tökiröng inyut nö vinngö, i hôi nup ṙòng anār;

²⁶Hĕng kungkrū hĕng inrē ṙòng anār, hĕng kungkrū hĕng inrē ṙòng anār, i kui nup kinhôi ngam tökiröng inyut nö vinngö, nö ip mineukṙen lā tuhēt; sā tinöölô Môsös tö ngam Mā Tēv.

²⁷Vī inyut Āròn cha-a inrē tö tövai hilā tökupātö, inyut yik kikōnyö kūön ò inrē,

²⁸Vī tövai hilā inrē nö sapīöv, tövai hilā inrē nö yanöṅtö kui, pachūma inrē töngënö kalröön nö tövai hilā.

²⁹Tövai hilā inrē sörplis, tölingūṅ, tököinyö nganāvö mat, laturë, vahī chamôktö mirun; sā tinöölô Môsös tö ngam Mā Tēv.

³⁰Ngaich cha-a nö vī tömitāk im töhet sapīöv tö tötkatĕhka humlum, ngaich kūich nö i mat e, sā kin-īpö mat kinlong minkahngö, TÖHET NÖ IM MĀ TĒV.

³¹Ngaich cha-a nö kapòk tö lēs nö in e tö tölingūṅ, nö inköpngö e nö im sapīöv lā tulöng; sā tinöölô Môsös tö ngam Mā Tēv.

³²Möl nö keuheūten minë la-en ngam inrūkui ngam rūkui inmūlö; ngaich yik kūön Israĕl nö keuheūten nö asā tinöölô Môsös tö ngam Mā Tēv, ngatī cha-a.

³³Ngaich kētö ök inrūkui cha-a nö in Môsös, tök rūkui inmūlö, ṙòkhöre nup chehen e inrē nup kinvòk e, savaich e, kinrān e, machööḵlö e, tö nup löp e inrē;

³⁴Tök kinṙulkui e inrē uk kūön sīṅp töhangāvö mat, tök uk kapëông inrē kinṙulkui, tök innyatlö inrē ranangkūö:

³⁵Tök kasòng ngam tökô-en inmeuktö, tö nuk kaneun e, tök anūichö miṙēlōn inrē;

³⁶Tök mīs, ṙòkhöre nuk chehen e, tö nuk töhet ròtī inrē:

³⁷Tök töhet chūök rööntö manyaṅk, tö nuk ëāṅvö e, nuk ëāṅvö tö halēntu nö haṙākö, nup chehen u inrē, tavī-i ëāṅvö inrē;

³⁸Ök humlum tahāklö, incham tavī-i inrē, tötahūsa lōpān, innyatkūö inkūp ngam rūkui inmūlö;

³⁹Tök mās tahāklö ök mās inrē tö sā mat inhāṅl ël e, nuk kaneun e, tö nuk chehen e nö ṙòkhöre, tök sanöich, rööntö e inrē;

⁴⁰Nup ranang ök elmilūkö tökilölhaka, machööḵlö e, löp e inrē, tök innyatngö ngam lökhöt elmilūkö, nuk tökuvaha e, tö nuk tumnôkö e inrē, ṙòkhöre inrē nup chehetī i la-en ngam inrūkui, chehetī inrē i la-en ngam rūkui inmūlö;

⁴¹Nup inyut mineukṙen el ngam töhet chūök tövāyö vinī-i, nuk töhet inyut Āròn inrē nö Kūönṙô, nuk inyut yik kikōnyö kūön ò inrē, nö meukṙen nö el chūök Kūönṙô.

⁴²Sā tinöölô Môsös tö ngam Mā Tēv anū-ö nö ṙòkhöre, ngati tī yik kūön Israĕl tö nuk la-en.

⁴³Meuk nuk la-en ngaich Môsös nö ṙòkhöre, ngaich meūkö cha nö keuheūten tö e; sā Chöngö ngam Mā Tēv, ngatī tī cha-a: ngaich hakôlò u ang Môsös.