Read Car_Nicobarese MANEUTNYI 40 Bible Online

MANEUTNYI 40 - Car_Nicobarese bible

MANEUTNYI 40

¹Ngaich ngö ṙô ngam Mā Tēv nö vë-ekūö Môsös,

²Asöklö ngam inrūkui ngam rūkui inmūlö pömchö ip raneh sakāmö ngam raneh chingëṅt.

³El e tī pömchö tö ap kasòng tökô-en inmeuktö, hanyantngö ap kasòng më-eṅ töp ranangkūö.

⁴Ngaich kēhĕt ngam mīs më-eṅ inrē, halēn nup chehen ël e; kēhĕt öp chūök rööntö manyaṅk më-eṅ inrē, tōttökūö nup ëāṅvö e inrē.

⁵Ṙātö ngam humlum më-eṅ inrē tahāklö lōpān i kūö ngam kasòng tökô-en inmeuktö, ngaich vīlö öp ranangkūö inkūp ngam inrūkui.

⁶Ane inrē më-eṅ ṙātö ngam tahāklö töföngö tökētu nö i kūö inkūp ngam inrūkui ngam rūkui inmūlö.

⁷Ngaich më-eṅ inrē ṙātö ngam chūök sanöich, i hôi ngam rūkui inmūlö tö ngam tahāklö, asëlö mak inrē ël e.

⁸Halēnlö ap elmilūkö nö havīṙi, seūlö nup ranangkūö ngam lökhöt ngam elmilūkö.

⁹Ngaich kēḵ ngam tavī-i incham pömchö, ngaich hacham ngam inrūkui nup aṅ e inrē nö ṙòkhöre, öm ahetlö e, ṙòkhöre nup chehen e inrē: ngaich angū-ö min nö töhet.

¹⁰Ngaich më-eṅ min inrē hacham ngam tahāklö töföngö tökētu, ṙòkhöre nup chehen e inrē, ngaich ahetlö ngam tahāklö: ngaich ngam tahāklö min nö tölngö töhet.

¹¹Ngaich më-eṅ inrē hacham ngam chūök sanöich tö ngam rööntö e, ngaich ahetlö e.

¹²Ngaich kēten Āròn më-eṅ tö yip kikōnyö kūön ò nö i kūö inkūp ngam rūkui inmūlö, ngaich söichö cha më-eṅ tö mak.

¹³Hayutlen Āròn pömchö tö nup töhet inyut, hachāman pömchö, ahetlen ò inrē, hòṅ ò nö meukṙen chu nö i chūök Kūönṙô.

¹⁴Kētö yip kikōnyö kūön ò hayutlen cha tö nup inyut:

¹⁵Hachāmö cha pömchö, öm sā tī re töp yöng cha, hòṅ cha nö meukṙen chu i chūök Kūönṙô; ngaich ngam inchāmö cha min nö lökten cha nö tö-örheūheu nö Kūönṙô i tumkölchap cha.

¹⁶Ngaich ngati tī ang Môsös: sā nup tinöölô ò nö ṙòkhöre tö ngam Mā Tēv, ngati tī anga-aṅ.

¹⁷Ngaich ngö inlahen im raneh chingëṅt im in nët samyeūheu, im raneh sakāmö ngam chingëṅt nö asöklöngö ngam inrūkui.

¹⁸Ngaich Môsös nö asöklö ök inrūkui, ngaich ṙāḵ nuk löp e, asöklö nuk savaich e inrē, karāntö nuk kinrān e, asöklö nuk machööḵlö e inrē.

¹⁹Ngaich anga-aṅ inrē nö haṙĕh rūkui nö i kui ngam inrūkui, kahultö kui ngam rūkui inrē nö lā tulöng tö e; sā tinöölô Môsös tö ngam Mā Tēv.

²⁰Ngaich anga-aṅ nö kēḵ ök tökô-en inmeuktö chaplö e ngaich nö el ngam kasòng Chöngö, ngaich kuṙōlhöt nuk kaneun nö im kasòng Chöngö, ngaich ṙātö ök anūichö miṙēlōn nö i kui ngam kasòng Chöngö.

²¹Ngaich anga-aṅ nö kēhĕt ngam kasòng Chöngö nö ël ngam inrūkui, ngaich vītö ök innyatngö ngam ṙanangkūö, ngaich hanyatngö ngam kasòng tökô-en inmeuktö, sā tinöölô Môsös tö ngam Mā Tēv.

²²Ngaich anga-aṅ inrē nö ṙātö ap mīs nö el rūkui manūlö, nö lā kapā i kaha ngam inrūkui lā uk ök innyatngö.

²³Ṙātö nuk ròtī anga-aṅ inrē nö lēn nö i kūö ngam Mā Tēv; sā tinöölô Môsös tö ngam Mā Tēv.

²⁴Ngaich ṙātö öp chūök rööntö manyaṅk nö ël rūkui manūlö, kamlö nö i ngam mīs i kaha ngam inrūkui nö lā lòhngö.

²⁵Tōttökūö nup ëāṅvö anga-aṅ ngaich nö i kūö ngam Mā Tēv; sā tinöölô Môsös tö ngam Mā Tēv.

²⁶Ngaich anga-aṅ nö ṙātö ap humlum tahāklö nö el ngam rūkui manūlö lā kūö ngam innyatngö:

²⁷Ngaich anga-aṅ nö föng tötahūsa lōpān, nö ël e; sā tinöölô Môsös tö ngam Mā Tēv.

²⁸Vītö ök ranangkūö inkūp ngam inrūkui anga-aṅ ngaich.

²⁹Ngaich ṙātö ök tahāklö töföngö tökētu anga-aṅ nö i kūö inkūp ök inrūkui ngam rūkui manūlö, ngaich ël e nö kētö töföngö tökētu nyā-aṅ inrē tökētu; sā tinöölô Môsös tö ngam Mā Tēv.

³⁰Ngaich ṙātö ngam chūök sanöich anga-aṅ i hôi ngam rūkui manūlö tö ngam tahāklö, ngaich asëlö mak nö ël e nö sanöich.

³¹Ngaich Môsös, Āròn, tö yik kikōnyö kūön ò inrē nö söich tīre, röönre inrē nö ël e;

³²Hē cha nö kuhēthötre nö el rūkui manūlö, hē cha inrē nö haröhtöre nö ip tahāklö, ngaich söichöre cha-a: sā tinöölô Môsös tö ngam Mā Tēv.

³³Vīlö ngam elmilūkö anga-aṅ inrē nö vinngö nö el ngam inrūkui tö ök tahāklö inrē, ngaich vītö ranangkūö lökhöt im elmilūkö. Möl Môsös nö keuheūten töm la-en.

³⁴Ngaich ngam taṙul nö hanyattökui ngam rūkui manūlö, ngaich ngam yanëichö ngam Mā Tēv nö hatööḵlö ngam inrūkui.

³⁵Ngaich ötkô Môsös nö kuhēthötre nö el ngam rūkui manūlö, tö kūö ngam taṙul nö i kui e, ngaich ngam yanëichö ngam Mā Tēv nö hatööḵlö ngam inrūkui.

³⁶Ngaich hē ngam taṙul nö kē-ĕyö nö ṙā-ang kui ngam inrūkui, inṙūöhöröön ngaich yik kūön Israĕl, nö i nuk kinröönngö cha:

³⁷Yē ngam taṙūl pöri nö öt kiröönngöre hanöng saha öp sakāmö kinëḵngö e.

³⁸Pò ngam taṙul ngam Mā Tēv nö i kui ngam inrūkui tö sakāmö, ngaich in e inrē ap tameūyö tö hatööm, nö meūkö tö yip aṅ patī Israĕl nö ṙòkhöre, i minë kinröönngö cha.