Read Car_Nicobarese MANEUTNYI 9 Bible Online

MANEUTNYI 9 - Car_Nicobarese bible

MANEUTNYI 9

¹Ngaich ngam Mā Tēv nö ngö ṙô tö Môsös, Kuṙòh kuhēthötre man in Fërō, vë-eny nang ò, Ngö ṙô an ngam Mā Tēv, ngam Tēv yip Hīprū. Hökngen më tarik chu nö kiröönngöre, hòṅ cha nö lök la-en chu.

²Yē meh sōten cha nö kiröönngöre, öm höng ṙòngmö hòṅ Haköpö cha,

³Yĕh meuk, i kui minë nuā meh an ngam kël ngam Mā Tēv nup el kahôyö, i kui nup kōra, i kui nup köttö, i kui nup ūṅt, i kui nup töhĕng mūl töṙeūla i mihëṅṙö u, i kui nup töṙōlkangen töṙeūla nö mūlhaka: yöng invah, elvāng nuā ap min ihih, invah kunröön inrē.

⁴Ngaich ngam Mā Tēv min nö haköhngen nup nuā Israĕl, tö nup nuā Aikup, öt hĕng nòng min tö kapah in nup nuā yip kūön Israĕl.

⁵Ngaich ṙētakvö ṙô ngam Mā Tēv, nö ngö ṙô, Huṙöich an ngam Mā Tēv nö tī tö e.

⁶Ngaich tinī-iṅv ngam Mā Tēv tö e im huṙöich, ngaich nuk nuā Aikup nö kapah nö ṙòkhöre: öt hĕng nòng pöri tökapah nö i nuk nuā yik kūön Israĕl.

⁷Tīnhang ngaich Fërō, tö ngamëcha, ngaich öt höng hĕng hang nòng tökapah nö i nuk nuā yik aṅ Israĕl. Ngëngö pöri ök ellōn Fërō, ngaich öt halöngngen yik tarik angā-aṅ nö kiröönngöre.

⁸Ngaich ngam Mā Tēv nö ngö ṙô tö Môsös, tö Āròn inrē, Kē tisum man hĕng më-eltī-i, tisum aṅkūö tameūyö, hökngö tī Môsös nö tūilö e nö kū-ö tö el halīöngö, nö i kūö Fërō.

⁹Ngaich vīngöre min angū-ö nö pitung nö keuheūtngöre chūök nö im panam Aikup, ngaich sīöpnyöre min nö seh nö taföö, nö i alaha tarik, töṙeūla inrē, keuheūtngöre chūök im panam Aikup.

¹⁰Ngaich chā-a nö kē tisum kūö tameūyö, ngaich sökhaka nö i kūö Fërō; tūilö e ngaich Môsös nö kū-ö tö el halīöngö, sīöpnyöre ngaich nö vīngöre nö seh nö taföö, nö i alaha tarik töṙeūla inrē.

¹¹Ngaich yik tömilūönö nö ötkô nö sökhak nö i kūö Môsös, kūö minë seh, pò minë seh nö i alaha më tömilūönö, ṙòkhöre më aṅ Aikup inrē nö aṅhaṅv alaha.

¹²Ngaich ngam Mā Tēv nö hangë-eng ellōn Fërō, ngaich öt hang ṙô cha angā-aṅ; sā ṙô ngam Mā Tēv nö in Môsös.

¹³Ngaich ngö ṙô ngam Mā Tēv tö Môsös, ka-euilö kūö man choholre ip peuheū, söklöre öm i kūö Fërō, ngö ṙô tö ò, Ngö ṙô An ngam Mā Tēv, ngam Tēv yip Hīprū, hökngen më tarik Chu nö kiröönngöre hòṅ cha nö lök la-en Chu.

¹⁴Tön tīntö nup lanëlngö Chin nö el ṙôngö meh, i kui yip tarik alaha meh; hòṅ meh akahalōn tö töthĕng tak tö sā Chu i në taṙòkhöre panam.

¹⁵Tön ngaich Chin töngamuh kētö tīre hachökö meh inrē, tö yip tarik meh öich aṅtī tö tölëlngökūö invah, ngaich man inrē rökiṙen ṙāngö ngih panam.

¹⁶Kô-en an ri nö angū-ö lökten Chu hòṅ hameukhö mat meh tö minhôiṅyöre, hòṅ ngam Minë-eny Chu inrē nö keuheūtngöre chūök nö vënyu nö ing panam.

¹⁷Ṙòngmö hapōilöre öm lā-al vē tarik Chu, öm öt hökngen cha nö kiröönngöre?

¹⁸Yĕh meuk, tīntö kumṙah Chin ip huṙöich, ngatī ṙētak, yöng tökënngöre kumṙah, öt töngatī-iv nö i Aikup, löktö kūö ök sakāmö e nö vītu, söl ing töngamuh.

¹⁹Lökten man yĕh kurāten kēhĕt nup nuā re, nup töng chehen meh el kahôyö; tön ṙòkhöre nup tökôti nö el kahôyö, tarik töṙeūla inrē, nup tötkēhötvö nö i patī, fuk kui min anū-ö töm tökënngöre kumṙah, ngaich kapah min anū-ö.

²⁰Angā-aṅ öp töpa-ekūö tö ṙô ngam Mā Tēv, nö in yik tarik alaha Fërō, tölṙô yik tarik alahare ngaich, afaltö nuk nuā re nö i patī:

²¹Angā-aṅ ök töt chumkūöṙen tö ṙô ngam Mā Tēv ṙāngö yik tarik alahare, tö nuk nuā re inrē, nö el kahôyö.

²²Ngaich ngö ṙô ngam Mā Tēv tö Môsös, Hateutnyö këlre man kū-ö tö el halīöngö, hòn keuheūtngöre chūök öp tökënngöre kumṙah, nö im panam Aikup i kui tarik, i kui töṙeūla, i kui nup kun chōn el kahôyö, nö keuheūtngöre chūök im panam Aikup.

²³Hateutnyö këlre ngaich Môsös nö kū-ö tö el halīöngö: ngaich ngam Mā Tēv, nö tīntö kunṙôkö, tökënngöre kumṙah inrē nö i kui ngam panam, tameūyö inrē; tī tö tökënngöre kumṙah ngaich ngam Mā Tēv nö i kui ngam panam Aikup.

²⁴Lökten ök tökënngöre kumṙah, tameūyö, holre tö tökënngöre kumṙah, nö kiröngen kumlēḵ, öt töngatī-iv nö im panam Aikup nö ṙòkhöre, hēten tö e nö pumnāmö tarik.

²⁵Ngaich ngam tökënngöre kumṙah nö fuk kui tī tö nuk taṙòkhöre el kahôyö, hĕnghöre tarik, töṙeūla inrē, keuheuheūtngöre chūök im panam Aikup; ngaich ngam tökënngöre kumṙah nö fukkui tī tö nuk kun chōn el kahôyö, keuheūtngöre nuk chōn nö ohngö el kahôyö.

²⁶Höng im panam Kōsen nö öt kumṙāhav tö tökënngöre, i chūök yik kūön Israĕl,

²⁷Tīnhang ngaich Fërō, ngaich havëten nā Môsös, nā Āròn, ngaich ngö ṙô tö cha, Köölö fālen chin ing töngamuh: tölöök An ngam Mā Tēv, tölöök īhö tö vē tarik chu inrē.

²⁸Vë-ekūö ngam Mā Tēv; ngāchö tölngö nun minë tö kalē-ĕṙô kunṙôkö, tökënngöre inrē kumṙah; ngaich chin min hökngen yīö kiröönngöre, rö-ö yin min ngöh ngaich.

²⁹Ngaich Môsös nö ngö ṙô tö ò, Hanyāṅknyö këlre chin min i kūö ngam Mā Tēv, ilööṙen yē chu ngaich lā uk ngam elpanam; ṙātöre min ngaich ngam kunṙôkö, ötrēhĕn min inrē nö ōtngöre tökënngöre kumṙah: hòṅ meh akahalōn töng tumlat, nö tumlat ngam Mā Tēv.

³⁰Akahalōn chin ri tö yīö öl hòṅ pa-ekūö tö ngam Mā Tēv, ngam Tēv, më-eṅ tö yip tarik meh inrē.

³¹Ngaich nuk flek, tö nuk parlī inrē nö chök: pò nuk ṙòng nö pöpnyöre, ngatī nuk flek inrē nö môlnyi ṙòng.

³²Hö-ö pöri nuk vīt, tö nuk tahëng kangen vīt inrē nö chök; pòn öl nö sīöp.

³³Ngaich Môsös nö kunyi-inyre nö ṙā-ang el ök ëlpanam nö ṙā-ang in Fërō, ngaich hanyāṅknyö këlre nö im Mā Tēv: ṙāngöre ngaich nuk kunṙôkö, tök tökënngöre kumṙah inrē, ngaich öt chahūköti ngam kumṙah nö i kui ngam tumlat.

³⁴Ngaich hē Fërō nö meuk ngam kumṙah, tö ngam tökënngöre kumṙah, tö minë kunṙôkö inrē, nö ṙāngenre, ṙūölenre angā-aṅ nö köölö fālen, nö hangëngö ellōnre, tö yik tarik ò inrē.

³⁵Ngëngö ngaich ök ellōn Fërō, ngaich angā-aṅ nö öt halöngngen yik tarik Israĕl nö kiröönngöre, sā ṙô ngam Mā Tēv nö in Môsös.