Read Car_Nicobarese YŌP 1 Bible Online

YŌP 1 - Car_Nicobarese bible

YŌP 1

¹Hĕng taka ök umuh tarik ik panam Us, ök töminënyuvö tö Yōp; töt fāluṙen ök nö tarik töchiplö inrē, töpa-ekūö ök tö ngam Tēv, havööngökūöre inrē nö ṙā-ang i tötlöök.

²Sat tak yik kikōnyö kūön ò töfötnyu lūöi tak kikānö inrē.

³Sat köṅny nuk sīṅp ò, lūöi köṅny ūṅt, taneūyòng köṅny nuā tamūök inröl, taneūyòng inrē kan köttö, maṙôngö tarik alaha inrē, lökten ngòh tarik nö tökiröng nö in yik tarik aṅ lā chuhöt nö ṙòkhöre.

⁴Kiröönngöre ṙung yik kikōnyö kūön ò ngaich vī tökiröng nyinā-aṅ nö i patī öp töhĕng tak ip sakāmö ò; ngaich cha-a nö söömngö invëtö yip tölūöi tak kanānö cha.

⁵Ngaich hē nuk sakāmö nyinā-aṅ nö ṙònghöichṙen ngaich Yōp nö söömtö inhetlö cha, ngaich ka-euilö kūö anga-aṅ tö peuheū nö choholre nö kētö töföngö tökētu asā tum tak cha nö ṙòkhöre; pòn ngö ṙô Yōp, Lohten yip kūön chu kikōnyö nö köölö fālen, ötlēḵkôre inrē tö ngam Tēv nö ellōnre. Ngatī inlahen ang Yōp nö örheūheu.

⁶Ngaich ök umuh sakāmö hē yik kūön ngam Tēv nö yihtöre nö hameuktöre nö i kūö ngam Mā Tēv, yihtöre inrē Satān nö in cha.

⁷Ngö ṙô ngaich ngam Mā Tēv tö Sātan, Ṙā-ang yih öm më-eṅ? Ngö ṙô ngaich Satān nö sapṙô ngam Mā Tēv, Ṙeū-eung i kinröönköre chin i kūö ngam tumlat, ṙeū-eung i kinröönö inrē latulöng lataṙeū inrē in e.

⁸Ngaich ngö ṙô ngam Mā Tēv tö Satān, Ngëichkö öp tarik chu öm ang Yōp, tö ò nö öt hĕng tak insā nö i kūö ngam tumlat, tötfāluṙen töchiplö inrē nö tarik, töpa-ekūö tö ngam Tēv havööngö kūöre inrē nö ṙā-ang i tötlöök?

⁹Ngö ṙô ngaich Satān nö sapṙô ngam Mā Tēv, Pa-ekūö ap Yōp tö ngam Tēv nöng öt löknyu chööḵnyi?

¹⁰Röh öm havīlen ò tö kinlōnglöp patī ò inrē tö nup taṙòkhöre in ò, nö keuheūtngöre lā-a? Hakôlò nup la-en kuntī ò man yih, ngaich nup inlānen ò nö ṙūöhölre ṙôken nö im panam.

¹¹Ṙā-ang tīre pöri më-eṅ yēḵ töngamuh, lūölkö nup in ò inrē ngaich anga-aṅ min nö ötlēḵkôre tö meh nö i kūö meh.

¹²Ngaich ngö ṙô ngam Mā Tēv tö Satān, Yĕh meuk, ṙòkhöre nup in ò nö i minhôiṅyö meh; höng uh pöri më-eṅ lūöltö tīre in ò. Kiröönngöre ngaich Satān nö ṙā-ang i kūö ngam Mā Tēv.

¹³Ngaich hĕng ök umuh sakāmö hē yik kikōnyö kūön ò yik kikānö inrē nö nyā òk vāin inrē nö i patī ök mëm cha kikōnyö;

¹⁴Ngaich hĕng tak ök umuh ma-ahānga yamih nö in Yōp, ngaich ngö ṙô, Kuköh tumlat nuk kōiny nuā nyā-aṅvkūö nuk köttö nöng in u;

¹⁵Ngaich yik aṅ Sapiā nö yihtöre nö in u ngaich kēngö u, fëlngö yik tarik inrē nö aṅtī tö sanët; ngaich chū-ö höng hĕng tit tak töt kô-òngvah öich vë-eny nang meh.

¹⁶Ṙòngmöng ṙònghöich ṙô anga-aṅ nö ṙô-òv, chalô ök umuh tahëng taka, ngaich ngö ṙô, Suktöre ök tameūyö ngam Tēv nö ṙā-ang el halīöngö ngaich ök ngö tī tö nuk sīṅp tö yik tarik, ngaich ṙāpngö tī tö u, ngaich chū-ö höng hĕng tīt tak töt kô-òngvah öich vë-eny nang meh.

¹⁷Ṙòng möng ṙònghöich ṙô anga-aṅ nö ṙô-òv, chalô ök umuh tahëng taka, ngaich ngö ṙô, Lūöi kiteūm yik aṅ Kālti, ngaich kilöön nuk ūṅt ngaich kēngö u, fëlngö yik tarik inrē nö aṅtī tö sanët; ngaich chū-ö höng hĕng tit tak töt kô-òngvah öich vë-eny nang meh.

¹⁸Ṙòngmöng ṙònghöich ṙô anga-aṅ nö ṙô-òv chalô ök umuh tahëng taka, ngaich ngö ṙô. Nyā-aṅvkūö òk vāin inrē yik kūön meh kikōnyö tö yik kikānö inrē nö el patī ök mëm cha kikōnyö;

¹⁹Ngaich yĕh meuk, ök yöng kuföt nö yih nö havāngngö ël ap tönyalnyi, ngaich fohtöre nö i nuk töfën sinkeukngö ök patī, fukngö ngaich angū-ö nö i kui yik ṙālö tarik, kapah yik nö ngaich; ngaich chū-ö höng hĕng tit tak töt kô-òngvah öich vë-eny nang meh.

²⁰Choholre ngaich Yōp, ngaich tikaichngö inyutre, kuhākngö kui re inrē, afukngöre ngaich nö el tumlat, ngaich salām.

²¹Nö ngö ṙô anga-aṅ, Töng chumlal chin yih ṙā-ang ellōn yöng re, chumlal hēk min öich havantöre, ngam Mā Tēv an kamë-eṅti, ngam Mā Tēv inrē kamë-anga; tökôlò an yēḵ ngam minënyö ngam Mā Tēv.

²²In u ang Yōp nö öt köölö fālen hēk öt afuk kui ngam Tēv tö tövaich.