Read Car_Nicobarese YŌP 11 Bible Online

YŌP 11 - Car_Nicobarese bible

YŌP 11

¹Ngaich sapṙô ang Sōfar aṅ Nē-amat:

²Kô-òre ön në töpōyen ṙô nö hökiṙen nö öt sāpka, ngòh tarik inrē töpōyen kum- lēḵ ṙô?

³Tahngö ṙô tarik öp nö kô töng takāka ṙô, hē meh minôn hang, öt hĕng tak hòng min sumrōngngö- kūö meh?

⁴Pò meh ngö ṙô, Het öp ṙô chu, löök chin inrē i kūö ngam Tēv.

⁵Ṙô-òv öre pöri ngam Tēv, nö vā-anykūöre nö in meh,

⁶Ngaich vë-eny nang meh öre anga-aṅ tö nup tönyatngö aṅ i mikah! Pò ò nö töṙōlkangen aṅ in tö mikah elmat. Akahalōn tö ngam Tēv nö kūöṅnen tī nö hateung fālen meh nö in meh.

⁷Kô öm kôtökūö tö nup tö- aṙūḵ aṅ im Tēv? Kô öm kôtökūö tö tölngö ngam Tökeuheūttöre Chö- ngö?

⁸Tulöng an töm halīöngö suh ap kanô-òṅ meh? Aṙū-uti tö Chūök Kupah, suh kanô-òṅ öm akah?

⁹Marôta ap ṙôkö e töng tum- lat, Pōiti inrē tö ngam mai.

¹⁰Yē ò nö chööḵngö e, kalong- hang inrē, havë-eti ngaich nö i kinṙôka, chīö tökô nö tahngen ò?

¹¹Pòn akahalōn anga-aṅ tö tarik töt kanôluṙô; hē ò nö meuk öt lanöökö, öt ngëichken e ang min?

¹²Kē mikah elmat re pöri min ngòh tökulō-ovö tarik, hē öp aṅ el inchōn köttö nö röichnyö kūön re tö tarik.

¹³Yē meh hachipngö ellōn re, hateutngö kël re më-eṅ kū-ötö in ò.

¹⁴Yē öt lanöökö nö eltī meh, kavalngö e marôvat, un hökiṙen öt lanöökö inrē nö iyöng el rūkui meh.

¹⁵Kô min më-eṅ hachônglö kūö re öm löök; köp min më-eṅ, ötpa-ekūö min inrē.

¹⁶Vaichngö min më-eṅ tö kanihten re; köpölōn min më-eṅ tö e nö sā mak tö ngaich nö hëmngö.

¹⁷Ap nômö meh min inrē nö mötlö yanāngö tö sakāmö; sinngūlö e min sā peuheū.

¹⁸Ngaich më-eṅ min nyatlö, pò öp mineūka nö umuh; laklöngö më-eṅ min heūheure inrē öt pinlāngenvö.

¹⁹Hulalngöre më-eṅ min, ngaich öt hĕng tak pumnëtö- kūö; maṙôngö min mahavëkö neū- kölōn meh.

²⁰Öt meuk pöri min nup mat tötlöök; öt kôtökūö cha-a min tö talöö- kö öt kanô-òngvah, öp kinsakngö kinpaha ma- heūṅkkö cha.