Read Car_Nicobarese YŌP 14 Bible Online

YŌP 14 - Car_Nicobarese bible

YŌP 14

¹Ngòh tarik töfötnyu tö kikānö töt ṙōl sumkam, tööḵngen inrē tö kanihngen.

²Sīöp an sā ṙòng chōn, nyang- ngö inrē; sā pinnyatngö nyat an, öt ngö- haka inrē.

³Ngaich më-eṅ hòng milaklö matre i tö ngatī kēten ò inrē im kinṙôka nö in meh?

⁴Chiāp tökô nö kētö tölöök nö ṙā-ang i tötlöök? Öt hĕng tak umuh.

⁵Pòn tö tölngu nup sakāmö ò, in meh inrē tum nòng chi- ngëṅt ò, tölngu tī më-eṅ inrē tö ò lökten ò nö ötkô nö vāngngö,

⁶Chingāngökūö re man tö ò, asökhang inrē pòn hōtu anga-aṅ nö kumchik- ngenre ip sakāmö ò, sā tö- ngöönka.

⁷Pò ngòh chōn nö maheūṅk- kuvö, yē ò nö fāngi, ngaich meuiny anga-aṅ hēk, nup lanaha ò min inrē nö öt ṙākenre.

⁸Pòrô öp ṙĕh ò nö köiny nö el tumlat, öp kaṙālö ò inrē nö kapah nö el tumlat,

⁹Sön i tinôngö öp mak anga-aṅ min nö meuinynyi rōi larāi köny pak inrē sā tö- ayal chōn.

¹⁰Kapah pöri tarik, ṙātu inrē nö lā taṙeū; mā-ang unhômöre tarik, ngaich isuh anga-aṅ?

¹¹Sā mak nö hö-öv nö el tö- rūngö chūökre, yëḵngen inrē tahël nö hëmngö ngaich nyôlö,

¹²Ngatī tarik hulalhaka öthēk nö chōholre; hanöng saha minë halīöngö nö öt ōtre anga-aṅ min nö aṅhen, hēk kilanglöngö nö ṙā-ang i inṙôhöre.

¹³Hanyatngen chu man öre el chūök kupah, hòṅ meh hayunngen chu ha- nöng saha ap lanīnö meh nö ngaich, hòṅ meh halēnngö ṙētak chu, fēken chu inrē!

¹⁴Yē tarik nö kapah, aṅ ang min nö hēk? Hòṅ höka chin irô-òtö nup sakāmö chu la-envö, hanöng saha ṙinānyö chu nö yih,

¹⁵Havë-a öre më-eṅ, ngaich öre chū-ö sapṙô meh; hòṅ meūkkö ap la-en minë kuntī re më-eṅ.

¹⁶Ngaich öre më-eṅ kaheuk tum vanāng chu, ngaich öt aṅtö tökööl chu;

¹⁷Haköpikūö öre ap tanôich- ngen chu nö el sāk, ngaich më-eṅ öre kahultökui öt lanöökö chu.

¹⁸Fukngö pöri ngam rôngö ngaich chahömi kē-ĕyö inrē ngam ihong nö ṙā-ang i chūök re;

¹⁹Hūönyngö tī ngam mak tö në ihong; hëmngö tī ngam töveut mak tö tumlat ngam panam; ngaich më-eṅ piyāingö ma- heūṅkkö ngòh tarik.

²⁰Höng kôhöre më-eṅ lā-al ò, kiröönngöre anga-aṅ ngaich; haṙīngö arëkūö ò më-eṅ, tīn- görit ò inrē.

²¹Yih yip kūön ò kikōnyö nö i ineū-euṅ, öt akahalōn anga- aṅ tö e; tumṙeūtu cha-a öt meūkö e anga-aṅ.

²²Höng akahngen chanökö alaha re anga-aṅ, höng haṙivhöre anga-aṅ inrē.