Read Car_Nicobarese YŌP 15 Bible Online

YŌP 15 - Car_Nicobarese bible

YŌP 15

¹Ngaich Ēlifas nö sapṙô ök aṅ Tēman:

²Kô ang ngòh tö-akaha tarik nö sapṙô mikah kuföt, hatööḵngenre inrē tö ngam ku- föt chuhöt?

³Kô ang nö kilṙô tötkanôluṙô, hēk i nup ṙô nup töng öt kanôlu ṙô?

⁴Ngaich pöri më-eṅ ṙāngö pin- hë-eṅkūö tö ngam Tēv, asānngö finëḵa inrē i kūö ngam Tēv,

⁵Pò ngam öt lanöökö meh nö haköp tö elvāng meh, ngaich më-eṅ atöllö litāk tö- mileuchngen ṙô.

⁶Vënyu fālen man töm elvāng re, rö-ö öich chū-ö; minë minuh meh nun maha- meuktöre nö lā-al meh.

⁷Më-eṅ ömeh raneh tarik tö fötnyu? Hēk fötnyu ömeh urĕh tö në rung?

⁸Hangihtöre öm i inlēnö aṅ im Tēv? Höng tölngö in meh ap mikah?

⁹Asuh ap mikahkūö meh öp tötmikahkūö ih? Asuh ap mikah elmat meh öp töt sehngöre nö in ih?

¹⁰Töpakū-uvkui hĕnghöre tö- köiny inrē yin vē in ih, mötlö kanöinyö tök yöng meh.

¹¹Tökūöṅnö öng ngam inṙam- lōn aṅ im Tēv nö in meh, hēk ngam ṙô lamök i töṙēm nö in meh?

¹²Kūöyòh öng ngam ellōn meh nö kēngöre tī tö meh, kūöyòh ön minë mat meh nö pachāla,

¹³Öm havööngö ellōn re lā-al ngam Tēv, hökngen tö ngatī ṙô inrē nö ṙā-ang elvāng meh?

¹⁴Suh ang ngòh tarik, nö tökô nö het? Hēk ngòh töfötnyu tö kikānö, nö tökô nö löök?

¹⁵Yĕh meuk, öt hanyatlöre an ngam Tēv nö in yip töhet in ò, öt het ngam halīöngö inrē nö i kūö ò:

¹⁶Höichngen ngòh mī-in sinòṅk- kūö chanôchö inrē, ngòh tarik amòk öt lanöökö nö sā mak!

¹⁷Hang ṙô chu, töich hameuk- hömat meh; vë-eny nang meh inrē tö ma- heūṅkre

¹⁸Nuk ṙô yik tö-akaha tarik, öthanyāti inrē tö yik yöng cha,

¹⁹yip tö kē-ĕvkūö töng panam, öt mahavāngtörevö aṅ tahëng nö in cha.

²⁰Löönyöre ön ngòh tötlöök tarik i chanököre irô-òtö sakāmö ò, i nup samyeūheu hinöngken töt milēḵ tī.

²¹Elnang ò nup ṙënṙô nganā- ngö; yih min nö in ò öp pumyāiha- nga ip kanôlò ò.

²²Öt ṙātö ellōn re anga-aṅ töre nö havannyu nö ṙā-ang el sinngūlö, asöltu anga-aṅ inrē nö i kūö sanët.

²³Marô-òlkūö anga-aṅ nö ki- röönngöre chööḵnyö tö nyā- aṅkūö, ngö ṙô, Isuh apa? Akahalōn anga-aṅ töp sakāmö sinngūlö nö lēn nö in ò;

²⁴Kanihngen mirīv inrē ngā- ngö tī tö ò; mihôiṅ anū-ö tö ò, sā öp rācha mahalēnöre nö i kinyū- ngö.

²⁵Pò ò nö hateutnyö kël re nö lā-al ngam Tēv, harāinyngö ngam Tökeuheūt- töre Chöngö inrē,

²⁶Lā-al ò nö fal nö öt tanmālen nö kufëyö lanaklö;

²⁷Pò ò nö kahulngökūöre tö tö sangööre, hamūlngö tösangöö inrē nö i ṙatre,

²⁸Iyöng töt aṅhavkūö elpanam inrē, el patī nup töt chūök tarik, nup tö hökiṙen nö taṙöli nö fônghaka;

²⁹Öthō öp min nö kôlò, ötköp inrē min nup kanôlò ò, Öt rēhĕn min anga-aṅ nö ṙĕh- töre nö el tumlat,

³⁰Öthō ap min nö öt kô-òng tö sinngūlö; nyangngökūö ap min tameūyö tö maneunynyö mat ò, heuingö min tameūyö tö ma- neuynyö mat ò.

³¹Uh an nö hayönglen re nö ip töt aṅhav nö hachīlöre; pòn invāhal nö in ò ngam töt aṅhav.

³²Urēhĕkūö ṙētak ò min angū-ö nö kētu nö tööḵlö, öt ayal min inrē ap pak ò.

³³Kiyinngö nup tö-öl nö ngāṅv, angkūr min anga-aṅ, nö sā ṙòng vāin, sukngö tö pöpnyīkūö inrē, sa chōn ôliv.

³⁴Pò ngam innôlö tötlöök nö töt aṅhav, tameūyö inrē mahaṙāpngö rū- kui raneushö minyôny.

³⁵Ellōn cha nup tötlöök ngaich kēnyö tötlöök nup ellōn cha inrē halēn inchī- lö.ʼʼ