Read Car_Nicobarese YŌP 19 Bible Online

YŌP 19 - Car_Nicobarese bible

YŌP 19

¹Ngaich sapṙô Yōp:

²Irô-òten öi min hakihten chu, likölngen chu inrē panyëny kūö ṙô yīö?

³Söm heuh yin ngaich kavaltö minṙēngö i kui chu; öt sirōngkūö öyih hachökö chu?

⁴Yē chu öre kô-en öich vaich, höngngöh nup vanāchö nö in chu.

⁵Yē yīö kô-en hapōilöre in chu, ngaich vīten ngam inyāchngö chu nö tinkākö ṙô yīö lā-al chu,

⁶Akahalōn yĕh tö ngam Tēv nö chōchö tī nö in chu, vintakūö inrē ngam inhāṅl ò nö in chu.

⁷Yĕh meuk, hūḵa chin, Chanökhuṙen! hö-ö pöri kamhòṅklukui.

⁸Lök el talöökö chu an, ngaich öt talööku chū-ö kiröönngöre, ṙātö sinngūlö inrē anga-aṅ el kanröönö chu.

⁹Leūchi ök kanôlò chu nö ṙā-ang in chu, kē-ĕyö inrē ök sapīöv nö ṙā-ang i kui chu.

¹⁰Āngöre lā-a tī anga-aṅ nö likölngen chu, ngaich ngaich chū-ö, sā tīre anga-aṅ nö nyòklö chōn tök maheūṅkkö chu.

¹¹Tōttökūö lanīnöre anga-aṅ nö lā-al chu, kaheukten chu inrē lā-al ò.

¹²Ṙongtö yīhih yik kumyung aṅ in ò; afônglö chūök re cha-a nö lā- al chu, havīlö rūkui inrē nö iyöngtöre.

¹³Ṙūöhöyö tö ò nö marôvat yik mak alaha chu, öt akahngöre kūö inrē tö chu yip hanöng kisānö chu tö chu.

¹⁴Mak alaha chu törööpta hol chu nö ṙāngen chu;

¹⁵Vaichngö tö chu yip i patī chu yamihökūö chu; aṅ tahëng chū-ö tö lōn yip tarik re kikānö; vītöre chin aṅ tahëng i kūö cha.

¹⁶Havëkö tarik re chin, öt sap- ṙô chu pöri anga-aṅ; holtö elvāng re chin hòṅ aṙētu ṙô vë-ekūö ò.

¹⁷Sa-òkkūö öp pīhö chu tö chu, tòk yip kikōnyö kūön öp ki- kānö yöng chu.

¹⁸Uroh kun nyīö nö mināch tö chu; yē chu chōholre chōchö ṙô ngaich cha-a tö chu.

¹⁹Sōḵen chu yip milālö hol chu, yip hanāngenlōn chu inrē havāngtöre nö lā-al chu.

²⁰Panta tangëḵ chin nö i uk alaha re, i alaha chu inrē, öt kô-òngvah chū-ö lökten i uk në kanap re.

²¹Aṙēten chu, aṙēten chu, Aō yī-ö hol chu, tön lūölka chin tö kuntī ngam Tēv!

²²Kūöyòh öi yī-ö, sā ngam Tēv, lūḵu chu? kūöyòh öi yī-ö öt tööḵngen töng alaha chu?

²³Aō kūichiyö nun öre në ṙô chu! Aō ka-iphötvö nun öre nö i mat līpöre!

²⁴Aō ka-īpi nun öre nö i kaha ihong nö örheūheu töp vët kanūich pirum inrē!

²⁵Pò chu akahalōn tö ngam ṙāmānyen chu nö aṅ, tö ò min inrē nö söklöre i kūö ngih tumlat;

²⁶Ngaich unôich yĕn ngaich öp uk alaha chu nö chahū-uyö, ngaich chū-ö min ing alaha re meuk ngam Tēv,

²⁷Ngam maheuṅk chu min nö ranghen chu, meuk min inrē në mat chu, rö-ö nö tahëngngöre. Lanyëyi öp ellōn chu nö lā tuhēt!

²⁸Yē meh ngö ṙô, Sitih inlahen öi min lūḵ an! In ò ap ṙĕh e inrē nö kôti;

²⁹Ngāngöre töm sanët; tön kumtö sācha aṅ im sanët an ngam lanīnö, pòi hōtu akahalōn töp inkaha fālen nö umuh.