Read Car_Nicobarese YŌP 2 Bible Online

YŌP 2 - Car_Nicobarese bible

YŌP 2

¹Hēk ök umuh sakāmö hē yik kūön ngam tēv nö yih nö hameuktöre nö i kūö ngam Mā Tēv, yihtöre inrē Satān nö in cha nö hameuktöre nö i kūö ngam Mā Tēv.

²Ngaich ngö ṙô ngam Mā Tēv tö Satān, Ṙeū-eung yih öm më-eṅ? Ngaich Satān nö sapṙô ngam Mā Tēv, Ṙeū-eung i kinröönköre chin i kūö ngam tumlat, ṙeū-eung i kinröönö inrē lātulöng lātaṙeū inrē in e,

³Ngaich ngö ṙô ngam Mā Tēv tö Satān, Ngëichkö öp tarik chu öm ang Yōp tö ò nö öt hĕng tak insā nö i kūö ngam tumlat, tötfāluṙen töchiplö inrē nö tarik, töpa-ekūö tö ngam Tēv havööngö kūöre inrē nö ṙā-ang i tötlöök? Ṙòngmöng köptī ap tö ngam tölöök in ò pòrô më-eṅ hōten chu lā-al ò, öich fëlngen ò höng öt chööḵnyu.

⁴Ngaich sapṙô ngam Mā Tēv Satān, Uk alaha ṙënngen tö uk alaha! Ṙòkhöre nup mī-in öp tarik min nö kētu tö ò nö ṙënngen nômö ò.

⁵Ṙā-angtīre pöri më-eṅ töngamuh, ngaich lūölkö tangëḵ ò alaha ò inrē, ngaich min anga-aṅ nö öt lēḵkôre tö meh nö i kūö meh.

⁶Ngaich ngö ṙô ngam Mā Tēv tö Sātān, Yĕh meuk, i minhôinyö meh apa; höng ṙālö ap nômö ò.

⁷Lökten Satān nö kiröönngöre nö ṙā-ang i kūö ngam Mā Tēv, ngaich hakihten Yōp tö sin-òkkūö vah alaha lök tökūö kintāl elröön söl el chalòngkui.

⁸Kē raktit tanīöyö ngaich anga-aṅ aṅtī ò nö kiyööhöre, ūichngöre ngaich nö i tisum.

⁹Ngaich ngö ṙô ök pīhö ò tö ò. Ṙòngmö köpti öm tö ngam lanöököre? Ötlēkö el nang ngam Tēv man yĕh, ngaich kapah.

¹⁰Ngö ṙô pöri anga-aṅ tö ò, Sā ṙô töhĕng tak man më-eṅ tökulō-ov kikānö öm ṙô-òv. Höng tölöökhöre taneūngen öi min eltī ngam Tēv, öt teūngen öi min inrē tö tötlöök? In u ang Yōp nö ṙòkhöre nö öt köölö fālen nö i minuh re.

¹¹Ngaich hē yik tölūöi tak hol yōp nö hang nuk tötlöök yamih nö in ò, kö ṙeūngö chūökre cha-a nö yih, Ēlifas ök aṅ Tēman, Piltat aṅ Sūh, Sōfar aṅ Nē-amat. Halēnlö ṙētak re cha-a nö yih nö haṙamkölōn ò hangëken ò inrē.

¹²Ngaich hē cha nö meūkan nö marôvat, öt akahakūö cha-a tö ò; peuiny cha-a ngaich nö pōitô; tikaichngö inyut re inrē cha-a tūi kui re inrē tö pitung nö kū-ötö el halīöngö.

¹³Ūichngöre cha-a ngaich nö in ò nö el tumlat nö sat sumkam sat mitööm inrē, öt hĕng tak töhĕng milôhò ṙô nö in ò, pò cha nö meuk ök kanihngen ò nö kiröngen.