Read Car_Nicobarese YŌP 20 Bible Online

YŌP 20 - Car_Nicobarese bible

YŌP 20

¹Sapṙô ngaich ang Sōfar aṅ Nē-amat:

²Lökten nup ellōn chu nö sap- ṙô chu, kūö chu kurāten ellōn.

³Hang innyôṅkökūö chin öp töchökhutī tö chu, ngaich löknyö mikah elmat chu öp ma-alaha chu nö sapṙô chu.

⁴Öt akahalōn öm tö ngih la- möktökūö misī, hēten tö ṙinātö tarik ing tum- lat,

⁵Tö ngam inpōilö tötlöök nö tö- cheūta, ngam ṙanāmölōn tötlöök inrē nö töng rahëchtaṙen?

⁶Pòrô öp rôlö ò nö söl i minë halīöngö, söllö öp kui ò inrē nö el taṙul.

⁷Ötkôlò min anga-aṅ sā sôḵre nö örheūheu; ngö ṙô min yip mameūkan, Isuh apa?

⁸Sā heūvö öp min nö kiteūngö- re, ngaich öt kôti: hòṅ lū-uyö ap min sā tö meūkö el hatööm.

⁹Ngam mat mameūkan min nö öt ōtre maheuṅk tö ò, ötrēhĕn min öp chūök ò nö ngöhören nö meūkan.

¹⁰I yāich min yip kūön nö chöh inṙētöre, havantö kanôlò ò min inrē nup kël ò.

¹¹Tööḵlö tangëḵ an tö kaneūṙö inyālö, hulalhak pöri min angū-ö nö hol ò nö el tumlat.

¹²Pòrô nö pachāka öt lanöökö nö elvāng ò, pòrô anga-aṅ nö hayunngö e nö elkatòh litāk ò,

¹³Pòrô anga-aṅ nö hòṅ ṙāngö e, mumkö e inrē nö elvāng ò,

¹⁴Sön nö el tilkup ò öp nyā-aṅ ò nö havāngtöre; tö-angūṅ pēch ap nö ellōn ò.

¹⁵Ngeūṅktö kanôlò an kuvav- lö u hēk: kavalnyö u ngam Tēv nö ṙā- ang el aich ò.

¹⁶Nyôṅk tö kapahukūö an nö i pēch; kapah an min tökūö litāk pēch.

¹⁷Öt hòṅ ngëichkö tahël an min, kumtö hönī, töhī inrē nö hëm- nyi mak.

¹⁸Kētö ṙòng lumrāre an min, ngaich rö-ö nö mīktö e: I nup taneūngen ò nö inyihkö chehen öt teūngen min anga-aṅ tö kumchiklōn.

¹⁹Pò ò nö kirāchngö, ṙāngö yāich inrē, kē patī an öp töt mahānlö ò.

²⁰Pò öp yanālö ò tö chehen nö öt akahakūö tö nginöhö, öt ṙahātu min anga-aṅ i nup kumchiklōn ò.

²¹Öt tö-ōtrevö tö kinheūṅtö kūö ò nö nyā; lökten öp kanôlò ò min nö öt köp.

²²Kihngen min anga-aṅ tö ṙô- ken tanööḵngenre; I kui ò min nö yih nup kumlēḵ kanihngen.

²³Tīntö tanānyöre min ngam Tēv nö in ò, nö hatööḵlö aich ò i kui ò angū-ö inrē nö chahūköti kumṙah nö nyā-aṅkūö ò.

²⁴Falngöre ap min nö ṙā-ang i kūö vët aṅtī; tafūnikūö min tö ò öp chòk mās.

²⁵Teuknyu min anga-aṅ, öt ta- lakköny kūö nö im alaha ò, meutnyi min nö ṙā-ang el tö- angūṅ ò öp tö-amëla kūö ò; yih pinhë-eṅkūö nö in ò.

²⁶Hinöngken ò sinngūlö nö chehen töpōi ṙāi; ṙāpngö min anga-aṅ tökūö ta- meūyö töt föölöngkūö; nup tö-ōtren el rūkui ò min nö ṙāpngö.

²⁷Hameuklö öt lanöökö ò min minë halīöngö, lā-al ò min tumlat nö chōholre.

²⁸Kē-ĕyö min nup el patī in- lānen ò, tūöki ip sakāmö lanīnö ngam Tēv.

²⁹Minchööḵö tötlöök tarik an angū-ö aṅ im Tēv, chöngö nö amin ò tö tī ngam Tēv.