Read Car_Nicobarese YŌP 21 Bible Online

YŌP 21 - Car_Nicobarese bible

YŌP 21

¹Ngaich Yōp nö sapṙô

²Ṙēmen hangihtö ṙô chu, hökngen e ngih nö inṙamlōn meh.

³Hamöiyöre in chu, töich ṙô- òvö, yē chu keuheūtö ṙô, minônngen e.

⁴I chu pöri, lā-al tarik öng ngam vahënyö chu? Kūöyòh öich min öt möi?

⁵Ngëichken chu, hòṅ re pi- ngangkūö, tilupngö elvāng chu inrē tö eltīre.

⁶Yē chu fēken e ngangngökūö chū-ö, kichëyöre inrē ngam alaha chu.

⁷Kūöyòh ang ngòh tötlöök nö ngöh, söllö i ṙētöre, sīöplö inrē i minhôiṅyö?

⁸I kūö cha yip kūön cha nö ngaich nö köp, meūkö tö cha yip kūön cha inrē.

⁹Öt pinlāngenvö patī cha nö i pinhë-eṅkūö, öt in cha inrē ngam chinökṙen aṅ im Tēv.

¹⁰Öt latôka sanīöpö kōiny nuā cha; rööich kan nuā cha, hö-ö inrē nö öt chumnööḵlö kanihnguṙen.

¹¹Rööichnyö kūön re anū-ö nö sā töhĕng kiteūm, kiṙīöm inrē nup kūön u.

¹²Tikökṙôre anū-ö nö i tem- pōrin lāir inrē, kuchik elnang inrē tö ṙô fanöö.

¹³I kanôlò re anū-ö nö keu- heūtngö sakāmö re, i kumchikṙen inrē nö chuh el anūlö.

¹⁴Ngö ṙô anū-ö töm Tēv, Kē- ĕngre tö ih! Hö-ö in īhö hòṅ akahalōn tö talöökö meh.

¹⁵Asuh ang ngam Tökeuheūt- töre Chöngö, töp lökten ih lök la-en ò? Suh öp kanôlò ih yē ih vë- ekūö ò?

¹⁶Yĕh meuk, öt eltī meh ap kanôlò u? Marôvat ap tö chu inlēnö tö tötlöök.

¹⁷Ām heuh innyangngö öng ngam ëāṅvö tötlöök? Tö lökten ngam ötkanôlò cha nö teung nö i kui cha? Tö ngam Tēv nö michööḵ chanökö i tanānyöre?

¹⁸Tö cha nö sā tönyô kiyôp i kūö kuföt, sā uk nëlö inrē nö heūingö tökūö chanôchö panam?

¹⁹Ngö ṙô më-eṅ, Hachūökngö öt lanöökö cha ngam Tēv in yip kūön cha. Hökngen ò nö havāhalre nö in cha, hòṅ cha nö akahalōn tö e.

²⁰Hökngen cha nö kôtamat nö meuk pinyāingöre, Hökngen cha inrē nö òk lanīnö ngam Tökeuheūttöre Chö- ngö.

²¹Suh piṙūtka öich tö patī re lā unôich tö cha, Yē nup nòng chingëṅt cha nö röki?

²²Hĕng tak hòng min maha- köptö ngam Tēv tö mikah, Yĕn Anga-aṅ kamhôṅkken yip aṅ lā tulöng?

²³Hĕng tak tökapah nö tööḵlö tö kanôlò re, keuheūtlöre i kumchikṙen öt pinlāngen inrē,

²⁴Tööḵlö alaha ò tö tösangöö nyôp inrē aṅ el tangëṅk ò.

²⁵Rīkre tökapah i miṙīv ellōn re, öt hĕng heuh nö kalah tökuchik.

²⁶Hulalhak cha-a nö hĕngren nö el tumlat, vinngö alaha inrē cha-a tö kamlökö.

²⁷Yĕh meuk, akahalōn chin tö lōn meh, tö meh inrē hòṅ hachōichngen chu.

²⁸Pò meh ngö ṙô, Isuāp patī kūön rācha? Isuāp rūkui chūök tötlöök nö iyöng?

²⁹Hö-ö öyih hatön yip el ta- löökö kumröön, rö-ö öyih inrē hō-o hameuktö cha,

³⁰Tö ngòh tötlöök tarik nö ṙālöngö ip sakāmö ötkanôlò, tö ò nö hayöökaṙen nö kē-ĕ ip sakāmö lanīnö?

³¹Chiāp vamë-eny talöökö ò nö i kūö ò, Achīö inrē mahavahal la-en ò nö in ò?

³²Hē ò nö chāttu nö el anūlö, aṅtu ngaich öp kui anūlö ò.

³³Kuchik nup pinkoho tilin ngam achāṙö nö in ò; ṙòkhöre tarik nö tömrit ò cha-a inrē yik mū-urēhĕkūö ò nö öt kanṙeūken.

³⁴Sitih inlahen öm me-eṅ min haṙamkölōn chu tötöng öt aṅhavö? Öt ōtre umuh sanap ṙô meh höng minyônyaṅ.