Read Car_Nicobarese YŌP 22 Bible Online

YŌP 22 - Car_Nicobarese bible

YŌP 22

¹Sap ṙô ngaich Ēlifas ök aṅ Tēman.

²Kô ang ngòh tarik nö kanôlu ṙô nö im Tēv? Kô-òngrit ön ngòh tö-akaha nö kanôluṙô nöng in re.

³Kumchīkulōn hòng nö im Tö- keuheūttöre Chöngö yē meh löök, hēk taneung hòng nö in ò yē nup talöökö meh nö öt vinë- ku?

⁴Kūö pinhë-eṅkūö meh öng tö ò lökten ò nö vëken meh, ngaich im inkaha fālen inrē nö hol meh?

⁵Röh öp öt lanöökö meh nö kiröng? Öt kinheūṅtu nup öt lanöökö meh.

⁶Pò meh hateung kinlēḵngô in yip hol re tö tötlöknyu, luhnyö hilā cha inrē nö chum- lal.

⁷Hö-ö më-eṅ kētö mak nö òk töchëi, ma-iṅ nyā-aṅkūöre më-eṅ inrē i tö kapahare.

⁸Ngòh tarik tö minhôiṅyuvö amīnu tö panam, ël e inrē ngòh tarik tö-aheuk- huvö.

⁹Tīnngörit tafīösi më-eṅ nöng chanlööp, liköli kël inrē yip kūön yōich.

¹⁰Lökten nup tinngöp nö havī- len meh, ötkô me-eṅ inrē tö pinhë-eṅkūö tö rötta yanīhi:

¹¹Sangūlī ap ëāṅvö meh, lökten meh ötkô meuk, chöptikui inrē më-eṅ tö tin- ṙēchlö mak.

¹²Röh ang ngam Tēv nö lā tulöng el halīöngö? Ngëichkö minë lātulöng ta- neūsömat i rô-òl chūök ön!

¹³Lökten meh ngö ṙô, Suh ap mikahlōn ngam Tēv? Kô ang nö akah fālen nö im tökufëi sinngūlö?

¹⁴Hanyātiyö an tö taṙul tökufëi, lökten ò nö ötkô nö meuk, lök elkatòh ngam halīöngö anga-aṅ inrē.

¹⁵Hòṅ haköp ngam hötṙen öm talöökö ngam lahök tötlöök tarik?

¹⁶Ngaich yik nö kichötiyö urēhĕkūö ṙētak cha: söichiyö ngaich ök chūök röön tö cha.

¹⁷Ngö ṙô cha-a töm Tēv, Kē- ĕngre tö chu, ane inrē, Suh kanô-òṅ ap Tökeuheūttöre Chöngö nö in ih?

¹⁸Sön nö anga-aṅ mahatööḵöl patī cha tö tölöök chehen marôvat pöri tö chu ngam in- lēnö aṅ i tötlöök.

¹⁹Meūkö e ngòh tölöök ngaich ṙāmölōn; minônngen u pöri ngòh töt akaha,

²⁰Ngö ṙô, Kô-òngvah yik lā-al hī nö rökiyö, nup chööḵṙen cha inrē ṙāpngö tökūö tameūyö.

²¹Ṙongtalōn im Tēv, lāmhak inrē; lökten in e min tölöök nö yih nö in meh.

²²Elvāng ò kē inköptöre, ellōn re tī inrē ṙātö nup ṙô ò.

²³Yē meh havantöre im Tökeu- heūttöre Chöngö hayāich- ngöre inrē, yē meh marôvat tī tö ngam rūkui meh öm ṙūöngö öt lanöökö.

²⁴Yē meh ṙātö humlum el tum- lat, humlum inrē aṅ Ôfir i nup ihong lā taṙeū töm mak,

²⁵Yē ngam Tökeuheūttöre chöngö inrē nö humlum meh,

²⁶Ngaich më-eṅ min kumchik- ngenre im Tökeuheūttöre Chöngö, môklö kūö re inrē im Tēv.

²⁷Vë-ekūö ò inrē min më-eṅ, hang ṙô meh min Anga-aṅ: Kētö töchūöku kinlēḵngô min me-eṅ.

²⁸Halēn lōn re me-eṅ min i la-en, ngaich angū-ö min nö köp nö in meh, hūkūö ëāṅvö min inrē el ta- löökö meh.

²⁹Pò ngam Tēv nö hayāichngö mahakeūṙöre, hayöölen yāich pöri Anga-aṅ.

³⁰Ṙānyö tarik an töt akahaṙa: ṙānyu man min më-eṅ lökten i lanöökö eltī meh.