Read Car_Nicobarese YŌP 27 Bible Online

YŌP 27 - Car_Nicobarese bible

YŌP 27

¹Hēk ang Yōp nö kaknyöre, nö ngö ṙô:

²Sā ngam Tēv nö tö-aṅ, ngam kamëngö kanahngen chu, ngam Tökeuheūttöre Chöngö inrē, vamītö nômö chu nö angūṅvö;

³I ṙô-òten unhôṅmö chu nö in chu, ngam ma-alaha inrē aṅ im Tēv nö elmeh chu;

⁴Öt ṙô tö minyônyaṅ min në i minuh chu, litāk chu inrē öt ṙôtö michīl min.

⁵Marôvat an tö chu yēḵ öich ngö ṙô tö meh huveū-en; hanöng saha chu kapah öthòṅ ṙāngö ngam hinëngö chū-ö min nö ṙā-ang in chu.

⁶Haköptīre chin tö ngam lanöö- kö chu, öt hökngen e inrē nö kiröönngöre; öt miṙēngen chu an ngam ellōn chu i në sakāmö chu.

⁷Hökngen ap lā-al chu nö sā tötlöök, hökngen ò inrē öp chamôhòlre nö lā-al chu nö sā tötlöök.

⁸Suh ṙòng ap maheūṅkkö ngam tötlöök yē ngam Tēv nö rök- ngen ò, yē ngam Tēv nö kēngö nômö ò?

⁹Hang ṙô ò ang min ngam Tēv, yē kanihngen nö yih nö i kui ò?

¹⁰Kuchīkö lōn ang min nö im Tökeuheūttöre Chöngö? Örheūheu ang min nö havëkö ngam Tēv?

¹¹Hòṅ haköpten meh chin tö inlahen kël ngam Tēv; hö-ö chin hòṅ hayunngö öp mī-im Tökeuheūttöre Chö- ngö.

¹²Yĕh meuk, ṙòkhöre yin yī-ö ngaich meūkö e; kūöyòh öi keuheūtngöre vīten re höng tötöl?

¹³Ngih ön minchööḵö tötlöök tarik nö im Tēv, amin ngòh mahakihten inrē taneūngen aṅ im Tökeuheūt- töre Chöngö:

¹⁴Yĕn ṙūölöre ṙôngö yip kūön ò, pòḵ sanët min; öt kô-òrekūö nö nyā inrē yip kūön ò.

¹⁵Yip tö-ōtren nö aṅ: lāpi tö invah tölëlngökūö, öt harāmö cha inrē yip tafīösi cha.

¹⁶Pòrô ang-aṅ nö afônglö ru- pīö sā tumlat, afônglö hilā inrē sā tilin;

¹⁷Afônghöl ap nö kô-òren yip tölöök pöri min kamfānöre tö u, michööḵö re inrē min töt akahaṙa tö rupīö.

¹⁸Höng sā haveūngö kilrööngö öp patī mahānlö ò, sā sanrā vahīlö öp amahati.

¹⁹Kôlò anga-aṅ nö chuh el chamam re, hö-ö pöri min nö ōtren nö ngatī; milaklö matre anga-aṅ, chaṙēv ngaich ök kanôlò ò.

²⁰Sā ṙanööingö öp pinhë-eṅkūö nö kô-òl nö in ò; keūni anga-aṅ tö hatööm tö lamfeui kuföt.

²¹Chātlen ò ngam kuföt chuhöt, chaṙēv ngaich anga-aṅ; fòhngen ò angū-ö nö ip chūök ò.

²²Öt aṙē-ĕvlōn angū-ö nö afuk- töre nö in ò; falngöre anga-aṅ tö kumlēḵ e nö chipngö kū-ö.

²³Fatāk eltī re angū-ö nö in ò, ṙā-ang ip chūökre inrē nö foh- töre nö in ò.