Read Car_Nicobarese YŌP 3 Bible Online

YŌP 3 - Car_Nicobarese bible

YŌP 3

¹Unôichrit e ang Yōp nö vā-anykūö re nö rūtngövah ök sakāmö hē kinyôḵnyö ò.

²Ngö ṙô ang Yōp:

³Hökngen ök sakāmö nö ök kôlò hē chu fötnyu, Öp hatööm inrē tö ngö ṙô, Hĕng tak öp tarik nyīö tö pirūka.

⁴Hökngen öp sakāmö angū-ö nö sinngūlö! Un chöhö e yēḵ ngam Tēv lātulöng, Un rēhĕn hanātö nö yang nö i kui e.

⁵Hökngen öp töchēv tökufëi sinngūlö nö hayōmö e. Hökngen taṙul nö iyöng kui e; hökngen sanāha ngam sakāmö nö pinhëṅkö e.

⁶Ap hatööm angū-ö hökngen öp tökufëi sinngūlö nö kē-ĕ e! Un ṙāmölōn an yēḵ nö i nup sakāmö ngam samyeūheu, Uh an yēḵ nö yih nö i tum nòng nup chingëṅt.

⁷Hôṅ, hökngen ngam hatööm nö töt aṅhaṅvkūö; Un hāngö yēḵ ṙanāmölōn ṙënṙô nö in e.

⁸Hökngen cha nö öt lēkôre tö e yip tötlamëkôre tö ngam sakāmö, Yip töhuveū-en nö harötlö ngam tökiröng kāv.

⁹Hökngen nup taneūsömat, yūöng peuheū nö sangūla; hökngen e nö meūkkö hanātö, hö-ö pöri nö teūngen, un rēhĕn nö meuk minlīöchlö ngam peuheū;

¹⁰Pò e nö öt löpngökūö inkūp chūök kanūönö ök yöng chu, Öt rēhĕn nö hanyatngö kanihngen nö i mat chu.

¹¹Kūöyòh öich öt kapah tö finötnyö re, meutnyi ṙā-ang el chūök kanūönö ngaich kapah?

¹²Kūöyòh ön minë kinmônö nö höngö chu? Hēk kūöyòh minë teh öich hōtu pōḵ?

¹³Tön ngaich chin öre hulaltöhëch chēvhakṙen; Ngaich chū-ö öre haṙòh; ha- ehangṙen ngaich öich heūheure,

¹⁴Hol yik rācha tö yik mahalēn ngih tumlat Yik mamānlö kuire tö töng taṙöli,

¹⁵Hēk hol yik kūön rācha töhumlūmu, Yik mahatööḵlö patī re tö rupīö.

¹⁶Hēk kūöyòh öich misī öt sā töhanyati töt hē finöt- nyöre, sā tënö nyīö tötma- meuk hanātö?

¹⁷Umuh tötlöök nö ṙā-ang re nö hakihten, Umuh inrē töchei nö heūheure.

¹⁸In e yip kaitī nö kuchīken; Öthang ṙô yip yōm la-en cha-a.

¹⁹Tökūönö tökiröng inrē umuh, Öp töhakövö inrē nö ṙānyu- vö nö ip yōmre.

²⁰Suāp hanātö tökētu nö in ò, ngam më-el tökihngen, nômö inrē nö im töhaṙīvölōn,

²¹Chiāp mameūkkö kinpaha, öt yih pöri angū-ö, amulkö e inrē nö mötlö tö tönyatngö töpōi ṙāi chehen;

²²Chīāp töyahlö ṙanāmölōn, Yē cha nö kôtökūö töm anūlö?

²³Kūöyòh öng ngam hanātö nö kētu nö i tarik öp tönyat- ngö talöökö, öp tökalōngi tö ngam Tēv?

²⁴Pò ngam miṙīv chu nö yih sā ngam nyā-aṅkūö chu, minë inluhu chu inrē sā mak nö pòpnyi.

²⁵Pò ngam pinhë-eṅkūö chu nö yih nö in chu, ngaich pa-ekūö chū-ö tö lainy- ngenre.

²⁶Hö-ö chin kuchīken, ötrēhĕn chin ṙēm; Öt haneūheuvö chin, yih pöri ngam kanihngen.