Read Car_Nicobarese YŌP 30 Bible Online

YŌP 30 - Car_Nicobarese bible

YŌP 30

¹Ngaich pöri cha-a töngamuh nö minônngen chu, yip tarik ṙālö tö chu, yip tö yöngu tö yik töt hakūöken chu öre töng ṙātu nö i nuk am pököre chu.

²Suh ap öre taneūngen chu i kumlēḵ kël cha, yik tarik töchuhngöre kaneūṙö nö ngaich?

³Kūö hanāten kinpahare inrē cha-a nö kapkö tönyô töt aṅhav tumlat;

⁴Köich malōv cha-a rōi kun chōn inrē, haṙāichköre cha-a inrē tö rĕh nup fanòh.

⁵Ahōri cha-a nö ṙā-ang i tarik; hūḵ-ngörit cha achā-a nö sā mu-ulāya.

⁶El talöökö mak töhëm cha-a nö iyöng, el manëngö tumlat ihong inrē.

⁷El-inchōn cha-a nö hūḵa ṙô; el katòh töchökhu cha-a nö kirōtngöre.

⁸Töt akaha, kūön töt akaha, fōnhoyö yik nö ngaich nö ṙā-ang im panam.

⁹Vītöre chū-ö töngamuh tin- kökö cha, kūöngô cha chin.

¹⁰Sa-ôkhen chu yin, ṙūöhöng re yin tö chu; öt sōḵ yin nö kösnyö kūöre yĕn meūkö chu.

¹¹Pò ngam Tēv nö tiyōlnyö ngam tökuvāha chu hayāich- ngen chu inrē, kavalngö milēḵṙen re yin nö i kūö chu.

¹²Lā hāmö chu tumṙōllen nö chōholre, ahōngen chu yin, harunglöre yin nö lā-al chu nö piyāingen chu.

¹³Tiṙōlngö talöökö chu yin, ṙūölö öt kanôlò chu yin; öt hĕng tak tamahngen cha.

¹⁴Sā lamöknyö el töpōitikūö tömëngö yin nö yih; ellōn öp tö taṙöli cha-a nö iṙūöhöröön.

¹⁵I kui chu nup pinhë-eṅkūö sā tölūḵu tö kuföt ap ineū-eu chu, sā chanūhu taṙul inrē ök ka- nôlò chu nö ngaich.

¹⁶Ngaich ök ellōn chu tönga- muh nö hëmnyi nö lā tuhēt chu; köptī an ngam kanihngen tö chu.

¹⁷Chiṙeūchnyö tangëḵ chu an ngam hatööm, ötheuhtöre inrē ngam chanökö nö kulīhi chu.

¹⁸Kalē-ĕkūö angū-ö nö teuch ngam hilā chu: nyëkö chu an sā likeun inyut chu.

¹⁹Suktu chin töm Tēv el tilin, vītöre chū-ö ngaich sā pitung tisum inrē.

²⁰Havëken meh chin öt sap ṙô chu më-eṅ; sökhak chin, ötkūöten re më-eṅ tö chu.

²¹Havāngtö öt milēḵ man in chu; aṅtī tö kulēḵ këlre më-eṅ öt hakôlò chu.

²²Hatāilen chu man el kuföt, vīten chu më-eṅ i uk e, kavallen chu më-eṅ el ṙô chanôchö panam.

²³Hôṅ, akahalōn chin tö meh min kēten chu im kinpaha, ip patī inrē lööṙö yip tö-aṅ.

²⁴Sönngenre hòng nö öt hĕng tak i nup töfông tö tiṙōli mahateutnyö kël re, mahavëkö holre inrē ip ka- nihngen ò?

²⁵Röh öi ṙung peūnyan öp tökihngen? Öt haṙīvölōn öich ṙung tö yāich?

²⁶Hē chu pöri meūkkö tölöök, chalô ngam tötlöök; hē chu hökkö hanātö inrē chalô sinngūlö,

²⁷Kalūöchöre öp ellōn chu, öt hētu nö ṙēm; höngkūö chu nup sakāmö kanihngen

²⁸Sah chin havötköre, ötkūö tavūöi pöri; söklöre chin el manūlö, havëkö holṙen re inrē.

²⁹Mak alaha am chin aṅ el inchōn, mahanôl òsrich inrē.

³⁰Vītöre uk alaha chu nö sah aleūchiyö nö ṙā-ang in chu, ökngö nup tangëḵ cha tökūö ṙanāchö,

³¹Ṙô tö miṙīvlōn öp lāir chu, ṙô pameuny inrē ap fanöö chu.