Read Car_Nicobarese YŌP 32 Bible Online

YŌP 32 - Car_Nicobarese bible

YŌP 32

¹Lökten vē tölūöi tak tarik nö ṙāngôre nö sapṙô Yōp, pò ò nöng tölöök tölōnre.

²Kētöre ngaich Elihū nö tainy ök kikōnyö kūön Parakel aṅ Pus, aṅ i mupīhö Ram, tainy anga-aṅ tö Yōp pò ò nö löök tölōnre nö mötlö tö ngam Tēv;

³Tainy inrē anga-aṅ nö in yik tölūöi tak hol Yōp pò cha nö öt kôtökūö tö sanapṙô, pòrô cha-a nö ngaich nö ṙô-òv tö Yōp nö vaich.

⁴Höng hökkenre ang Elihū nö vë-ekūö Yōp pò cha nö köiny tö ò.

⁵Ngaich hē Elīhu nö öt maheūṅkuvö tö sanapṙô elvāng yik tölūöi tak tarik, kētöre anga-aṅ nö tainy.

⁶Sapṙô ngaich Elīhū ök kikōnyö kūön Parakel aṅ Pus: Ayal chin i samyeūheu, köiny inrē më-eṅ; lökten chin piyū-en pa-ekūö inrē öich vë-eny kuilōn re in meh.

⁷Ngö ṙô chin, Hökngen nup sakāmö nö ṙô-òv, ṙōl samyeūheu inrē haköptö mikah.

⁸Öp ma-alaha pöri i tarik, öp unhômö aṅ im Tökeuheūt- töre Chöngö, vamīten ò nö akaha elmat.

⁹Rö-ö an nö ngam tököiny tö-akaha, öt rēhĕn ngam tö mā-aṅ ṙēti tö-akaha elmat tö töchip.

¹⁰Lökten chin ngö ṙô, Hangihtô chu; höknyô chu inrē vënyö kuilōn re,

¹¹Yĕh meuk, hökkö ṙô meh chin, hangihtöre chin tö nup ṙô tö akaha in meh, i saha meh chöh ṙôre.

¹²Hangihtöre chin, yĕh meuk, öt hĕng tak umuh ma-ahôngô Yōp hēk samap nup ṙô ò, in yīö.

¹³Haṙēmngenre hòṅ yīö öt ngö ṙô, Kôtökūö in tö mikah; ngam Tēv an töt kô-òti tö ò, öt tarik.

¹⁴Löö in chu nup ṙô ò, ngaich chū-ö öthòṅ sap ṙô ò tö nup ṙô yīö.

¹⁵Ötkô yin nö ngaich, ṙāngôre yin nö sapṙô; öt hĕng tit milôhò ṙô yin nö inre.

¹⁶Höka öich pökeh, tökūö cha nö öt ṙô-òvö, pò cha nö sökhak nö umuh, öt hēk nö sapṙô?

¹⁷Hòṅ kētö sanapṙô chin chū-ö; vënyö öp kuilōn re inrē.

¹⁸Tööḵlö chin tö ṙô, hōten chu ap ma-alaha in chu lātuhēt.

¹⁹Yĕh meuk, sā vāin ap ellōn chu tötlöknyuvö; sā tufömngöre uk chūök vāin, töhòṅ lakukköiny kūö.

²⁰Hòṅ ṙô-òv chin, ngaich möl ṙātöre lōn; hòṅ löpnyökūö minuh re chin sapṙô inrē.

²¹Hö-ö chin min hameuktö in- töllen i töng tarik hēk öt harōi töng tarīka.

²²Pò chu öt huveū-en harōilu, yĕich ngatī öre öt ōt chū-ö ngaich tö tī ngam vamī-i re.