Read Car_Nicobarese YŌP 33 Bible Online

YŌP 33 - Car_Nicobarese bible

YŌP 33

¹Yĕh pöchö, hangṙô chu, Ō Yōp, hangihtöre inrē tö në ṙô chu.

²Yĕh meuk, vā-ainykūöre chin; ṙô-òv an ngam litāk elvāng chu.

³Vënyö chanīpö ellōn chu minë ṙô chu, kô-òṙô nun në minuh chu tö mikahlōn re.

⁴Vī-i chu an ngam ma-alaha aṅ im Tēv, kētö nômö chu inrē ngam nômö aṅ im Tökeuheūttöre chöngö.

⁵Sapṙô chu, yĕm kô; halēnngö nup ṙô urĕh tö chu; sökhakṙen më-eṅ.

⁶Yĕh meuk, sā meh chin chū-ö lā im Tēv; aṅ i tilin chin chū-ö inrē vīlöngö,

⁷Yĕh meuk, uh chin pahë-evö tö meh; hö-ö man min langan tö tin- ṙāmöre tö chu.

⁸Kô-en, nuk ṙô meh nö elnang chu, ngaich chū-ö hang ṙënṙô nuk ṙô meh.

⁹Öm ngö ṙô, Löök chin, öt tanôichnguṙen; het chin öt tököölu in chu.

¹⁰Yĕh meuk, chöh löknyö chööḵnyöre an nö lā-al chu, kaheukten chu an tökunyaha elmat tö ò’

¹¹Halökngö kalröön chu an, aṅtö në kanröönö chu inrē.

¹²Yĕh meuk, öt huveū man in e, hòṅ sapṙô meh chin kiröng an ngam Tēv tö tarik.

¹³Kūöyòh öm hòṅ lā-alkūö ò, öm ngö ṙô, öt hēngö sahap an min tö ṙô chu?

¹⁴Pòn ngam Tēv nö hēngö talöö- kö ṙô, nët inrē, pòrô tarik nö öt meūkö e.

¹⁵I heūvö, i mineūkö tö hatööm, yē tarik nö lapat nö haṙòh, yē cha nö haṙòhlö nö el chamam,

¹⁶Löpnyökūö elnang tarik anga-aṅ, pinhëtökūö cha inrē tö intūitö elnang,

¹⁷Pòn hòṅ havööngökūö tarik anga-aṅ nö ṙā-ang ip la-en ò, rökngö inkeūlen inrē nö i tarik;

¹⁸Haköpngö ngam nômö inrē nö ṙā-ang el Anūlö, ngam nômö inrē ṙā-ang im kinpaha tökūö sanët.

¹⁹Chöken ön ngòh tarik inrē töchanökö nö el chamamre, hōlu inrē tö tö-īṙūöhen kanih- ngen i tangëḵ ò;

²⁰Lökten öp nômö ò nö sa-òkhö nyā-aṅkūö, sa-òkhö tökuchik nya-aṅkūö öp chūök nyā-aṅ ò.

²¹Lëvngö ngaich ngam alaha ò ngaich öt maneūken; nup töt meūkö tangëḵ ò inrē nö kööinyi.

²²Ngaich öp nômö ò nö haröh Anūlö, in cha inrē öp nômö ò yip kamëtö kinpaha.

²³Yĕn ma-ahānga öre öp in ò, vamë-elkui, hĕng tak i tököṅnyu, vamë-eny nang tarik töp tö- löök in ò;

²⁴Tö aṙē-ĕlōn an anga-aṅ tö ò, nö ngö ṙô, Ṙānyen ò ṙā-ang el Anūlö, kôtökūö chin ngaich tö ṙāi;

²⁵Hökngen öp alaha ò nö vītöre nö tumfömngöre nö ayal; hökngen ò nö havan nuk sakā- möre nö ayal nö keū;

²⁶Vë-ekūötēv ngaich ngam ta- rik, hō-o ṙô ò ngaich anga- aṅ, i kūö ò ngaich anga-aṅ nö ṙamölōn nö yih. Kaheuk inyööken anga-aṅ nö i tarik,

²⁷I kūö tarik ngaich ang-aṅ nö tikökṙôre, nö ngö ṙô: Köölö fālen chin, hachōichngö töchip inrē, öt havëka angū-ö nö in chu.

²⁸Ṙānyö nômö chu an ṙā-ang i chinūhuh el Anūlö, meuk ëāṅvö ön min ngih nômö chu.

²⁹Yĕh meuk, tī ngam Tēv nun anū-ö, nët heuh, lūöi heuh, nö i tarik,

³⁰Nö invānö nômö tarik nö ṙā- ang el Anūlö, pòn hōten ò nö meuk ëāṅvö nômö.

³¹Ō Yōp, kūöten re hang ṙô chu, un ṙô-òv, töich ṙô-òvö chū-ö.

³²Yē meh, ṙahôyu, sapṙô chu; ṙô-òv, tön hòṅ halöökö meh chin.

³³Yĕm rö-ö, hangihtö ṙô chu; um ṙô-òv, hòṅ chu haköpten meh tö mikah.