Read Car_Nicobarese YŌP 34 Bible Online

YŌP 34 - Car_Nicobarese bible

YŌP 34

¹Ngaich ngö ṙô Elihū:

²Hang ṙô chu, yī-ö tö-akaha tarik, kētö elnang re in chu inrē, yī-ö tö-akahalōn;

³Tön kalah ṙô an ngam elnang sā ngam el mirālö nö kalah nyā-aṅkūö.

⁴Tā-a töi atöllö töchip; tā-a töi in re tī töp tölöök.

⁵Tön ngö ṙô an Yōp, Öt fāluṙen chin, kēngö mikah chu pöri ngam Tēv;

⁶Nö pòrô ngam mikah chu kaheuktu chū-ö töminyôiny- aṅ; öt hanlanken an ngih vah chu, pòrô chū-ö öt tanôichnguṙen.

⁷Chiāp tarik tö sā Yōp, öp amòk nāichngenre nö sā mak,

⁸Öp kumröönngöre nö hol töt- löökö la-en kiröönngöre inrē nö hol tarik tötlöök?

⁹Pòn ngö ṙô anga-aṅ, Öt kanô- luṙô ön ngòh tarik töp lökten ò nö kumchikngenre nö im Tēv.

¹⁰Lökten, hang ṙô chu, yīö tö-akaha elmat tarik, öt röhta an yēḵ nö im Tēv ngam lökten ò nö la-evṙen tö tölöök, im Tökeuheūttöre Chöngö inrē ngam lökten ò nö la-evṙen tö tavaich.

¹¹Pòn sā la-en ngam tarik anga- aṅ nö havë-a nö in ò, sā nup talöökö ò inrē anga-aṅ min nö afuk kui ò.

¹²Kô-en, ngam Tēv nö öthō nö la-evṙen tö tötlöök, ngam Tökeuheūttöre Chöngö inrē öthō nö hachōichngö töchip inkaha fālen.

¹³Chiāp kamëtö chöngö ò nö hayōm ngih tumlat chiāp inrē mahakeunlen ò töng panam nö ṙòkhöre?

¹⁴Yē ò öre nö havan ngam ma- alaha nö in re, hamūl unhômö inrē nö in re,

¹⁵Ṙongngen öre në alaha nö öt kôlò, havantöre inrē tarik nö pitung.

¹⁶Yē meh aṅhaṅv-in tö mikah elmat, hang ngih, hangihtöre tö ṙô chu.

¹⁷Hĕng tak hòng min sumrīkhö töchiplen mahayöng? Kētö sācha ò öm min öp tö- löök tökalēḵ inrē,

¹⁸Öp tö ngö ṙô tö rācha, Töt kanôluṙô, Tö mā inrē, Tötlöök tarik;

¹⁹Öp töt atöltuṙen tö kūön rācha, öt rēhĕn nö kūöngenre tö tö- kôlò nö mötlö tö yāich, pò cha nö ṙòkhöre nö vahī kuntī ò?

²⁰Öt rô-òtuṙen cha-a nö kapah kichëyöre yip tarik tö chūöl hatööm chaṙēv ngaich, kē-ĕyö inrē tökalēḵ tö töt kël tarik.

²¹Pò nuk mat ò nö el talöökö ngam tarik, meuk nup vanā- ngö ò inrē anga-aṅ.

²²Öt chanëvu hēk tökufëi sin- ngūlö chūök yip töla-evṙen tö tötlöök nö hayunngöre.

²³Pò ò nö öt halēnngen ṙētak i töhĕng tak tarik nö chuh i kūö ngam Tēv im inkaha fālen.

²⁴Liköl tökalēḵ an nö öt chöhlö fālen, asöklen tahëng inrē nö i chūök cha.

²⁵Ngatī, akahalōn töla-en cha, afatlen cha an tö hatööm, panyāṅchi cha-a ngaich.

²⁶Fōho cha anga-aṅ kūö öt lanöökö cha i kūö tarik,

²⁷Pò cha nö kānngöre tö tinöö- mörit ò, öt hēngö chumkūöṙen inrē tö nup talöökö ò,

²⁸Lökten cha nö vītö ṙô yip yāich nö yih nö in ò, hang ṙô töhakihtuṙen inrē anga- aṅ

²⁹Yē ò nö chēvhaka, chīö tökô nö kētö sācha? Yē ò nö hayunngö kūöre, chīö tökô nö meūkan, pòrô nö pumnāmö tarik hēk tarik?

³⁰Tö ngam tötlöök tarik nö ötkô nö hayöng tö ò inrē nö öt hōtu nö tinngöp tarik.

³¹Hĕng tak hòng ngaich tö ṙô töm Tēv, Ngaich chin chöken; hö-ö chin hēk hòṅ fāluṙen,

³²Haköpten chu töp töt ma- heuṅk chu; yē chu ngaich köölö fālen, öt kēken e chin min hēk?

³³Ngaich hòng anga-aṅ min nö ṙā-al sā lōn meh, pò meh sōḵ tö e? pòm me-eṅ ma-atölhölö öt chū-ö; lökten yĕh ve-eny öp mikahlōn meh.

³⁴Ngö ṙô yip min tö chu tö akaha elmat tarik, ngö ṙô min inrē öp hamang ṙô chu tö akaha tarik:

³⁵Höng ṙô-òv ön Yōp nöng öt akaha, hö-ö nup ṙô ò nö tömeūkö.

³⁶Kalaha ön öre Yōp söl ip manā-aṅ, pòṅ sā ṙô tötlöök tarik nö sapṙô.

³⁷Pò ò nö ṙūöten minôṙô nö i tökööl re; fatāk eltī re anga-aṅ nö in hī ṙūölö ṙôken ṙô re inrē nö lā- alkūö ngam Tēv.