Read Car_Nicobarese YŌP 38 Bible Online

YŌP 38 - Car_Nicobarese bible

YŌP 38

¹Ngaich ngam Mā Tēv nö sapṙô Yōp nö löktö el lam- feui kuföt:

²Achiāp anga-aṅ sumngulngö inlēnö lökten i ṙô töt akaha?

³Hamöplöṙat re man sā tarik, hòṅ hatönömeh chin, ve-eny nang chu min me-eṅ inrē.

⁴Isuh öm misī hē chu ṙātö chūök rööntö ngam tumlat? Vë-eny nang chu, yē meh akaha elmat.

⁵Achiāpa mahalēnlö ṙôkö e Akahalōn man! Hēk achīö ap mahateutngö tö- kuvaha nö i kui e?

⁶Chūöktö yòh öp rööntö e nö ultu, hēk chiāp ṙamātö Ihong sin- keukngö e,

⁷Hē nup misāha peuheū nö holṙô re nö tikökṙôre, ṙòkhöre inrē yip kūön ngam Tēv nö hūḵa nö ṙāmölōn?

⁸Chiāp amöpngökūö ngam mai tö inkūp, hē e nö pòpnyi nö ṙā-ang el chūök re;

⁹Hē chu vī taṙul nö inyut e, tökufëi sinngūlö inrē nö la- nömngö e,

¹⁰Vīngö tölngö e inrē, asöklö inrāhkūö inkūp e inrē,

¹¹Öich ngö ṙô, Ngö tölngö man yih, um ṙūhötre, ihih inrē min ngam mahūvö meh mahakeūlenre nö sök- ngöre?

¹²Më-eṅ öm töchöngu tö peu- heū ik ranehlö sakāmö meh, tī-iv inrē tö minlīlö peuheū nö akah chūök re,

¹³Hòṅ e nö ṙapngö tīre nö i kinhôi ngam tumlat, kichënyi inrē ngam tötlöök nö ṙā-ang e?

¹⁴Haṙīngöre an sā tilin el katòh ngam tö katāntu mirūnmat an inrē sā hilā.

¹⁵Haköpi an ngam hanātö cha nö ṙā-ang i tötlöök, laköli inrē nuk töhachông hēk kël cha.

¹⁶Ngaich öm ṙung meuthöt i nup töpöklö mak el mai, hēk lök im chūök tö aṙū nö havanritre?

¹⁷Hameuktu nup nö in meh inkūp kinpaha? Hēk ngaich öm meuk nup inkūp tö-aṙū sinngūlö?

¹⁸Akahalōn ömeh tö ṙôkti ngih tumlat? Vë-eny, yē meh akahalōn tö u.

¹⁹Isuāp talöökö öp chūök ha- nātö, isuāp inrē chūök sinngūlö,

²⁰Hòṅ meh kēngö e ip panam e hòṅ meh inrē akah kanröönö ip patī e?

²¹Akahalōn man, pò meh ngaich fötnyu hē e, pōyen inrē nup sakāmö meh!

²²Ngaich öm kuhēthötre el chūök chehen tökënngöre ta- cham, hēk ngaich öm meuk chūök chehen tökënngöre kumṙah,

²³Nup ma-inken chu hanöng hē öp kanihngen, hē sakāmö kinyūngö?

²⁴Asuh ap talöökö tökū-ötö ip chūök hanātö nö meutlö, hēk isuh ngam kuföt chuhöt nö pirāti nö i kui ngam tumlat?

²⁵Achiāp vamī talöökö hanëmö kumṙah, talöökö öp tökalēk kunṙôkö inrē,

²⁶Nö kumtö kumṙah i panam töt aṅhaṅv tö tarik, elnyalnyi i chūök törö-ö tarik;

²⁷Nö hatööḵngen töt kôlò kūö panam, vīten ngam tumlat inrē nö sīöplö kiyôp?

²⁸Yöngu öng ngam kumṙah, hēk achiāp mahakūöntö kin- tākö tacham?

²⁹Löknyö el chūök kanūönö chīö ngam tökënngö mak nö meutnyi, chiāp inrē famötnyö tökënngö- re tacham ngam halīöngö?

³⁰Vīngöre mak nö ngëḵ sā ihong, kënngöre kui inrē ngam tö-aṙū.

³¹Kô ömeh kapòkngö sayōk minë Plēyātes, hēk luhlö kinpòk öp Ôriön?

³²Kô ömeh hachōḵ Masaròt ip hē u, hēk kô ömeh hachōkūö Për tö nup kūön ò?

³³Kô öm akahakūö tö nup chöngö ngam halīöngö? Kô ömeh haköpngö nup chöngö u nö el tumlat?

³⁴Kô ömeh söl el taṙul ṙô hū-a, hòṅ meh öt kahultöre kui tö ṙanööingö?

³⁵Kô ömeh tīnngö hanyāṅlö, hòṅ u nö kiröönngöre ngaich ngö ṙô tö meh, Ihih in īhö?

³⁶Achiāp chamaphöt mikah nö el minë taṙul, hēk kamëtö mikah elmat nö i minë pinṙeūmö?

³⁷Chiāp tökô nö kaheuk taṙul nö lökten i mikah? Hēk chiāp tökô nö hatul uk chūök mak ngam halīöngö.

³⁸Yē ngam pitung nö patūilöngö nö mūlngö mūlngöre ngaich ngam tumlat nö panhen höö?

³⁹Kô ömeh hacheū kāḵ lāyön, hēk hatööḵngen nup kūön lā- yön,

⁴⁰Yē u nö fāthakkūö nö el kinluhure, hēk ṙōlhaka nö el chūökre nö höng?

⁴¹Achiāp mameukten-në kavöö tö nya-aṅkūö u, yē nup kūön u nö peuinyhökūö ngam Tēv, havötköre inrē kūö törö-ö nyā- aṅkūö?