Read Car_Nicobarese YŌP 39 Bible Online

YŌP 39 - Car_Nicobarese bible

YŌP 39

¹Akahalōn ömeh tö hē nup pököre i kui rôngö nö kayôḵ? Meuk inlahen nup kan tīör öm ṙung nö kayôḵ?

²Kô-òren öm kaheuk chingëṅt nup hateung ngö u, Akahalōn inrē tö hē u nö kayôḵ,

³Yē u nö fātngökūöre, rööichnyö kūönre ngaich kônyi ngaich nup kūön u?

⁴Ngë-eṅ alaha ngaich nup kūön u, sīöplö ngaich anū-ö nö el ka- hôyö; kiröönngöre ngaich anū-ö, ngaich öt havan nö in u.

⁵Chiāpa mahaṙeulngö aṅ el inchōn köttö? Chiāp lamuhlö kinpòk öp tö- veut köttö,

⁶Öp tö kē-ĕvkūö tö chu töp töngāṅ kiyôp nö patī u, öp panam sāl inrē elyöngö nö chūök ò?

⁷Mihôiṅ lōn an tö tinṙōlen elpanam; öt hang ṙô öp maha-ō an.

⁸Keuheūt kui rôngö anga-aṅ nö chūök ò nö nyā-aṅvkūö, chöh nup tö-ayālö ṙōi inrē anga-aṅ.

⁹Hō ang ngòh aṅ el inchōn köttö nö kūönkūö meh? Hō ang nö hĕng mitööm nö ip chūök in meh?

¹⁰Kô-òren öm kapòkngen ò tö pisik i nup tö harònglöngö, hēk hōḵ ang nö hāk el achāṙö nö unôichrit meh?

¹¹Nyatlö öm in ò kūö ò nö kiröngö kumlēḵ, hōḵ öm inrē hökngen nup la-en meh nö in ò?

¹²Nyātölōn öm tö ò nö havan- töre nö hēk? Nö kumtö nup sāiny meh nö el chūök pinṙōngö u?

¹³Keū nup kël ôsrich nö kuvāi- köre; pantēra nup anū-ö nö sanôi hanāngenlōn?

¹⁴Pò ò nö ṙāngö nup lôl re nö el tumlat, hökngen u inrē nö el tumlat nö haṙāchö,

¹⁵Vaichngö töp röön nö kiṙöp- ngö u, tö nup töṙeūla el inchōn inrē nö rööntö kui u.

¹⁶Öt lēken nup kūönre anga-aṅ, sā lōn re tö u nö öt kūön ò; pòrô nöng chanök alaha ap la- en ò, sön anga-aṅ nö öt pa-ekūö;

¹⁷Pò ngam Tēv nö vī an nö nāichngö tö mikah, öt michööḵ aṅ in re tö mikah el mat.

¹⁸Yē ò nö hōklöre nö kiteū, hayīölngö kōra anga-aṅ töp aṅ uk ò inrē.

¹⁹Me-eṅ öm kamëtö kumlēḵ kōra? Kafan öp likeun ò öm tö kumlēḵ?

²⁰Vī an öm nö kumööi sā mufākö pinhë-eṅkūö öp ṙô ò inrē nö më-eṅ.

²¹Kufīö el achāṙö anga-aṅ, ha- keū kumlēḵ in re; kunyī-inyre anga-aṅ höngkūö nyahatī.

²²Hayiölngö pinhë-eṅkūö anga- aṅ, hö-ö inrē nö vöö; öt havanritre anga-aṅ nö ṙā-ang im sanët.

²³In ò ap chūök chòk nö parāla ṙô, pachāla kūö vöi tö tanam inrē.

²⁴Holtö tanānyöre anga-aṅ nö mīktö ngam tumlat; ötkô anga-aṅ nöng ngöh yĕn hang ṙô öp römpĕt.

²⁵Yĕn ṙô-òvö öp römpĕt, ngö ṙô anga-aṅ Ahā! Marôvat elmeh anga-aṅ nö ha- ngòs öp kinyūngö, kunṙôkö ngaich yip yöngkūö kumyung hū-a inrē.

²⁶Aṅ i mikah meh an ngam hòk nö hatēköre, hanyāknyö këlre inrē nö kū- ötö lòhngö?

²⁷I chöngö meh ang ngam matēṙö nö kiteūlöre ngaich vī fôngöre nö lātulöng?

²⁸Iyöng kui ihong anga-aṅ vī patī re inrē ip tölip linrākö ihong.

²⁹In e anga-aṅ nö chôngkö pôḵre; marôvat mat anga-aṅ nö meūkan.

³⁰Nyôknyö mahām ò nup kūön ò; i chūök yip töfëli inrē, umuh anga-aṅ