Read Car_Nicobarese YŌP 4 Bible Online

YŌP 4 - Car_Nicobarese bible

YŌP 4

¹Sapṙô ngaich ang Ēlifās ök aṅ Tēman:

²Yĕn hĕng tak öp kamlahnyôre tö töhĕng ṙô nö in meh, kunyahalōn öm min? Ngaich achīö ap tökô nö öt ṙô-òvö?

³Yĕh meuk, maṙôngö haköpti man, ngaich më-eṅ inrē hangëkö tötkalē-en kël.

⁴Ṙapken ò nup ṙô meh öp töfukngö, ngë-eṅ tī më-eṅ inrē tö töt- kalē-en kinmônö.

⁵Ngaich pöri angū-ö nö yih nö in meh, ngaich më-eṅ öt möi; lūölken meh an, ngaich më-eṅ ngangngökūö.

⁶Röh öng ngam pinhë-eṅkūö töm Tēv nö inyönglen meh, ngam lanöökö minë talöökö meh nö maheūṅkkö meh?

⁷Fēken e töngamuh, achīö ap tötfāluṙen töpalā-aiṙen? Hēk isuh ap töchiplö nö rökiṙen?

⁸Sā maheuṅk chu, yip kum- köhlö öt lanöökö ngaich teūichtö kanihngen hamūllö e ngaich.

⁹Kūö unhômö ngam Tēv cha-a nö öt kôlò, I linkuknyö tanānyö Ò chā-a nö keuheūtngöre.

¹⁰Öp ṙënṙô lāyön, ṙô öp tö- tainy lāyön, Kanap nup tö-ayāl lāyön, ngaich nö laköli.

¹¹Kapah öp tökalēḵ lāyön tö- kūö törö-ö kā re, nup kūön öp kan lāyön inrē nö parāti.

¹²Ngaich kumtu öp ṙô nö hiṙeūttu nö in chu, hāngö e ngam elnang chu nö hiṙeūtka.

¹³I nup lōn Tömeūkö tö hatööm, Yĕn lapat ap inṙôhò nö i tarik,

¹⁴Yīhih pinhë-eṅkūö chū-ö, kinchëyöre inrē, tötī-iv tö minë tangëḵ chu nö kichëyöre.

¹⁵Chahëmi ngam fanöinylö nö chööḵngö kūö chu; ngaich nup sanôi alaha chu nö saṙeūinylöngö.

¹⁶Söktöhëich angū-ö nö öt ha- löinyköre, hö-ö pöri chū-ö kô akah mineūkö e. Sā yô-òv ök i kūö në mat chu; chēvhak ngaich, ngaich chū-ö hang ök ṙô;

¹⁷Kô ang ngòh tarik tökapah nö löök nö i kūö ngam Tēv? Kô ang ngòh tarik nö het nö i kūö ngam Vamī-inre?

¹⁸Pòrô nö öt nyatlö nö in yip tarikre, yip ma-ahānga ò inrē nö vaich tö ṙô ò;

¹⁹Höichngen cha-a yip mī- iyöng el patī tilin, Öp töng më-el pitung rööntö machööḵlö, Öp tötaṙöli tökūö kamlöökö.

²⁰Ihôi peuheū tö harap anū-ö nö taṙöli; Urāngen nö tökôlò öt hĕng tak chumkūöken e.

²¹Yē öp tökuvaha inrūkui cha nö kē-eyö la-ellōn cha, Röh yip nö kapah, ngaich öt mikahavö angū-ö?