Read Car_Nicobarese YŌP 40 Bible Online

YŌP 40 - Car_Nicobarese bible

YŌP 40

¹Ngaich ngö ṙô ngam Mā Tēv tö Yōp:

²Hòṅ lā-al ngam Tökeuheūt- töre Chöngö ang? Ngam chamöh fālen? Anga-aṅ ngòh lamālô ngam Tēv, hökngen ò nö sāpö e.

³Sapṙô ngam Mā Tēv ngaich ang Yōp:

⁴Yĕh meuk, töng kūöṅnen chin chū-ö; sitih ṙô öich min sapṙô meh? Tilup elvāngre chin tö eltī re.

⁵Ngaich chin hĕng heuh ṙô, ngaich chin öt hòṅ sapṙô; nët heuh, hö-ö pöri öich iṙūöhö ṙô,

⁶Ngaich ngam Mā Tēv nö sapṙô Yōp löktö el lamfeui kuföt.

⁷Hamöplö ṙat re man sā tarik; hòṅ hatönömeh chin, ve-eny e me-eṅ in chu.

⁸Uroh öm hòṅ ṙāten chu im tö vaich? Hòṅ töfaluṙen tī öm tö chu pò meh hòṅ töhuveū-en?

⁹Sā kël ngam Tēv ömeh, kô öm inrē kunṙôkö sā ò?

¹⁰Hanyöṅtlöre man i minā-aṅre öm mā; hayūtöre öm i vanāyöre.

¹¹Ṙösnyö ngam tötaṙēchlöng tanānyö meh, ngëichkö öp mahakeūlenre inre, ngaich tumṙeūten ò.

¹²Ngëichkö öp mahakeūlenre ngaich ṙūötö chūök ò; rööntö kui öp tötlöök inrē i chūök ò nö sökhaka.

¹³Hayunngen cha nö holre nö el pitung; nyëkngö kūö cha ip panam lātaṙeū;

¹⁴Ngaich chū-ö min inrē akah- ngen meh, tö ngam lāhāmö kël meh nö kô nö kētö mihôiṅyö meh.

¹⁵Yĕh meuk Pēhimòt, vahī chu sā tī chu vī-i meh; nyā kiyôp an sā nuā.

¹⁶Yĕh meuk i ṙat ò ap kumlēḵ ò, ap minhôiṅyö ò inrē i lanūötlö aich ò.

¹⁷Hangëḵ lamrit re anga-aṅ nö sā sītör; mūl nup rahē takeun ò.

¹⁸Mās nup tangëḵ ò tömëngö ël, sā vët nup pak alaha ò.

¹⁹Anga-aṅ an raneh vahī ngam Tēv; hökngen ò öp vamī an nö haröhtö öp sanët re!

²⁰Pò minë rôngö nö kētö nyā- aṅkūö ò i chūök nup aṅ el-inchōn tö- ṙeūla nö nyamtô.

²¹Elkatòh nup chōn pūl el mak nö hulalhaka anga-aṅ, i rööntö nup tafūyu el silāng inrē nö hanyatngöre.

²²Nup chōn pūl el mak, hanyattö kui ò; havīlen ò nup tötanyīka chōn el mak.

²³Yĕh meuk, öt pa-ekūö anga- aṅ yĕn kalēḵ ngam tahël; nyatlö anga-aṅ nö in re pòrô Yôtön nö pôphöt nö elvāng ò.

²⁴Hĕng tak hòng tökô nö aṅtī tö vòk nö kē an, hēk tufunngö elmeh ò nö aṅtī tö tinngöp?