Read Car_Nicobarese YŌP 41 Bible Online

YŌP 41 - Car_Nicobarese bible

YŌP 41

¹Kô ömeh hatūök Ṙēv aṅtī tö vòk kāḵ hēk karān öp litāk ò tö tökuvaha?

²Kô ömeh hūöttö pisik i minuh ò, hēk tufunngö samā ò tö vòk?

³Pōyen ṙô ap min nö vë-elkuire nö in meh? Ṙēmö ṙô ap min nö vë-ekūö meh?

⁴Vī kinlēḵngô ap min nö in meh öm kē an nö tarik alahare nö urāngen?

⁵Nyamken ò öm min nö sā nyinamkö chehechōn, hēk kapôkan öm min nö nyam öp rēlö in meh?

⁶Kasal ṙôre yip min mī-inyih tö ṙāi ò? Michööḵ an yip min nö in yip mī-inyihkö chehen?

⁷Kô öm tufunngö uk alaha ò aṅtī tö vöi töhakālö, hēk tufunngö öp kui ò tö ma-āṅ?

⁸Kētö tīre in ò; fēkö öp kumlēḵ; ngaich öthō me-eṅ hēk lūölken ò!

⁹Yĕh meuk, öt teung öp ma- heūṅkkö ngòh tarik; tumṙeūtu an yĕn meūkan.

¹⁰Öt hĕng tak tö-urohlö tanān- yö tökô nö piyôken ò. Achīö papkeh anga-aṅ tökô nö sökhak nö i kūö chu?

¹¹Achiāp kamë-eṅti nö in chu, hòṅ chu havanten e nö in ò? Chū-ö chu nun në töng sitih el katòh ngam halīöngö.

¹²Öthō chū-ö öt ṙô-ò vö i nup pak alaha ò, hēk ip kumlēk ò, hēk ip vanāyö vinī-i ò.

¹³Chiāp tökô nö leūichngö öp uk lā uk ò? Chīap tökô nö meuthöt nö el nup tönët chap uk lanaklö ò?

¹⁴Chiāp tökô nö tuvānyö el- vāng ò? Vinngö nup pinhë-eṅkūö i nup kanap ò.

¹⁵Vī-i ap rôngö ò nö töökhaka aṅ in tö lanaklö, tölip sā töhapāni.

¹⁶Nö röphen höö lökngen kuföt nö ötkô nö meuthöt nö ihôi u.

¹⁷Taptöre anū-ö nö in höö, köp nö in höö öt hankösngen.

¹⁸Pachallöng nup yanësö ò, mat ò inrē sā minlīchlö minlīlö peuheū.

¹⁹Löknyö elvāng ò nö meutnyi töhū tameūyö; farômnyöre linrôkö kūö tameū- yö.

²⁰Löknyö elmeh ò lul nö meut- nyi, sā töpök aṅ tanīöyö töhūkūö inrē tönyô kun chōn.

²¹Uhômnyö ta-ök anga-aṅ tö- hūkūö, ngaich löknyö elvāng ò töhū tameūyö,

²²I likeun ò ap kumlēḵ ò, kiṙīöm pihë-eṅkūö nö i kūö ò.

²³Liphen höö nup kūö alaha ò, köp nö in ò öt hanlöinyken.

²⁴Sā nganë-eṅ ihong ap fa- nöinylö ò, ngëḵ sā öp ihong el katòh kin- ṙīöt.

²⁵Yē ò nö hakutlöre pa-ekūö ngaich yip tökalēḵ; pa-ekūö cha-a yip kumṙapkö kūö ò.

²⁶Pòrô öp sanët nö teungta nö in ò, öt kanô-òṅvö anga-aṅ; öt rēhĕn vöi, töhūkūö vöi, hēk tanam.

²⁷Höng sā kiyôp vët nö in ò, sā tö chahū-ui chōn inrē mās.

²⁸Ötkô chòk nö falngöre tī tö ò; kaṙāpi nö in ò nup ihong aṅ chinvil.

²⁹Sā kaṙālö afō nup töchilöl tinkung nö in ò: hayīölngö pinrālö ṙô tanam anga-aṅ.

³⁰Sā tökeut raktit tanīöyö ap aich ò; pirātngöre anga-aṅ sā pinṙōngö ṙòng sāiny nö el tilin.

³¹Sā tanīöyö anga-aṅ nö ṙāichö tī tö ngam mai; Vī ngam mai anga-aṅ nö sā tanīöyö incham.

³²Angāya ap lā-unôich ò yĕn ṙāngö e; ngaich sā pakūkui tölōn.

³³Öt asā-av anga-aṅ nö ing tumlat; tö aṅ töt pa-ekūö.

³⁴Ngëichkö lātulöng anga-aṅ; anga-aṅ an rācha i kui kūön inkeūlen nö ṙòkhöre.