Read Car_Nicobarese YŌP 42 Bible Online

YŌP 42 - Car_Nicobarese bible

YŌP 42

¹Ngaich sapṙô ngam Mā Tēv ang Yōp:

²Akahalōn chin tö meh tökô i tökeuheūttöre, öt tökô-òvö inrē nö asökngö öp chööḵnyö meh.

³Achīö ap anga-aṅ mahanyat- ngö inlēnö nöng öt akaha? Lökten chin höng kaknyöre ngaich tö öt mikah elmat re, nup töyahlö pinngangkūö nö in chu, nuk öt mikahkūö chu.

⁴Hangihtöre hòṅ chu ṙô-òvö; töich hatönö meh, ve-eny nang chu me-eṅ inrē.

⁵Hangken meh chin lökten i hināngö elnang, ngaich pöri töngamuh ngih mat chu nö meūkö meh;

⁶Lökten chin ahūöngöre, ngaich havöötö ellōn re öich höng pitung, tisum inrē.

⁷Unôichrit ṙô ngam Mā Tēv nö vë-ekūö Yōp tö në ṙô, ngö ṙô ngaich ngam Mā Tēv tö Elifās ök aṅ Tēman: Hūlökūö lanīnö chin in meh in nap hol meh inrē tönët tak; pò yīö öt ṙô-òv tö töchip lā in chu öi sā ngam tarik chu Yōp.

⁸Lökten yin kē kōiny nuā sat nòng sat nòng inrē kūön sīṅp, kuṙòh kiröönngöre inrē ip tarik chu Yōp, kētö tökētu yī-ö töföngö; ngaich min ngam tarik chu Yōp nö ve-elkui yīö, tön hō-o ṙô ò chin min nö vë-ekūö chu nö öt asā nuk kumlō-ov yīö; pò yīö öt ṙôtö töchip lā in chu, öi sā ngam tarik chu Yōp.

⁹Lökten Elifas ök aṅ Tēman Piltat inrē ök aṅ Suh, Sōfar inrē ök aṅ Nē-amat nö kiröönngöre sā ṙô ngam Mā Tēv nö tölṙô cha; hō-ö ṙô Yōp ngaich ngam Mā Tēv.

¹⁰Ngaich ngam Mā Tēv nö havantö nup kanôlò Yōp, hē ò nö vë-elkui yik holre; ngaich ngam Mā Tēv nö nët chap tī nö kē-ĕkūö Yōp sā ṙôken nuk chehen ò lā-urĕh.

¹¹Möl nö yih nö in ò yik mak alaha ò, kanānö ò ṙòkhöre inrē yik mikahkūö ò nö lā-urĕh, ngaich holkūö ò nö nyā-aṅvkūö nö i pati ò; ngaich cha-a nö hameuktö miṙēlōnre nö in ò haṙamlōn ò inrē tökūö nuk tötlöök tī ngam Mā Tēv nö in ò; ngaich kö tī-iv cha-a nö in ò tö rupīö humlum inrē kinlong.

¹²Ngaich ngam Mā Tēv nö hakòlò nuk lā-unôich sakāmö Yōp nö mötlö tök ranehlen ò; ngaich anga-aṅ nö fën sīön köṅny sīṅp, tafūöl köṅny ūṅt, hĕng köṅny kan köttö.

¹³Ngaich anga-aṅ inrē nö sat tak kūön tö kikōnyö lūöi inrē kikānö.

¹⁴Ngaich anga-aṅ nö kaheuk minënyö ök raneh nö Yēmīmah. Kēsiyā inrē minënyö ök innëtö; Kērenhupak inrē minënyö ök linūöyö.

¹⁵Ngaich im panam nö keuheūtngöre chūök öt hĕng tak kikānö tö sā vanāyö yik kūön Yōp; ngaich ök yöng cha kikōnyö nö kētö amin cha nö in yik kanônyö cha.

¹⁶Unôichrit e ngaich Yōp nö aṅ nö hēngòng fën anāi samyeūheu, meuk yik kūön re kikōnyö, yik kūön yik kūön ò inrē, fën köl chap.

¹⁷Kapah ngaich Yōp, köiny nö tarik, sööḵlö inrē tö sakāmöre.