Read Car_Nicobarese YŌP 5 Bible Online

YŌP 5 - Car_Nicobarese bible

YŌP 5

¹Havë-a yĕh; hĕng tak hòng min umuh samap ṙô meh? Inchīö öm havöötökūöre tö yip töhet?

²Kô-en nö kapaha tī tö tökullō- ovö ngam inkihten, kumnyah elmat inre fëlngö töt akaha.

³Meuk tökulō-ovö chin nö ṙĕhtöre, höng lūk pöri öich öt lēkôre töp elyöngö ò.

⁴Marôvat yip kikōnyö kūön ò tö öt pinlāngen, karāpköti yip nö i kūö inkūp, Öt hĕng tak umuh ṙamānyen cha.

⁵Nyā-aṅ ṙòng taneūch an tö neūkö, Uroh anga-aṅ nö kē-ĕ e nö ṙā-ang i töchökhukūö; Yip töyal inrē nö kasālöre tö nup kanôlò ò.

⁶Pò inkihten nö öt yih nö ṙā-ang el pitung, Öt rēhĕn kanihngen nö meuny- lö nö ṙā-ang el tumlat;

⁷Fötnyu pöri tarik nö i kanih- ngen kū-ö tö tulöng sā ta-ök tameūyö nö kiteūlöre.

⁸Chöh ngam Tēv pöri chu-ö, im Tēv tī inrē öich kētö chööḵnyöre;

⁹Ngam tö tī tö tökiröng töt chanööhen inrē, Öt kanṙeūken pinngangkūö:

¹⁰Kētö kumṙah Anga-aṅ i kui ngam tumlat tīntö mak inrē nö ël në panô-òṅ;

¹¹Lā tulöng tī anga-aṅ tö yip lamā taṙeū, I chūök öt pinlāngen tī nö hachohlö töhaṙivlōn.

¹²Asökngöti tömileuchngenvahī Anga-aṅ, lökten nö öt kô-òltī nup kuntī cha.

¹³Kē yip tö-akaha Anga-aṅ i nup kanahngen vahī cha; nup tī yip tömileuchngen inrē nö kum-eūyiṙen nö keuheūt.

¹⁴Höngkūö sinngūlö cha-a tö el sakāmö, ṙēp talöököre tö el sakāmö sā re tö hatööm.

¹⁵Ṙā-ang elvāng cha pöri anga- aṅ nö hayööken kūön yōich, Öp yāich ṙā-ang eltī öp tökalēḵ.

¹⁶Lökten ngam tötkôlò nö ma- heūṅkkuvö tilupngö elvāng ò inrē ngam michūḵṙen kinṙôka.

¹⁷Yĕh meuk, töṙāmölōn ön ngòh tarik tövëka tö ngam Tēv; lökten un öt kūöngen tö chinök- ṙen re töm Tökeuheūttöre Chöngö.

¹⁸Hanyahkö an, haṙung pöri anga-aṅ; fōh an, halanken pöri minë eltī ò.

¹⁹Ṙānyen meh an min i nup tö tafūöl kanihngen; im tösat öt lūölka më-eṅ min tö tötlöök.

²⁰I inyāchö anga-aṅ nö ṙānyen meh ṙā-ang kinpaha I kinyūngö inrē ṙā-ang i minhôiṅyö ngam sanët,

²¹Hanyāti man min tö chanökhu litāk, Öt pa-ekūö min inrē tö tinṙōl- ngö yē e nö yih.

²²Hayīölngö tinṙōlngö, inyā- chö inrē min më-eṅ, Öt pa-ekūö inrē min tö töṙeūla ing tumlat.

²³Pò meh min nôlta i në ihong el kahôyö, lām min inrē nup töṙeūla el kahôyö nö in meh.

²⁴Akahalōn min më-eṅ töp rū- kui meh nö öt pinlānguṙen, ngaich më-eṅ min ngëichkö nup pököre meh ngaich öt hĕng nòng tö rö-övö.

²⁵Akahalōn inrē më-eṅ min tö yip kūön meh nö maṙôngö, sā kiyôp ngam tumlat inrē yip lamöklö in meh.

²⁶Yīh el anūlöre më-eṅ min sööḵngö tö ṙētöre, sā öp sāiny nö yih nö el chūök pinṙōngö hē öp ṙētak e.

²⁷Yĕh meuk chöhö in ngaich; kô-en angū-ö. Hangihtöre, akaha e inrē nö kanôlò meh.