Read Car_Nicobarese YŌP 6 Bible Online

YŌP 6 - Car_Nicobarese bible

YŌP 6

¹Sapṙô ngaich Yōp:

²Ō kalaha lumngan öp öre kanihngen chu, ṙòkhöre inrē nup famuk kui chu nö ṙātu nö el kinlah lumngan!

³Ngaich lohten öre angū-ö nö hönlöre lumngan tö kuyāyö ngam mai; lökten nup ṙô chu nö kes.

⁴Pò nup chòk ngam Tökeuheūt- töre Chöngö nö in chu; ök tökapahakūö öp ma-alaha chu nö in u; ṙak nup pinhë-eṅkūö aṅ im Tēv nö lā-al chu.

⁵Ötṙënuṙô öp ṙung köttö aṅ el in chōn yĕn aṅhav-in tö kiyôp, hēk ötṙënuṙô öp nuā yĕn aṅ- havkūö tö tönyôṅ kiyôp?

⁶Kô-òren öp tökunyah nö nyā- aṅ nö öt sālu, hēk kumchīku hòng i nup sam pāchi?

⁷Öt hòṅ lūölkö u ngam chūök nyā-aṅkūö chu; nyā-aṅkūö nun nö sin-òkkūö chu.

⁸Aō teūngen chin yēḵ töp havëköre, kētöp lōn chu inrē ngam Tēv;

⁹Ṙanāmölōn ngam Tēv an ngam kinṙöpngö chu, hòṅ Ò nö ṙā-angtīre rökngen chu inrē!

¹⁰Angū-ö an öre inṙamlōn chu; Ngaich chū-ö öre i chanökö ṙāmölōn öt ṙā-al; pò chu öt mahngö nup ṙô ngam Töhĕng Töhet.

¹¹Asuh ap kumlēḵ chu, öp lökten chu hökö? Suh manāngen chu inrē, töp lökten chu hamöyöre?

¹²Kumlēḵ ihong ap kumlēḵ chu? hēḵ mās hòng ap alaha chu?

¹³Kô-òngrit chin öt aṅhav-in tö hinòlṙen re, ahōṙi nuk nö ṙā-ang in chu, lamöknyö in chu.

¹⁴Anga-aṅ ngòh töt kamëtö neūkölōn nö i holre ṙamāngö pinhë-eṅkūö tö ngam Tökeuheūttöre Chöngö

¹⁵Michūḵ chanökhuṙen yip hol chu sā cha man el töhëm mak, sā töhëmnyi mak,

¹⁶Nup tösah holtö tökënngöre mak in u inrē tökënngöre tacham nö nyatngö.

¹⁷Hē el ṙanāchö anū-ö nö changāchi; hē e nö ṙāch, chaṙēviyö anū-ö nö i chūökre.

¹⁸Kānngöre cha-a tö talöököre töhĕng tum röön nö kiröön- ngöre; chuh el tönnyaṅlnyi cha-a ngaich palā-aiṙen.

¹⁹Ngëicha yip töhĕng tum röön nö kiröönngöre aṅ Tēma, meūka yip kumröön aṅ Sīpa.

²⁰Nyātölōn kötinrö-ö cha-a pò cha nöng nyatlö; yih cha-a nö ihih ngaich kalūichöre elkui.

²¹Sā yīö yī-ö töngamuh öi in chu; meuk pinlāngen chu yin, ngaich pa-ekūö.

²²Reushen chu, ngö ṙô öichu? Hēk, i kanôlò re man kētö ṙāi minyôṅny-aṅ pòkūö chu?

²³Hēk, Kētö ṙāi chu ṙā-ang eltī ap lā-al chu? Hēk, Kētö ṙāi chu ṙā-ang eltī yip mahakihten chu?

²⁴Haköpten chu, öt ṙô-òv chū-ö min; mikahtölōn chu töp vanāchö chu.

²⁵Yöng kumlēḵ në töt michūḵ- ṙen ṙô! Hameuktö yòh pöri ngam vinë- a aṅ in meh?

²⁶Kô öm tö lōnre vëkö ṙô, hē öp ṙô töhòṅ ngaichngen tarik nö kuföt?

²⁷Uroh man öre kalah taneū- ngen i kūön yōich, silaichngö ṙô holre inrē.

²⁸Höng ṙāmölōn pöri më-eṅ yēḵ ngëichken chu; pò chu öthō minyôiny i kūö meh.

²⁹Vë-ekūö meh chin, havöö- kūö e um tö chōchuvöti. Havöökūöre öt hanlöinyken an ngam kanöpö chu.

³⁰Tövāchu hòng i litāk chu? Kô-òren öp kumchik elnāng chu nö akah pinlāngen?