Read Car_Nicobarese Salmai 10 Bible Online

Salmai 10 - Car_Nicobarese bible

Salmai 10

¹Ō Mā Tēv, kūöyôm marôvat sökhaka: kūöyôm hanyatngöre hē el nup kanihngen?

²Lūḵ ngam yāich an ngam inkeūlen ngam tötlöök: hökngen cha yĕh nö kô-òng-vah tökūö nup vahīṙen cha tömilichngen lōn cha.

³Pò ngòh tötlöök nö eū-eure nö i nup lōnre: pò ngam yamikhanga nö hakôlöngṙô, hôṅ, ötlēka elnang ngam Mā Tēv.

⁴Ngö ṙô an ngam tötlöök i inkeūṙökūöre: Öt havëkö e an min, öt Tēvu umuh, ngö ellōn an.

⁵Ngëḵ nup talöökö ò nö örheū-heu: marô-òl chūök nup inkaha fālen aṅ in meh tö mat ò; luföökūöre anga-aṅ nö in yip kumnyah elmat re.

⁶Ngö ṙô an nö ellōnre, Öt hanlöinyken chin min: öt ip kumnyahṙen chin min örheūheu i tumkölchap.

⁷Tööḵlö elvāng an tö ötlinëkô, michīl inrē, inkihten inrē: elkatòh litāk ò öp töchōich, öt lanöökö inrē.

⁸Ūichhaka an nö i tuhēt el chūök mahayun, el nup tö-ruptu anga-aṅ nö kumpah töt akahaṙa: ulāikö matre an nö ngëichken öp töt-hōluṙen.

⁹Sā lāyön nö el chūökre, nö el öp ranuptö kui re, hayun yip yāich an nö hulalhaka: ngaich kē öp yāich anga-aṅ yĕn ngaich nö haṙöihöt ò nö el inhāṅlre.

¹⁰Fātngöre an, sōnngöre: ngaich ngam yāich nö fukngö tö kūö kumlēḵ ò.

¹¹Vaichngö an ngam Tēv, ngö anga-aṅ nö ellōn re: hanyat-ngö kūöre an; öt hētu an min nö meūkö e.

¹²Ō Mā Tēv, choholre; Ō Tēv, hachônglö këlre Man: um vaichngö tö yāich.

¹³Kūöyòh aich vē tötlöök nö mināich tö ngam Tēv: nö ngö ṙô nö ellōnre, Hö-ö man lōnu tö e?

¹⁴Meūkö e man; pò meh meuk tötlöök, kumnyahṙen inrē, ngaich kē-ĕ e me-eṅ eltīre: kētöre yip töt hōluṙen nö in meh; hamòlṙen kūönyōich man me-eṅ.

¹⁵Likölngö takeun kël ngam tötlöök man: ip tötlöök pöri tarik, chöh öp ötlanöökö ò hanöngsaha meh öt kanô-tuvökūö.

¹⁶Höng tö-örheūheu an ngam Mā Tēv nö Rācha: lëlngö yin vē pumnāmö tarik nö i kūö öp panam ò.

¹⁷Mā Tēv, ngaich man hang tömöi: halēn ellōn cha man min, hāngö tī man min tö ngam elnangre.

¹⁸Kahòklö kui kūönyōich, tö-hakihtuṙen inrē: hòṅ ngam tarik ngam aṅ ngih panam nö öt angëtachōich.