Read Car_Nicobarese Salmai 103 Bible Online

Salmai 103 - Car_Nicobarese bible

Salmai 103

¹Ō Me-eṅ nômö Mā Tēv: ṙòkhöre in chu ellōn, hakôlò ngam töhet mine-eny Ò.

²Ō Me-eṅ nômö chu, hakôlò ngam Mā Tēv: un vaichngö tö nup inkôlò tī Ò, nö ṙòkhöre.

³Ngam ma-aṙē-ĕl nup tökööl meh nö ṙòkhöre: tö lööken tī tö nup invah meh nö ṙòkhöre.

⁴Ngam Ṙamānyö ngam nômö Meh nö ṙā-ang el anūlö: ngam ma-afônglö kui Meh tö ngam hanāngen neūkölōn nö hol tö miṙēlōn.

⁵Ngam mahatööḵöl elvāng Meh tö tölöök: hinôten ngam inyālö Meh nö tumfömlöngö nö sā matēṙö.

⁶Tī tö nup lanöökö An ngam Mā Tēv, inkaha fālen inrē in yip tö hakihtuṙen nö ṙòkhöre.

⁷Mikahtölōn Môsös An tö nup talöökö re: nup la-en Ò, in yip kūön Israĕl.

⁸Tötööḵlö An ngam Mā Tēv tö miṙēlōn: töt veūtö lanīnö, tö pōyen miṙēlōn inrē.

⁹Hö-ö An nöng nyamṙôre nö vë-a: ötrēhĕn nö örheūheu nö haköp lanīnöre.

¹⁰Hö-ö An nö asā nup tökööl hī nö lök alaha hī: ötrēhĕn nö asā nup tökööl hī nö reushen hī.

¹¹Pòn sā ngam halīöngö nö lātulöng töng panam: ngatī ṙôkö öp neūkölōn Ò nö in cha yip tö pa-ekūö tö Ò.

¹²Sā rôvat ngam chuhöt tö ngam sūng: ngatī rôvat tī Anga-aṅ nö ṙūöngen nup tanôichngen hī tö hī.

¹³Sā ngòh inyöngö nö aṙē-ĕlōn tö kūön re: ngatī ngam Mā Tēv nö aṙē-ĕlōn tö cha yip tö pa-ekūö tö Ò.

¹⁴Pòn akahalōn anga-aṅ töng yöng alaha hī: köpölōn An tö hī, höng pitung.

¹⁵Ngòh tarik pöri, höng sā kiyôp nun në sakāmö ò: sā panöpnyö ṙòng chōn an, ngatī sanīöplö an.

¹⁶Pòn lökngö kui e ngam kuföt, chaṙēviyö ngaich angū-ö: öt akahakūö ngaich angū-ö tö chūök re.

¹⁷Ngam neūkölōn ngam Mā Tēv pöri nö töng öt chanūhuvṙen, nö in cha yip tö pa-ekūö tö Ò: ngam lanöökö Ò inrē nö i yip kūön yip kūön.

¹⁸In cha yip mahaköp ngam kinlēḵngô Ò: in cha inrē yip tö köpölōn tö nup chöngö Ò nö lökö u.

¹⁹Haköpngö ngam kantēra re An ngam Mā Tēv nö el minë halīöngö: hayöng ngam pūlngö Ò inrē nö i kui taṙòkhöre.

²⁰Hakôlò ngam Mā Tēv, yi-ö ma-aṅhānga Ò: yī-ö tö kalēḵ, mahateugngö ṙô Ò, mahangihtöre tö ṙô Ò.

²¹Hakôlò ngam Mā Tēv, ṙòkhöre yī-ö tömaṙôngö in Ò: yī-ö mameukṙen Ò, tö ṙāmölōn tī tö Ò.

²²Hakôlò ngam Mā Tēv, ṙòkhöre yī-ö la-en Ò, i chūök nup minā-aṅ Ò nö ṙòkhöre: Ō Me-eṅ nômö chu, hakôlò Mā Tēv.