Read Car_Nicobarese Salmai 104 Bible Online

Salmai 104 - Car_Nicobarese bible

Salmai 104

¹Hakôlò ngam Mā Tēv, Ō Me-eṅ nômö chu: Ō Mā Tēv, Tēv chu, tökiröng takô-en Man, hayūtö Man tö ineū-euṅ, tö vanāiyö re inrē.

²Kamhūmöre tö hanātö sā hilā: Me-eṅ mahanyāknyö minë halīöngö nö sā inrūkui.

³Ṙamātö minë mikeūnö minë urôhò re nö el minë mak: vamī minë taṙul nö inrölre; kumröönngöre, Öm i rōi sanëòk ngam kuföt;

⁴Vamī minë kuföt nö ma-aṅhānga re; më mameukṙen Ò; tö hūkūö nö tameūyö.

⁵Ṙamātö rööntö ngam tumlat: pòn hōten e nö öt hanlöinyken nö örheūheu.

⁶Kahumngö e Me-eṅ töm mak nö sā inyut: sökhaka minë mak nö i kui minë rôngö.

⁷Falngöre anū-ö tö vinëköre tö Meh: i ṙô ngam kunṙôkö Meh anū-ö nö changāchi.

⁸Löklö minë rôngö anū-ö nö yônlö: löktö el minë achāṙö anū-ö nö yônti, nö ip chūök u vahī tö Meh.

⁹Ṙātö tölngö kūö u Me-eṅ pò u nö sōtu nö havan nö hēk nö i kui ngam tumlat.

¹⁰Söömtö tö hëmlö mak Anga-aṅ nö el minë achāṙö: lök i minë rôngö anū-ö.

¹¹Kētö òk nup töṙeūla anū-ö el kahôyö: haṙamtö yanālö re nup hanchōn köttö.

¹²In u nup chehechōn el taṙul nö chūökuvö: tikökṙôre nö i rōi nup pak.

¹³Hamak minë rôngö An nö löknyö i minë urôhò re: tööḵngen an ngam tumlat tö ṙòng minë la-en Ò.

¹⁴Vīten në kiyôp An nö sīöp tö kūö në nuā, kun chōn inrē mineukṙen ngam tarik: pòn hōten cha Anga-aṅ nö sīöpö, nya-aṅkūö nö löklö el tumlat.

¹⁵Vāin inrē tö ṙāmölōn tī tö tarik: tavī-i inrē tö tī-iv tö ngam kūö ò nö angāya, nya-aṅ inrē tö kalē-ĕti tö ellōn tarik.

¹⁶Tööḵngen nun minë chōn ngam Mā Tēv: minë Sītör aṅ Lepanön, minë taheūch tö Ò.

¹⁷I chūök minë chehechōn nö vī fôngöre: patī ngòh istôk nun në för chōn.

¹⁸Chūök në hanchōn pököre nun në tö marô-òl kui rôngö: chūök në kōni në ihong.

¹⁹Halēn ngam chingëṅt Anga-aṅ nö ṙētak: akahakūö ngam tavūöi tö maneuttö re.

²⁰Vī sinngūlö Më-eṅ, ngaich hatööm angū-ö: hē e nup töṙeūla el inchōn nö ṙòkhöre nö ṙeulnyi.

²¹Siṙöp pô re në kūön lāyön: chöh kā re tö aṅ im Tēv.

²²Meutlö ngam tavūöi, kē-ĕngre ngaich anū-ö: ṙōlngöre ngaich nö el nup kinlūhu re.

²³Kiröönngöre tarik nö i la-en re: vahīṙenre inrē nö söl harap.

²⁴Ō Mā Tēv, iṙôken ön minë la-en Meh: vī-il u Man nö ṙòkhöre lökten ip mikah; tööḵlö ön ngih tumlat tö kanôlò Meh.

²⁵Umū-aṅ ngam mai, kiröng pōiti inrē: ël e nup tö pōyen ṙameūla, hĕnghöre tö kūönö tö kiröng inrē.

²⁶Ël e nup chōng nö kiröönngöre: kāhanòk, ngam vahī Meh nö mumnyamkö kūö Ò, nö umuh.

²⁷Ṙòkhöre anū-ö në nö in Meh: nö hökkö tī Meh kētö nya-aṅkūö u, ip hē ṙētak tölöök.

²⁸Kē-ĕkūö u Me-eṅ, ngaich hamūl anū-ö: kiyāngnyö eltī re Me-eṅ ngaich tööḵngen anū-ö tö tölöök.

²⁹Hanyatngö kūö re Me-eṅ; ngaich kihngen anū-ö; kēngö unhômö u Me-eṅ, ngaich kapah anū-ö: ngaich havanngöre nö pitung.

³⁰Söömtö nômö re Me-eṅ, ngaich vīlöngö anū-ö: ngaich Me-eṅ inrē tumfömlö kūö ngam tumlat.

³¹Hökngen ngam minā-aṅ ngam Mā Tēv yēḵ nö örheūheu nö köp: hökngen ngam Mā Tēv yēḵ nö ṙāmölōn nö i në vahīṙen re.

³²Ngam ngamëchtö kui ngih panam, ngaich kichëyöre angū-ö: lūölkö minë rôngö Anga-aṅ, ngaich lūlu anū-ö.

³³I ṙô-òten chu min aṅ tikökṙôre min chū-ö im Mā Tēv: i rô-òten re chin min tarik öich tikökṙôre tö nöinyö ngam Tēv chu.

³⁴Hökngen öp piṙūtkö chu nö pachāka nö in Ò: ṙāmölōn chin min im Mā Tēv.

³⁵Hökngen yip tököölö fālen nö hatngö nö i kūö ngih panam, hökngen yip tötlöök inrē nö öt ōtre: hakôlò ngam Mā Tēv, Ō me-eṅ nômö chu. Ha-öiny ngam Mā Tēv.