Read Car_Nicobarese Salmai 105 Bible Online

Salmai 105 - Car_Nicobarese bible

Salmai 105

¹Ha-öiny ngam Mā Tēv, havëkö mine-eny Ò: mikahtölōn tarik tö nup vahīṙen Ò.

²Tikökṙôre in Ò, tikökṙôre tö nup nöinyö Ò: piṙūtkö nup pinngangkūö la-en Ò.

³Eū-eu re yin im töhet mine-eny Ò: hökngen cha nö ṙāmölōn yip chamöh ngam Mā Tēv.

⁴Chöh ngam Mā Tēv yin, töp kumlēḵ Ò inrē: örheūheu yin chöh ngam kūö Ò.

⁵Köpölōn tö nuk tökeuheūten pinngangkūö la-en Ò: nuk aṅ elvāng Ò inrē inkaha fālen.

⁶Ō yī-ö kūön Aprahām ök kūön Ò: yī-ö kūön Yāköp, yik katöllö Ò.

⁷Örheūheu An nö köpölōn tö nuk kinlēḵngôre: i tö köṅnyu tumköl chap Anga-aṅ nö chöngu tö ngam ṙô.

⁸Örheūheu An nö köpölōn tö nuk kinlēḵngôre: i tö köṅnyu tumköl chap Anga-aṅ nö chöngu tö ngam ṙô.

⁹In Aprahām Anga-aṅ nö vītö ngam kinlēḵngô: in Isāk inrē ngam tö chūöku kinlēḵngô Israĕl.

¹⁰Haköpö anū-ö nö in Yāköp nö inchöngten: töt chanūhuv nö kinlēḵngô nö in Israĕl.

¹¹Nö ngö ṙô, In meh tī chin min kētö ngam panam Kanā-an, nö minchööḵö meh:

¹²Hē cha nö ṙòngmöng haroh tumtak nö tarik: hôṅ, öt ṙōl tak, öt rô-òtenvö nö i kūö e inrē.

¹³Kiröönngöre cha-a nö ṙā-ang i pumnāmö tarik: teungtöre nö i pumnāmö tarik, ṙeū-eung im tö hĕng pūlngö söl i yip tahëng tarik.

¹⁴Öt halöngten tarik Anga-aṅ nö chōchen tī nö in cha: hôṅ, kūö cha Anga-aṅ nö vëkö yip rācha;

¹⁵Nö ngö ṙô, Un lūölka më tö hachāmö kui tö chu: un chök më pròfĕt chu.

¹⁶Havëtö inyāchö ngaich Anga-aṅ nö i kui ngam panam: keuheūtngöre tī Anga-aṅ nö fòkngö nuk nya-aṅkūö cha.

¹⁷Tīnngö tarik Anga-aṅ, hĕngtak nö urēhĕkūö cha: inyīhiyö ang Yôsĕf nöng kūön alaha.

¹⁸Chök nuk kalröön ò tö kūö inlök: hulalhak anga-aṅ nö inlök tö vët;

¹⁹Hanöng saha ngam ṙētak ngam ṙô Ò nö teungtö kūö: kalaha ò ngam ṙô ngam Mā Tēv.

²⁰Tīnhanga ngam rācha ngaich luhlen ò: ngam mahayöng yik tarik, ngaich hökngen ò nö kiröönngöre.

²¹Vīlen ò anga-aṅ nö mā nö i patī ò: mahayōm nup inlānen ò inrē nö ṙòkhöre.

²²Nö hamūl yip kūön rācha ip lōn ò: ane inrē haköptö yip mahalēn chöngö tö mikah.

²³Yih inrē Israĕl nö i Aikup: yihtökūö inrē Yāköp nö i panam Hem.

²⁴Ngaich anga-aṅ nö ṙūölen yik tarik re nö pōyen: vīten cha inrē nö kalēḵ tö yik lā-al cha.

²⁵Vīngö ellōn cha Anga-aṅ nö surīkhö yik tarik Ò: mileuichngen michūḵ nö i yik tarik Ò.

²⁶Tīnten ök tarik re Anga-aṅ ang Môsös: Āròn inrē nak katöllö Ò.

²⁷In cha tī cha-a tö nuk minkahgö: pinngangkūö inrē i panam Hem.

²⁸Tīntö sinngūlö Anga-aṅ, vīten e ngaich nö sangūla, ngaich sangūla angū-ö: ngaich öt ahôngen nuk ṙô Ò cha-a.

²⁹Vīngö nuk mak cha Anga-aṅ nö mahām: ngaich kapah nuk kāḵ cha.

³⁰Tööḵlö nuk panam cha ngaich tö tarôṅt: el nuk urôhò yik rācha cha.

³¹Ṙô-òv Anga-aṅ, ngaich yih nuk inṙūöi nö pōyen, tamāp inrē: ṙòkhöre chūök nö i kūö panam cha.

³²Kētö kumṙah cha Anga-aṅ tö tö mulngöre: tö hūkūö tameūyö inrē nö i panam cha.

³³Silehngö nuk vāin cha Anga-aṅ inrē tö nuk anychīr cha inrē: lisehngö nuk chōn cha inrē i kūö panam cha.

³⁴Ṙô-òv Anga-aṅ, ngaich yih nuk mufākö: nuk kata-ëm inrē, öt kanṙeūken.

³⁵Ngaich keuheūt anū-ö, nö nyāngö nuk kun chōn i panam cha: nyāngö nuk ṙòng aṅ ngam tumlat inrē.

³⁶Halëlngö yik lanòh Anga-aṅ nö ṙòkhöre i panam cha: yik yöngkūö kumlēḵ cha.

³⁷Kēnyen cha Anga-aṅ ngaich nö hol tö rupīö, humlum inrē: ngaich öt hĕng tak töt kalē-en nö i yik miyöngö cha.

³⁸Ṙāmölōn ngaich Aikup tö chanūhu cha: pò cha nö fuk kui tö pinhe-eṅkūöre tö cha.

³⁹Hanyāknyö taṙul Anga-aṅ nö innyat kui cha: tameūyö inrē, nö inhat mat cha tö hatööm.

⁴⁰Havë-a cha-a, ngaich kētö nuk kūil Anga-aṅ: hatööḵngen cha inrē tö nya-aṅkūö aṅ el halīöngö.

⁴¹Luvënyö kūö ök ihong ngaich Anga-aṅ, ngaich pòpnyi nuk mak: hëmnyi anū-ö sā tahël i panam tönyô.

⁴²Pòn köpölōn Anga-aṅ tök töhet ṙô re: in Aprahām ök tarik Ò.

⁴³Kēnyö yik tarik re Anga-aṅ nö ṙāmölōn: yik katöllö Ò inrē hol tö tinkökṙô re.

⁴⁴Ngaich kē-ĕkūö cha Anga-aṅ tö nuk pumnāmö tarik: ngaich cha-a nö kē nuk la-en yik tarik nö aminre.

⁴⁵Pòn hōtu cha-a nö haköp nuk inchöngten aṅ in Ò: haköp nuk chöngö Ò inrē. Ha-öiny ngam Mā Tēv yin yēḵ.