Read Car_Nicobarese Salmai 106 Bible Online

Salmai 106 - Car_Nicobarese bible

Salmai 106

¹Ha-öiny ngam Mā Tēv yin, Ō ha-öiny tī ngam Mā Tēv tön tölöök An: pò ngam miṙēlōn Ò nö köp nö örheūheu.

²Chiāp tökô nö ṙô-òv tö ngam minhôiṅyö ngam Mā Tēv: hēk, tökô nö hameuktö nup nöinyö Ò?

³Tökôlò yip cha-a, yip mahaköp inkaha fālen: anga-aṅ inrē öp tö la-evṙen tö tölöök nö örheūheu.

⁴Ō Mā Tēv, köpölōn tö chu, tö ngam miṙēlōn Meh inrē, tö yip tarik Meh: Ō chöhken cha tö ngam inyööken aṅ in Meh.

⁵Hòṅ chu meuk kanôlò yip katöllö Meh, hòṅ chu ṙāmölōn i ṙanāmölōn yip pumnāmö tarik Meh: hòṅ chu hol yip amin Meh eū-eu re.

⁶Hol yik muvöhngöre in köölö fālen: kēken tökööl in, öt löökö fālen in ngaich.

⁷Hö-ö yik muvhöngö ih nö akaha elmat tö nuk pingangkūö tī Meh i Aikup: rö-ö yik nö köpölōn tö ṙôken nuk miṙēlōn Meh; minôṙô pöri nö im mai, ngam mai Ētöm.

⁸Hayöölen cha pöri Anga-aṅ tö kūö ngam mine-eny Ò: pòn hōten ngam minhôiṅyö re nö akahaiṙen.

⁹Vëkö ngam mai Ētöm inrē Anga-aṅ, ngaich nyôngö angū-ö: ngaich hachō-o cha Anga-aṅ nö lök el tö-aṙū, nö sā lamök el inchōn.

¹⁰Hayööken cha Anga-aṅ inrē, nö ṙā-ang eltī Ò ngam tö sumrīk tö cha: ṙānyen cha nö ṙā-ang im tö kunyahaṅ-elmat.

¹¹Pavtökui yik lā-al cha ngam mak: öthĕngtittak tö ōtre tö cha.

¹²Ṙātö ellōnre cha-a ngaich nö i nuk ṙô ò: tiköknyö nöinyö Ò cha-a.

¹³I lööṙen cha-a nö vaichngö tö nuk la-en Ò: öt höktöre cha-a tö inlēnö re tö Ò.

¹⁴Kiröngö yanālö pöri nö el inchōn: ngaich kalah ngam Tēv, nö el tönyalnyi.

¹⁵Ngaich Anga-aṅ nö kē-ĕkūö cha tö nuk havëkö cha: kētö inyāchö pöri nö ellōn cha.

¹⁶Kunyahaṅ-elmat inrē cha-a tö Môsös nö ik inyöngö: tö Āròn inrē ök töhet nö aṅ in Mā Tēv.

¹⁷Luvënyökūöre ngam tumlat ngaich nö ngeūkten Tātan: kahul tö kui yik hol Apirām inrē.

¹⁸Tōttukūö ngaich ök tameūyö nö in yik hol cha: ṙāpngökūö ök tameūyö ngaich tö yik tötlöök.

¹⁹Vī kun nuā cha-a nö i Hôrep: Ngaich salām ök tö haṙöichö tēv.

²⁰Haṙīngö lanöökö re cha-a: nö im tö sā nuā nyamā kiyôp.

²¹Vaichngö cha-a tö ngam Tēv ngam mahayööken cha: ngam tö pōyen tī tö nuk i Aikup.

²²Pinngangkūö nuk la-en i panam Hem: pinhe-eṅkūö nuk inrē ip mai Ētöm.

²³Lökten Anga-aṅ nö ve-eny re nö piyāingen cha, yē Môsös öre ök atöllö Ò, nö öt söklöre nö i kūö Ò nö i hôi: nö havööngökūö ök lanīnö Ò, ngaich öt halëlngen cha Anga-aṅ.

²⁴Hôṅ, mināichṙô cha-a tök tö vai panam: öt ṙātö-ellōnre nö i ṙô Ò.

²⁵Uyëḵa pöri nö el nuk inrūkui re: ngaich öt hang ṙô ngam Mā Tēv.

²⁶Lökten Anga-aṅ nö hachônglö kël re nö in cha: pòn hòṅ afukngen cha nö el inchōn.

²⁷Pòn hòṅ afukngen yik kūön cha Anga-aṅ, nö in yip pumnāmö tarik: pirātö cha inrē nö i nup panam.

²⁸Hamūltöre cha-a inrē nö ip Pē-alpē-ôr: ngaich nyā tö kētu nö i kupah.

²⁹Ngatī cha-a nö harunnyö lanīnö Ò nö ik la-en re: ngaich ök tö lëlngökūö invah nö lakukköṅnyö nö in cha.

³⁰Söklöre Finehas, akaha fālen inrē: sökngöre ngaich ngam invah tö lëlngökūö.

³¹Ngaich kaheuktu angu-ö in Ò nö lanöökö: i nup tumkölchap nö örheūheu.

³²Vīten Ò cha-a inrē nö tainy nö i nuk mak Meripah lökten Môsös nö chōichngen pòkūö cha.

³³Pò cha nö ahôngen ellōn Ò: ngaich Anga-aṅ nö öt halēnlöṙô re nö kaknyöre.

³⁴Öt piyāingö yik tarik cha-a: nö sā chöngö ngam Mā Tēv tö cha.

³⁵Hamūltöre pöri nö i yik pumnāmö tarik: haköp nuk la-en cha inrē.

³⁶Lök la-en nuk insā tēv cha-a inrē: nuk tö vītöre nö tinngöp cha.

³⁷Hòṅ, kētö yik kūön re cha-a, kikōnyö, kikānö inrē: nö tökētö nö i sī-ö.

³⁸Kitaknyö mahām töt akaha, mahām yik kūön cha kikōnyö, kikānö inrē, nuk kahëtö cha nö i insā tēv aṅ Kanā-aṅ: sum-ôki inrē ngam panam tö mahām.

³⁹Ngatī cha-a nö hachōchi tö nuk la-en re: iṙūhen nö asehtöre nö i nuk vahīṙenre.

⁴⁰Lökten ngam lanīnö ngam Mā Tēv nö hūlökūö nö i tarik ò, ngaich Anga-aṅ nö sa-òkhö yik amin re.

⁴¹Ngaich kēten cha Anga-aṅ nö eltī yik pumnāmö tarik: ngaich yik tö sumrīk tö cha nö hayöngö cha.

⁴²Hakihten cha ngaich yik tö kunyahaṅ-elmat tö cha: ngaich acha-a nö el katòh eltī cha.

⁴³Ṙōlheuh Anga-aṅ nö ṙānyen cha: ngaich pöri cha-a nö mi-ô nö halēnöre, ngaich tumṙeūtu tö kūö ötlanöököre.

⁴⁴Hö-ö pöri Anga-aṅ nö mikūöṙen tö kanihngen cha: yē Ò nö hang ṙô cha nö peuiny.

⁴⁵Köpölōn inrē Anga-aṅ tö ngam kinlēḵngô re nö in cha: havöökūölōnre ngaich iṙôken nup miṙēlōn Ò.

⁴⁶Vīten cha Anga-aṅ inrē nö aṙētu: tö cha yik kamëngen cha nö kaitī.

⁴⁷Ō Mā Tēv, Tēv ih, hayööken ih, hamūlö ih inrē ṙā-ang in yip pumnāmö tarik: öi ha-öiny ngam töhet mine-eny Meh, öi mihôiṅ im inyöngöre tö Meh.

⁴⁸Tökôlò An yēḵ ngam Mā Tēv, ngam Tēv Israĕl, löktökūö ngam tö örheūheu misī, söl môkö inrē! Höknyô yip tarik nö ngô ṙô, Amen, Ha-öiny ngam Mā Tēv yin yēḵ.