Read Car_Nicobarese Salmai 107 Bible Online

Salmai 107 - Car_Nicobarese bible

Salmai 107

¹Ō Ha-öiny ngam Mā Tēv; tön tölöök An: pò ngam neūkölōn nö örheūheu nö köp nö in Ò.

²Hökngen yip tö ṙānyu tö ngam Mā Tēv nö ngatī ṙô: yip ṙahānyö Ò nö ṙā-ang eltī yip tö kunyahā-elmat;

³Ngaich hamūlö cha nö i nup panam: ṙā-ang lā chuhöt, ṙā-ang lā sūng inrē, ṙā-ang lā kapā, ṙā-ang lā lòhngö inrē.

⁴Chavīṙa röön cha-a nö el inchōn, nö el talöökö tönyalnyi: öt kôtökūö cha-a tö el panam elyöngö.

⁵Aheuk, haṙëhenômö inrē: öt kalē-ĕ ellōn cha-a nö inrē.

⁶Ngaich cha-a nö havëkö mine-eny ngam Mā Tēv i kinihngen cha: ngaich Anga-aṅ nö ṙā-nyen cha nö ṙā-ang i nup kanihngen cha.

⁷Hachō-o cha Anga-aṅ inrē nö el tö chip talöökö: pòṅ hōtu cha-a nö chuh el panam tö iyöngö.

⁸Ha-öiny ngam Mā Tēv öre tarik nö ngaich, tö kūö ngam lanöökö Ò: kūö nuk pinngangkūö la-en Ò inrē nö i vē kūön tarik!

⁹Pò Ò nö hatööḵngen tö kalē-ĕ ellōn: hatööḵngen tö kapahare inrē tö tölöök.

¹⁰Yip amūichhak nö el sinngūlö, el nyat kinpaha inrē: tö nyëki nö i kanihngen, i vët inrē.

¹¹Pò cha nö ahôngö ṙô ngam Tēv: öt mikūöṙen inrē tö ngam inlēnö aṅ im Latulöng.

¹²Lökten Anga-aṅ nö tumṙeūtö ellōn cha nö hol tö la-en: fukngö cha-a, ngaich rö-ö nö hōluṙen.

¹³I kanihgen re cha-a nö havëkö ngam Mā Tēv: ngaich Anga-aṅ nö hayööken cha i nup kanihngen cha.

¹⁴Kēnyen cha Anga-aṅ nö ṙā-ang el singūlö, ṙā-ang el nyat kinpaha inrē: litòkngö nuk nyanëk cha inrē nö kö marök.

¹⁵Ha-öiny ngam Mā Tēv öre tarik nö ngaich, tö kūö ngam lanöökö Ò: kūö nuk pinngangkūö la-en Ò inrē nö i vē kūön tarik!

¹⁶Pòn likölngö nuk mās inkūp Anga-aṅ: ngaich ṙatngö nuk vët kālkūö nö kö marök.

¹⁷Kulō-ovkūö nuk tötôichlö fālen cha: kūö nuk öt lanöökö cha inrē, nö kihngen.

¹⁸Sō-o tö sitih cha-a nya-aṅkūö: ngaich cha-a nö röhta nö i kūö inkūp kinpaha.

¹⁹Ngaich cha-a nö havëkö ngam Mā Tēv nö i kanihngen cha: ngaich Anga-aṅ nö ṙānyen cha nö ṙā-ang i nuk kanihngen cha.

²⁰Söömtö ṙô re Anga-aṅ lööken tī tö cha; ṙānyen cha inrē nö ṙā-ang el anūlö.

²¹Ha-öiny ngam Tēv öre tarik nö ngaich, tö kūö ngam lanöökö Ò: kūö nuk pinngangkūö la-en Ò inrē nö i vē kūön tarik!

²²Hökngen cha yēḵ nö kētö nöinyö tökētu: vënyö nup la-en Ò hol ṙô tö tinkökö.

²³Cha-a yip el chōng nö lök el mai: yip tö la-evṙen nö el yöng mai.

²⁴Meuk nup la-en ngam Mā Tēv cha-a: nup aṅ in Ò pinngangkūö el ngam tö-aṙū.

²⁵Pòn chöngu Anga-aṅ, ngaich söklöre ngam kuföt chanôchö: ngam mahachohlö nup ël mai.

²⁶Söl el halīöngö anū-ö nö pakeūönlöng, hēk pakeūönköti nö lataṙeū: paṙööyi nômö cha-a kūö kanihngen re.

²⁷Chahīöra cha-a, sā kinlövö mihiyōi tarik: ngaich nöng öt huveū-en.

²⁸Ngaich cha-a nö havëkö ngam Mā Tēv, i kanihngen re: ngaich Anga-aṅ nö kēnyen cha, nö ṙā-ang i nup kanihngen cha.

²⁹Vītö ngam chanôchö Anga-aṅ nö kalūöng: lökten minë-el mai nö öt halöinyköre.

³⁰Ṙāmölōn cha-a ngaich, pò cha nö öt halöinyköre: ngaich Anga-aṅ nö kēhöt cha nö el sanāṙö öp chūök lōn cha.

³¹Ha-öiny ngam Tēv öre tarik, tö kūö ngam lanöökö Ò: kūö nup pinngangkūö la-en Ò inrē nö i vē kūön tarik!

³²Hökngen cha yēḵ nö hapōilen Ò nö el ṙôngö yip tarik: ha-öinyö Ò inrē el anūichö yip Mā.

³³Havöötö kūö nup tahël An nö el inchōn: nup tö hëmlö mak inrē, el tumlat töyal tö mak;

³⁴Tö ṙôngu panam, vītuṙen nö sāl el tönyalnyi: kūö öt lanöökö cha yip mi-iyöng in e.

³⁵Havāngtö ngam el inchōn Anga-aṅ nö chūök manūlngö mak: ap tönyô panam inrē, nö tö hëmlö mak.

³⁶In e tī Anga-aṅ tö yip tö-aheuk, nö iyöng: pòn hōtu cha-a nö halēn elyöngö el panam.

³⁷Teūich inrē nö el panô-òṅ, teūich vāin inrē: ngaich kē ṙòng u cha-a, tö nup tö ṙūhölre.

³⁸Hakôlò cha Anga-aṅ inrē pòn hōtu nö pōyen nö ṙūhölre ṙôngö: sōtö nup nuā cha Anga-aṅ nö kūönngöreṙen.

³⁹Hēk cha-a nö kūönngöre: sōnhakkūö inrē kūö inkihtenre kanihngen, miṙivlōn inrē.

⁴⁰Hōngtö minṙēngö Anga-aṅ nö i kui yip kūön rācha, ngaich vīten cha nö el töt aṅhaṅvkūö, i chūök tö rö-ö talöökö.

⁴¹Asöklö ngam yāich pöri Anga-aṅ, nö lātulöng tö kanihngen: ngaich vīten ò nö mupīhö, sā kiteūm pököre.

⁴²Meūkö e min yip tö chiplen, ngaich ṙāmölōn: ṙòkhöre inrē min öt lanöökö nö tilupngö elvāng re.

⁴³Yip tö akahaṙa, hangihtöre min tö në: ngaich cha-a min nö ngëichkö miṙēlōn ngam Mā Tēv min.