Read Car_Nicobarese Salmai 115 Bible Online

Salmai 115 - Car_Nicobarese bible

Salmai 115

¹Öt in ih, Ō Mā Tēv, öt in ih, ngam mine-eny Meh pöri tö ha-öinyö: kūö ngam miṙēlōn Meh, kūö ngam kanô-en Meh inrē.

²Kūöyòh ṙöng min vē pumnāmö tarik nö ngö ṙô: Isuh ap Tēv cha töngamuh?

³El halīöngö An pöri ngam Tēv hī: keuheūten An ip töng sitih lōn re.

⁴Rupīö, humlum inrē insā tēv cha: vahīṙen kuntī tarik.

⁵Elvāngu nup, rö-ö pöri anū-ö nö ṙô-òv: mātu nup, rö-ö pöri anū-ö nö meuk;

⁶Nāngu nup, rö-ö pöri anū-ö nö hang: elmëhevö nup, rö-ö pöri anū-ö nö tong;

⁷Këlu nup, rö-ö pöri anū-ö nö ṙāpa: kalröönu nup, rö-ö pöri anū-ö nö kiröönngöre; öt rēhĕn anū-ö nö löknyö el kilööp ṙô nö ṙô-òv.

⁸Höng sā u yip vamī-i u: hòṅ, ṙòkhöre yip mahayönglenre nö in u.

⁹Ō Israĕl, hayönglenre im Mā Tēv: Anga-aṅ An holṙen cha, lanaklö cha inrē.

¹⁰Ō patī Āròn, hayönglenre yin im Mā Tēv: Anga-aṅ An holṙen cha, lanaklö cha inrē.

¹¹Yī-ö tö pa-ekūö tö ngam Mā Tēv, hayönglenre im Mā Tēv, Anga-aṅ An holṙen cha lanaklö cha inrē.

¹²Kūötenre An ngam Mā Tēv tö hī; hakôlò hī An min: hakôlò patī Israĕl An min; hakôlò patī Āròn An min.

¹³Hakôlò cha An min yip tö pa-ekūö tö ngam Mā Tēv: hĕnghöre tö kiröng tö pōyö inrē.

¹⁴Ṙūölö ṙôken yīö An ngam Mā Tēv öi pōi pōilöreṙen: yī-ö, tö yip kūön yīö.

¹⁵Tökôlò yin i ngam Mā Tēv: ngam vamī halīöngö tumlat inrē.

¹⁶Halīöngö ngam Mā Tēv nun minë halīöngö: kētö ngih tumlat pöri Anga-aṅ nö i vē kūön tarik.

¹⁷Rö-ö yin vē kupah nö Ha-öiny ngam Mā Tēv: öt rēhĕn nö hĕngtak tö cha yip chamuh el chūök töt ṙô-òv.

¹⁸Hakôlò ngam Mā Tēv pöri min ayī-ö: töngamuhöten, sölmôkö örheūheu inrē; Ha-öiny ngam Mā Tēv yin.