Read Car_Nicobarese Salmai 116 Bible Online

Salmai 116 - Car_Nicobarese bible

Salmai 116

¹Hāngenlōn chin tö ngam Mā Tēv: pò Ò nö hang minë ṙô chu ve-ekūö Ò.

²Pò Ò nö asītö elnang re nö in chu: lökten chin havëken Ò i rô-òten chu aṅ.

³Havīlöng chū-ö tö minë tökuvaha kinpaha; ngaich ngam chanökö el anūlö inrē nö kirūmö chu: kôtökūö chin tö kanihngen, miṙivlōn inrē.

⁴Ngaich chū-ö havëkö minë-eny ngam Mā Tēv: Ō Mā Tēv, ve-ekūö meh chin ṙānyö ngih nômö chu.

⁵Tö aṙē-ĕlōn An ngam Mā Tēv, tölöök inrē: hôṅ, tö aṙē-ĕlōn An ngam Mā Tēv hī.

⁶Aṅtö töt akahaṙa An ngam Mā Tēv: tumṙeūtu chū-ö ngaich hayöölen chu Anga-aṅ.

⁷Ō Me-eṅ nômö chu, havan man im haneūheure: tön öt milipkötīre An ngam Mā Tēv nö in Meh.

⁸Pò Meh ngaich ṙānyö ngih nômö chu ṙā-ang im kinpaha: në mat chu, ṙā-ang i mak mat, në kalröön chu, ṙā-ang fanukngö.

⁹Lök i kūö ngam Mā Tēv chin min: i panam tö aṅ.

¹⁰Ngö ṙô chin, ṙātö ellōn re chin: pōyen kanihten chin.

¹¹Ngö ṙô chin i pinhe-eṅ kūö re: ṙòkhöre tarik nöng minyôny.

¹²Asuh ap min tī chu im Mā Tēv: tö kūö nup tī Ò inkôlò nö in chu?

¹³Kē ngam chūök òk inyööken chin min: ngaich havëkö mine-eny ngam Mā Tēv.

¹⁴Kētö nup tö chūöku chin min kinlēḵngô re im Mā Tēv: hôṅ i kūö yip tarik Ò nö ṙòkhöre.

¹⁵Tölöök An nö i kūö ngam Mā Tēv: ngam kinpaha yip töhet aṅ in Ò.

¹⁶Ō Mā Tēv, kô-en chin tarik Meh: tarik Meh chin, kūön öp tarik Meh kikānö; ngāchö tī Man luhngö në nyanëk chu.

¹⁷Kē-ĕkūö Meh chin min, tö ngam tökētu nöinyö: ngaich havëkö mine-eny ngam Mā Tēv min.

¹⁸Kētö ap tö chūöku chin min kinlēḵngô re im Mā Tēv: hôṅ, i kūö yip tarik Ò nö ṙòkhöre.

¹⁹El mikūkö ngam patī ngam Mā Tēv: ellōn meh, Ō Yērusalem. Ha-öiny ngam Mā Tēv yin.