Read Car_Nicobarese Salmai 118 Bible Online

Salmai 118 - Car_Nicobarese bible

Salmai 118

¹Ō Ha-öiny ngam Mā Tēv; tön tölöök An: pò ngam neūkölōn Ò nö köp nöng örheūheu.

²Hökngen Israĕl nö ngö ṙô tö Meh: Tö ngam neūkölōn Ò nö köp nöng örheūheu.

³Hökngen ngam patī Āròn nö ngö ṙô töngamuh: Tö ngam neūkölōn Ò nö köp nöng örheūheu.

⁴Hökngen cha töngamuh, yip tö pa-ekūö tö ngam Tēv, nö ngö ṙô: Tö ngam neūkölōn Ò nö töng örheūheu.

⁵Havëkö ngam Mā Tēv chin i kanihngen re: sapṙô chu ngaich ngam Mā Tēv, asöklen chu ngaich nö el tö pōiti chūökö.

⁶Lā in chu An ngam Mā Tēv; öt hō chin min pa-ekūö: suh kanô-òṅ tarik nö in chu?

⁷Lā in chu An ngam Mā Tēv, nö in yip holṙen chu: lökten chin min meuk lōn re in cha yip tö sumrīk tö chu.

⁸Ĕhten an ngam inyönglen nö im Mā Tēv: tö ngam nyanatlö i tarik.

⁹Ĕhten an ngam inyönglen nö im Mā Tēv: tö ngam nyanatlö i kūö rācha.

¹⁰Ṙòkhöre yin vē pumnāmö tarik nö havīlen chu: i mine-eny ngam Mā Tēv pöri chū-ö rökngen cha.

¹¹Havīlen chu yin, havīlen chu yin: i mine-eny ngam Mā Tēv chū-ö min rökngen cha.

¹²Havīlen chu yin sā nup kilamta-ō; hanyāngi yin sā nup tameūyö tö öktikūö i kūö chōn: i mine-eny ngam Mā Tēv chū-ö min rökngen cha.

¹³Kalē-ētī me-eṅ kuringten chu, pò chu hōtu fukngö: holṙen chu pöri ngam Mā Tēv.

¹⁴Ngam Mā Tēv pöri kumlēḵ chu, tinkökö chu inrē: vītöre An inrē nö inyööken chu.

¹⁵El inrūkui yip tölöök ap ṙô ṙanāmölōn, inyööken inrē: tī tö öt pinhe-eṅkūö an ngam lahāmö ngam Mā Tēv.

¹⁶Hapōilöng an ngam lahāmö ngam Mā Tēv: tī tö öt pinhe-eṅkūö an ngam lahāmö ngam Mā Tēv.

¹⁷Öthō chin min kapah, aṅ pöri: ngaich ve-eny nup la-en ngam Mā Tēv.

¹⁸Chökhutī An ngam Mā Tēv, nö chökṙen chu: hö-ö pöri Anga-aṅ nö kēten chu im kinpaha.

¹⁹Löpnyökūö minë inkūp lanöökö in chu: hòṅ kuhēthötre chin ël u, hòṅ Ha-öiny ngam Mā Tēv chin.

²⁰Ngih ön yih inkūp ngam Mā Tēv: kuhēthötre yip tölöök min nö ël e.

²¹Ha-öinyö Meh chin min, pò Meh sap ṙô chu: ngaich Öm inyööken chu.

²²Ngam ihong tö so-òv tö yip mamānö: vītöre nö yöngkūö sinkeukngö.

²³Tī ngam Tēv an angū-ö: pinngangkūö elmat hī An.

²⁴Angū-ö an sakāmö vahī ngam Mā Tēv: ṙāmölōn in min in e.

²⁵Ve-ekūö Meh in, Ō Mā Tēv, hayööken ih töngamuh: vē-ekūö Meh in Ō Mā Tēv, Öm tīntö kanôlò töngamuh.

²⁶Tökôlò An ngam yamih nö i mine-eny ngam Mā Tēv: hakôlò Meh in tö aṅ el patī ngam Mā Tēv.

²⁷Ngam Mā Tēv An Tēv, kētö hanātö An nö in hī: nyëk ngam tökētu tökuvaha, i sinrōl ngam tahāklö tī.

²⁸Me-eṅ Man Tēv chu, ha-öinyö Meh chin min: Me-eṅ Man Tēv chu, hapōilen Meh chin min.

²⁹Ō Ha-öiny ngam Mā Tēv; pò Ò nö tölöök: pò ngam neūkölōn Ò nö örheūheu nö köp.