Read Car_Nicobarese Salmai 119 Bible Online

Salmai 119 - Car_Nicobarese bible

Salmai 119

¹Tökôlò yin vē tö teung nö el talöökö: vē lamök im chöngö ngam Mā Tēv.

²Tökôlò yin vē mahaköp në chöngö Ò: vē chamöhan nö keuheūttö ellōn re.

³Hôṅ, rö-ö yin cha-a nö la-en tö töchōich: lök el minë talöökö Ò yin.

⁴Tölṙô ih Man ngaich i në chöngö: pò ih hōtu haköpö u pētngen.

⁵Mah, haköpi nun öre në talöökö chu: nö inköpkö minë chöngö Meh.

⁶Ngaich öt sirōngkūö öre chū-ö: yē chu milēḵ tö në chöngö Meh.

⁷Ha-öinyö Meh chin min hol tö tö chiplö ellōn: yē chu haköp ngam tö chip inkaha aṅ in Meh.

⁸Haköpkö minë chöngö Meh chin min: uh chin yēḵ keuheutngöre ṙa-ayö.

⁹Aṅtī tö yòh ang ngòh ṙāl tarik nö ahetlö el talöököre? Höng ngam inṙēmngen nö sā ngam ṙô meh.

¹⁰Chöhö Meh chin keuheūttö ellōn re: Ō, uh chin yēḵ kānngöre tö minë chöngö Meh.

¹¹Halinngen ngam ṙô Meh chin ellōn re: pò chu sōḵ köölö fālen in Meh.

¹²Ō Mā Tēv, Tökôlò Man: haköpten chu Man tö minë chöngö Meh.

¹³Vënyö nup inkaha fālen chin nö ṙòkhöre, aṅ elvāng Meh: nö löknyö në minuh chu.

¹⁴Ṙāmölōn chin i talöökö minë chöngö Meh: sā re tö kanôlò.

¹⁵Piṙūtkö minë chöngö Meh chin min: milēḵ inrē tö minë talöökö Meh.

¹⁶Kumchikngenre chin min i minë chöngö Meh: öt hō öich vaichngö töm ṙô Meh.

¹⁷Pōyen tī Man i ngòh kūön re, hòṅ chu aṅ: hòṅ chu min haköp ngam ṙô Meh.

¹⁸Löpnyökūö në mat chu: hòṅ chu meuk nup pinngangkūö aṅ im chöngö Meh.

¹⁹Töt ngöhaka chin ing panam: un hanyāti minë chöngö Meh nö in chu.

²⁰Lakuk ön ngih ellōn chu: tö kūö mineūka nö i minë inkaha fālen aṅ in Meh, nö marô-òten.

²¹Vëkö yip mahakeūlenre Man ngaich, yip tö ngaich nö ötkôlò: yip kamānngöre tö minë chöngö Meh.

²²Kēngö ngam minṙēngö nö ṙā-ang in chu: tön haköp në chöngö Meh chin.

²³Ūichhak inrē yip kūön rācha ngaich chōchô nö lā in chu: piṙūtkö minë chöngö Meh pöri ngòh kūön Meh.

²⁴Ööi chu inrē minë chöngö Meh: mahalēnö chu inrē.

²⁵Tanti ön ngih nômö chu nö el tumlat: ha-aṅhaṅ chu Man sā ngam ṙô Meh.

²⁶Vënyö në talöököre chin, ngaich Me-eṅ sapṙô chu: haköpten chu tö minë chöngö Meh.

²⁷Vīten chu akaha-elmat tö talöökö minë chöngö Meh: hòṅ chu min piṙūtkö nup pinngangkūö la-en Meh.

²⁸Paṙööyi nômö chin tö kūö lumngan: hangëken chu Man yēḵ sā ngam ṙô Meh.

²⁹Kēnyen chu ṙā-ang i minyôiny: aheūkölōn kētö ngam chöngö Meh nö in chu.

³⁰Atöllö ngam talöökö kanô-en chin: i kūö re tī chin tö minë inkaha fālen aṅ in Meh.

³¹Haköpngö re chin i minë chöngö Meh: Ō Mā Tēv, uh chin yēḵ sumrōngikūö.

³²Lök el talöökö minë chöngö Meh chin min fal: yē Meh min ṙūönyö ṙôktö ellōn chu.

³³Ō Mā Tēv, haköpten chu tö talöökö minë chöngö Meh: ngaich chū-ö min haköpö e söl ip manā-aṅ.

³⁴Kētö mikah elmat chu, ngaich haköp ngam chöngö Meh chū-ö min: hôṅ, haköpken e chin min keuheūttö ellōn re.

³⁵Kiröönngen chu el kanröönö minë chöngö Meh: tön in e chin ööire.

³⁶Hachōtö ellōn chu i minë chöngö Meh: un im yinikhanga.

³⁷Havööngökūö chu ṙā-ang i nginëichkö chanök alaha: ha-aṅhaṅ chu el minë talöökö Meh.

³⁸Haköpngö ngam ṙô Meh i ngòh kūön Meh: ngòh tö pa-ekūö tö Meh.

³⁹Havööngökūö ngam minṙēngö chu, ngam pinhe-eṅ kūö chu: tön tölöök an ngam inkaha fālen aṅ in Meh.

⁴⁰Yĕh meuk, yīkölōn chin tömrit minë chöngö Meh: ha-aṅhaṅ chu im lanöökö Meh.

⁴¹Ō Mā Tēv, hökngen minë neūkölōn Meh yēḵ nö yih nö in chu: ngam inyööken aṅ in Meh, sā ngam ṙô Meh.

⁴²Hòṅ chu min sapṙô ò, ngam mumṙēngen chu: tön hayönglenre chin in Meh.

⁴³Un kē-ĕyö nö ahāti ngam ṙô kanô-en nö elvāng chu: tön maheūṅku chin im inkaha fālen aṅ in Meh.

⁴⁴Ngaich ngati chū-ö min iṙūhen höng örheūheu: haköpkö në chöngö Meh.

⁴⁵Lök im chunhëṅṙen röön re chin min kiröönngöre: pò chu chöh minë chöngö Meh.

⁴⁶I kūö rācha chin min inrē kakkö në chöngö Meh:

⁴⁷Hanyamngen re chin min i në chöngö Meh: në hanāngen chu.

⁴⁸Hachônglö në kël re chin inrē i në chöngö Meh, në hanāngen chu: piṙūta chin min i në chöngö Meh.

⁴⁹Köpölōn tö ṙô re i ngòh kūön re: tön vīten chu Man meūka.

⁵⁰Angū-ö ön inṙamlōn chu hē el kanihngen chu: pò ngam ṙô Meh nö ha-aṅhaṅ chu.

⁵¹Pōyen pinhe-eṅkūö tī yip mahakeūlenre tö chu: hö-ö pöri chū-ö kānköre töm chöngö Meh.

⁵²Ō Mā Tēv, köpölōn chin tök misī inkaha fālen aṅ in Meh: ngaich öich haṙamkölōn re.

⁵³Pinhe-eṅkūö öp in chu: pò yip tötlöök ṙamā-ang chöngö Meh.

⁵⁴Höng tinkökö chu nun minë chöngö Meh: el öp patī chu chöh töhet.

⁵⁵Ō Mā Tēv, köpölōn chin tö ngam mine-eny Meh tö el hatööm: ngaich öich haköpkö ngam chöngö Meh.

⁵⁶Angū-ö inkôlò in chu: pò chu haköpkö minë chöngö Meh.

⁵⁷Minchööḵö chu An ngam Mā Tēv: ngāchô chin tö re min öich haköpkö në ṙô Meh.

⁵⁸Keuheūttö ellōn re chin havëkö inṙētöre in Meh: aheūkölōn yēḵ tö chu, sā ngam ṙô meh.

⁵⁹Fēkö el talöökö re chin: ngaich kētö re i minë chöngö Meh.

⁶⁰Kurāten chin, öt ahāṅken re: öich haköpkö në chöngö Meh.

⁶¹Vinngö vinöönö chin tö në tökuvaha vē tötlöök: hö-ö pöri öich vaichngö tö ngam chöngö Meh.

⁶²Choholre chin tö chūölhatööm öich ha-öinyö Meh: pò ngam tö chip inkaha fālen aṅ in Meh.

⁶³Nôlö yip tö pa-ekūö chin tö Meh nö ṙòkhöre: acha-a inrē yip mahaköpkö chöngö Meh.

⁶⁴Ō Mā Tēv, tööḵlö ön ngih panam tö neūkölōn Meh: haköpten chu Man tö minë chöngö Meh.

⁶⁵Löökö tī Man i ngòh kūön re, Ō Mā Tēv: sā ngam ṙô Meh.

⁶⁶Haköpten chu tö ngam tölöök inkaha fālen, mikah inrē: tön ṙātö-ellōn re chin i në chöngö Meh.

⁶⁷Urĕh chin sin kihten ngaich lōngen: ngaich chin töngamuh haköpkö në chöngö Meh.

⁶⁸Tölöök Man Me-eṅ, tölöökö tī inrē: haköpten chu tö minë chöngö Meh.

⁶⁹Vī minyôiny yin vē mahakeūlenre nö lā in chu: keuheūttö ellōn re pöri chū-ö haköp në chöngö Meh.

⁷⁰Sā inpūöṙö ta-öng nup ellōn cha, tö sumngöö re: tö ööire pöri chū-ö tö ngam chöngö Meh.

⁷¹Tölöök an nö in chu öch hakihten re sin: hòṅ chu haköp në chöngö Meh.

⁷²Mötlö an ngam chöngö ngam elvāng Meh nö in chu: tö tököṅnyu humlum, rupīö inrē.

⁷³Vī-i chu nun minë kël Meh, hachōḵngö inlaha chu inrē: kētö mikah-elmat chu hòṅ chu haköp në chöngö Meh.

⁷⁴Meūkö chu min yip tö pa-ekūö tö Meh, ngaich ṙāmölōn: pò chu maheūṅkku im ṙô Meh.

⁷⁵Ō Mā Tēv, akahalōn chin tö minë inkaha fālen aṅ in Meh nö tö chip: tö Meh inrē im kanô-en re hakihten chu.

⁷⁶Ve-ekūö Meh chin, hökngen ngam hanāngen neūkölōn Meh nö inṙamlōn chu: sā ngam ṙô Meh i ngòh kūön re.

⁷⁷Hökngen minë miṙēlōn Meh nö yih nö in chu, hòṅ chu aṅ: tön ööi chu aṅ ngam chöngö Meh.

⁷⁸Hökngen yip mahakeūlenre yēḵ nö sirōngkūö; tön kavalngen chu yip nö vaich: piṙūtkö minë chöngö Meh pöri chū-ö min.

⁷⁹Hökten cha yip tö pa-ekūö tö Meh nö havöötöre nö in chu: hòṅ cha min nö akahakūö tö minë chöngö Meh.

⁸⁰Hökngen ngih lōn chu nö teung nö i minë chöngö Meh: hòṅ chu öt sirōngkūö.

⁸¹Tayēṙö el lōn chin tö kūö lōn re töm inyööken: im ṙô Meh pöri chū-ö meūka.

⁸²Paṙeūmi elmat chū-ö tö kūölōn re töm ṙô Meh: yē chu ngö ṙô, Ĕhē Öm min haṙamlōn chu?

⁸³Pò chu vītöre sā uk chūök mak el lul: hö-ö pöri chū-ö vaichngö tö minë chöngö Meh.

⁸⁴Am nup sakāmö ngòh kūön Meh: ĕhē Öm min akah fālen cha vē töt mahakôlò chu?

⁸⁵Ul anūlö chu yin vē mahakeūlenre: vē töt tamömrit ngam chöngö Meh.

⁸⁶Ṙòkhöre nun minë chöngö nö tö kô-en: vaich cha-a nö öt hakôlò chu; holṙen chu Me-eṅ yēḵ!

⁸⁷Öhtö keuheūt yin tö chu, nö i kūö ngih panam: hö-ö pöri chū-ö ṙāngö minë chöngö Meh.

⁸⁸Ha-aṅhaṅ chu, sā ngam hanāngan neūkölōn Meh: hòṅ chu min haköp minë chöngö nö elvāng chu.

⁸⁹Ō Mā Tēv, örheūheu an ngam ṙô Meh: nö köpngö nö el halīöngö.

⁹⁰Ngam kanô-en Meh nö i vē tumkölchap nö ṙòkhöre haköpngö ngam tumlat Man, ngaich köp angū-ö.

⁹¹Köp nun tö töngamuh sā minë chöngö Meh: pò në taṙòkhöre nö kūön Meh.

⁹²Yĕn öt ööi chu öre ngam chöngö Meh: ngaich chū-ö öre ötkôlò i kanihngen re.

⁹³Öthō chin vaichngö min tö në chöngö Meh: pò Meh aṅtī tö u ha-aṅhaṅ chu.

⁹⁴Me-eṅ meh chin, hayööken chu: tön chöh minë chöngö Meh chin.

⁹⁵Höngöre yin vē tötlöök nö hòṅ fëlngen chu: ngëichkö minë chöngö Meh pöri chū-ö min.

⁹⁶Ngaich chin meuk manāngen nup tö teung: pōiti pöri ngam chöngö Meh.

⁹⁷Ō, Yöng hanāngen chu töm chöngö Meh! Angū-ö an piṙūtkö chu i el në sakāmö nö ṙòkhöre.

⁹⁸Akaha chin tö vē lā-al re tökūö tī minë chöngö Meh: pò u nö örheūheu nö in chu.

⁹⁹Mööḵlö mikah elmat chin tö vē haköptöre nö ṙòkhöre: pò minë chöngö Meh nö anū-ö piṙūtkö chu.

¹⁰⁰Mötlö mikah elmat chin tö vē tö köiny: pò chu haköp në chöngö Meh.

¹⁰¹Ṙā-ang röön re chin el nup talöökö: pò chu haköp ngam ṙô meh.

¹⁰²Hö-ö chin kānköre ṙā-ang minë inkaha fālen aṅ in Meh: pò Meh haköpten chu.

¹⁰³Iṙôkö kumchikkūö öich tö pinchākö minë ṙô Meh: hôṅ, mötlö pinchākö tö höni nö elvāng chu.

¹⁰⁴Lökten i minë chöngö Meh chin teūngen tö mikah elmat: lökten chin surīkhö tö minyôiny talöökö.

¹⁰⁵Ëāṅvö röön chu an ngam Ṙô Meh: hanātö inrē nö el kanröönö chu.

¹⁰⁶Kilēḵngô re chin, ngaich haköpngö e: tö chu min haköp minë tö chip inkaha fālen aṅ in meh.

¹⁰⁷Kiröngö inkihten chin: Ō Mā Tēv, ha-aṅhaṅ chu sā ngam ṙô Meh.

¹⁰⁸Ō Mā Tēv, ve-ekūö Meh chin, hō Man yēḵ tö në tökētu kanahanglōn chu: haköpten chu inrē tö në inkaha fālen aṅ in Meh.

¹⁰⁹Örheūheu an ngam nômö chu nöng eltī chu: ngaich sön öich öt vaichngö töm chöngö Meh.

¹¹⁰Ṙātö tinngöp chu ön ngòh tötlöök: sönen chū-ö ötlō-ongkūö ṙā-ang i minë chöngö Meh.

¹¹¹Kē minë chöngö Meh chin nö amin chu nö örheūheu: pò u nö anū-ö ṙanāmölōn chu.

¹¹²Harôntö ellōn re chin öich hateung në chöngö Meh: örheūheu, söl ip manā-aṅ.

¹¹³Surīkhö yip tö nët kang ellōn chin: hāngenlōn pöri chū-ö tö ngam chöngö Meh.

¹¹⁴Chūök chu Man Me-eṅ hayunngöre; lanaklö chu inrē: im ṙô Meh chin meūka.

¹¹⁵Kē-ĕngre yin tö chu, yī-ö tö la-evṙen tö tötlöök: hòṅ chu haköp në chöngö ngam Tēv chu.

¹¹⁶Ṙapken chu sā ngam ṙô Meh, hòṅ chu aṅ: uh öich hökiṙen sirōngkūö töp maheūṅkkö re.

¹¹⁷Kichöötlen chu lātulöng hòṅ chu öt palā-aiṙen: ngaich iṙuhen öich milēḵṙen tö minë chöngö Meh.

¹¹⁸Töng ranö-ö yin tö tī Meh, vē tö vaich nö i minë chöngö Meh: pò nup michīl cha nö minyôiny.

¹¹⁹Ṙòkhöre yip tötlöök nö ṙā-aiṙen tö Meh nö ing panam sā sīk vët: lökten chin hangenlōn tö minë chöngö Meh.

¹²⁰Kichëyöre ön ngih alaha chu kūö pinheṅ-eṅkūö tö Meh: ngaich chū-ö pa-ekūö tö minë inkah fālen aṅ in Meh.

¹²¹Keuheūten chin im inkaha fālen, kinṙôka inrē: uh chin hökiṙen i më mahakihten chu.

¹²²Me-eṅ yēḵ ṙënngö ngòh kūön re im tölöök: un hökiṙen ngam mahakeūlenre nö hakihten chu.

¹²³Öt meuk nun në mat chu kūö ngam inyööken aṅ in Meh: kūö ngam tölöök ṙô Meh inrē.

¹²⁴Sā ngam miṙēlōn re tī Man i ngòh kūön re: haköpten chu inrē tö minë chöngö Meh.

¹²⁵Kūön Meh chin, kētö mikah elmat chu: hòṅ chu akahakūö tö minë chöngö Meh.

¹²⁶Ngaich an nö ṙētak ngam Mā Tēv nö kētöre: pò cha nö harööḵngen ngam chöngö Meh.

¹²⁷Lökten chin hāngenlōn tö minë chöngö Meh: tulöng tö humlum, hôṅ, tulöng tö tövai humlum.

¹²⁸Lökten chin pōilö lōn tö minë chöngö Meh, i nup töng chip nö ṙòkhöre: surīkhö nup talöökö minyôiny chin.

¹²⁹Pinngangkūö nun minë chöngö Meh: lökten ön ngih lōn chu nö haköpö u.

¹³⁰Kētö hanātö an ngam kanaknyö ṙô Meh: kētö mikah elmat töt akaha inrē.

¹³¹Pōiti elvāng chin vā-ainykūö re: uhā-a nômö ngaich, pò chu yīkölōn tö minë chöngö Meh.

¹³²Havöötökūö re Man yēḵ in chu, aṙē-ĕlōn inrē tö chu: sā tī Meh ṙung in cha yip tö hāngenlōn tö ngam mine-eny Meh.

¹³³Halēntö vāngö chu im ṙô Meh: un höktu öt lanöökö nö hayöngö chu.

¹³⁴Ṙānyen chu ṙā-ang el inkihten tö tarik: hòṅ chu min haköp në chöngö Meh.

¹³⁵Hayangtö kūö re Man yēḵ i kui ngòh kūön re: haköpten chu inrē tö minë chöngö Meh.

¹³⁶Sā röön mak tahël nun në mak mat chu: pò cha nö öt haköp në chöngö Meh.

¹³⁷Ō Mā Tēv, tö chip Man Me-eṅ: chiplö inrē ngam inkaha fālen nö in Meh.

¹³⁸Hachöngten minë chöngö Man nö im lanöökö: im kanô-en takô inrē.

¹³⁹Keuheūt chin ngaich kā-ayö, tö kūö ngam kumlēḵ lōn re: pò vē vē lā-al chu nö vaichngö tö minë ṙô Meh.

¹⁴⁰Töhet takô an ngam ṙô Meh: lökten ngam Kūön Meh nö hāngen tö e.

¹⁴¹Kūönö chin, ha-āchiṙen inrē: hö-ö pöri öich vaichngö tö minë chöngö Meh.

¹⁴²Ngam lanöökö Meh: töt chanuhuvṙen an nö lanöökö: kanô-en ngam chöngö Meh inrē.

¹⁴³Lökö chin tö kanihngen ellōn, chanökö inrē: söönen minë chöngö nö ööi chu.

¹⁴⁴Örheūheu nun minë chöngö Meh nö chip: kētö mikah elmat chu, ngaich aṅ chū-ö min.

¹⁴⁵Ō Mā Tēv, sapṙô chu; havëken Meh chin keuheūt tö ellōn re: haköp minë chöngö Meh chin.

¹⁴⁶Havëken Meh chin: hayööken chu, hòṅ chu min haköp në chöngö Meh.

¹⁴⁷Urēhĕkūö minlīlö peuheū chin, öich havë-a: i minë ṙô Meh chin meūka.

¹⁴⁸Urēhĕlmat chin tö amahtö hatööm: pò chu hòṅ piṙūtkö ngam ṙô Meh.

¹⁴⁹Hang ṙô chu, sā ngam hanāngen neūkölōn: Ō Mā Tēv, ha-aṅhaṅ chu, sā ngam inkaha fālen aṅ in Meh.

¹⁵⁰Ṙūötöre yin vē tamömrit öt lanöökö: marôvat yin tö ngam chöngö Meh.

¹⁵¹Ō Mā Tēv, röhta Man Me-eṅ: ṙòkhöre inrē në chöngö Meh nö tö kô-en.

¹⁵²Misī-iten chin akahalōn, lökten i minë chöngö Meh: tö Meh Öm vīten u nöng örheūheu.

¹⁵³Ngëichkö në kanihngen chu, ngaich ṙānyen chu: tön öt vaichngö chin tö ngam chöngö Meh.

¹⁵⁴Ve-elkui chu, ṙānyen chu inrē: ha-aṅhaṅ chu sā ngam ṙô Meh.

¹⁵⁵Marôvat an ngam inyööken tö ngam tötlöök; pò cha nö öt chöh minë chöngö Meh.

¹⁵⁶Ō Mā Tēv, kiröng nun në miṙēlōn Meh: ha-aṅhaṅ chu sā minë inkaha fālen aṅ in Meh.

¹⁵⁷Maṙôngö yip mahakihten chu, yip lā-al chu inrē: sönen pöri chū-ö öt kānköre ṙā-ang i minë chöngö Meh.

¹⁵⁸Ngëichken vē tö tī tö öt kanô-en chin, ngaich haṙivlōn: pò cha nö öt haköp ngam ṙô Meh.

¹⁵⁹Ngëichkö hanāngen chu, tö minë chöngö Meh; ha-aṅhaṅ chu, Ō Mā Tēv: sā ngam hanāngen neūkölōn Meh.

¹⁶⁰Kanô-en an ngam ṙôken ngam ṙô Meh: ṙòkhöre nup inkaha fālen aṅ in Meh nö örheūheu nö köp.

¹⁶¹Öt chööḵnyu vē kūön rācha nö hakihten chu: sökhak pöri ngih ellōn chu nö pa-ekūö tö minë ṙô Meh.

¹⁶²Ṙāmölōn chin im ṙô Meh: sā öp tö kôtökūö tö pôḵ re tö töpōyen.

¹⁶³Surīkhö minyôiny chin; sa-òkhö e inrē: hāngen pöri töm chöngö Meh.

¹⁶⁴Satköti heuh chin ha-öinyö Meh i töhĕng sakāmö: pò minë tölöök inkaha fālen aṅ in Meh.

¹⁶⁵Kirööngen lanāmö yin vē töhāngen töm chöngö Meh: ngaich öt hētu cha-a nö kavē-ĕre.

¹⁶⁶Ō Mā Tēv, meūkkö ngam inyööken chin: ngaich keuheūten i në chöngö Meh.

¹⁶⁷Haköpkö në chöngö Meh ön ngih ellōn chu: sāṙaklöng hanāngen chin tö u.

¹⁶⁸Haköpkö minë chöngö Meh chin: pòn i kūö chu minë talöökö Meh nö ṙòkhöre.

¹⁶⁹Ō Mā Tēv, hökngen ngam ṙô chu havë-a nö röhta nö i kūö Meh: kētö mikah elmat chu, sā ngam ṙô Meh.

¹⁷⁰Hökngen nup ṙô chu ve-elkui nö sölta nö in Meh: ṙānyen chu sā ngam ṙô Meh.

¹⁷¹Hökngen në minuh chu nö ṙô tö nöinyö Meh: tön haköpten chu Man tö minë chöngö Meh.

¹⁷²Hökngen ngam litāk chu nö tikökngö ngam ṙô Meh: pò minë chöngö Meh nö tölöök.

¹⁷³Höngöre an yēḵ ngam kël Meh nö holṙen chu: tön atöllö minë chöngö Meh chin.

¹⁷⁴Yīkölōn chin tö inyööken aṅ in Meh, Ō Mā Tēv: ngam chöngö Meh an ööi chu inrē.

¹⁷⁵Hökngen ngam nômö chu nö aṅ, ngaich ha-öinyö meh min angū-ö: hökngen minë inkaha fālen aṅ in Meh nö holṙen chu inrē.

¹⁷⁶Lō-ongkūö chin sā tö chatngen sīṅp: chöh ngòh kūön re Man yēḵ tön öt vaichngö chin tö në chöngö Meh.