Read Car_Nicobarese Salmai 135 Bible Online

Salmai 135 - Car_Nicobarese bible

Salmai 135

¹Ha-öiny ngam Mā Tēv yin, Ha-öiny ngam mine-eny ngam Mā Tēv: ha-öinyan, Ō yī-ö tarik ngam Mā Tēv.

²Yī-ö samökhaka el patī ngam Mā Tēv: el milūkö ngam patī ngam Mā Tēv hī.

³Ha-öiny ngam Mā Tēv yin; tön tölöök An ngam Mā Tēv: tiköknyö nöinyö ngam mine-eny Ò: tön angū-ö an tö vai.

⁴Pò ngam Mā Tēv nö atöllen Yāköp nö tarik Ò: Israĕl inrē nö tarik Ò.

⁵Pò chu akahalōn tö ngam Mā Tēv nö tökiröng: tö ngam Mā Tēv hī tö tulöng tö taṙòkhöre tēv.

⁶Öp tölöök lōn ngam Mā Tēv, ngaich angū-ö tī Ò: el halīöngö, el tumlat, el mai, el ngam tö-aṙū inrē.

⁷Vītö nup hanusngö anga-aṅ nö yônlö löklö manā-angkūö ngam tumlat: vī hanyālö ngam kumrah Anga-aṅ; kētö kuföt Anga-aṅ nö ṙā-ang öp chūök re.

⁸Ngam tö kapaha tī tö yik lanòh i Aikup: tarik, hĕnghöre töṙeūla inrē.

⁹Tīntö minkahngö Anga-aṅ, pinngangkūö inrē, nö in Meh, Ō Aikup: in Fërō, in yik tarik ò inrē nö ṙòkhöre.

¹⁰Ngam famòhtö kui pumnāmö tarik: tö kiröng rācha inrē;

¹¹Sihòn rācha yik aṅ Pāsan: ṙòkhöre inrē pūlngö aṅ Kanā-an.

¹²Ngaich kētö öp panam cha nö amin: nö amin Israĕl öp tarik Ò.

¹³Ō Mā Tēv, köp an ngam mine-eny meh nö örheūheu: Ō Mā Tēv, inköpkölōn tö Meh i tumkölchap.

¹⁴Pò ngam Mā Tēv min nö akah fālen vē tarik re: ngaich havöörit lōn re min nö i vē tarik re.

¹⁵Rupīö, humlum nun në insā tēv vē pumnāmö tarik: vahīṙen kuntī tarik.

¹⁶Elvāngu nun, öt meuk pöri: mātu nun, öt meuk pöri;

¹⁷Nāngu nun, öt hang pöri: öt rēhĕn nö unhômu nö elvāng re.

¹⁸Höng sā u yip cha-a, yip vamī-i u: hôṅ, ṙòkhöre yip mahayönglenre nö in u.

¹⁹Ō yī-ö aṅ patī Israĕl, hakôlò ngam Mā Tēv: Ō yī-ö aṅ patī Āròn, hakôlò ngam Mā Tēv.

²⁰Ō yī-ö aṅ patī Lēvi, hakôlò ngam Mā Tēv: yī-ö tö pa-ekūö tö ngam Mā Tēv, hakôlò ngam Mā Tēv.

²¹Tökôlò An yēḵ ngam Mā Tēv nö i Siyôn: ngam mi-iyöng Yērusalem. Ha-öiny ngam Mā Tēv.