Read Car_Nicobarese Salmai 139 Bible Online

Salmai 139 - Car_Nicobarese bible

Salmai 139

¹Ō Mā Tēv, ngaich Man kiluhu chu: ngaich akahakūö tö chu.

²Akahalōn Man tö anūichngö chu, chanôhòlchu inrē: marôvat Me-eṅ Öm akah ellōn chu.

³Kiluh el kanröönö chu Man, el chūök ṙanôlngö chu inrē,: tö ulòhten Man inrē i në talöökö chu.

⁴Ölnyi ap ṙô nö i rōi litāk chu: ngaich pöri, Ō Mā Tēv, Me-eṅ keuheūtlöre mikahlōn tö e.

⁵Lā uk chu Man, lā kūö chu inrē: Öm kētö tī re in chu.

⁶Pingangkūö chin tö tö ngatī mikah: marô-òlchūök an, öt kô chin söl in e.

⁷Isuh kū-ö öich kô ṙāngö Fanöinylö Meh: hēk kū-ö tö yih falngöre tö ngam kūö Meh?

⁸Yē chu yônlö el halīöngö, umuh Me-eṅ: yē chu haṙĕhtö chamam re el anūlö, yĕh meuk umuh Me-eṅ.

⁹Yē chu haveutngöre im minlīlö peuheū: öich ip manā-angkūö ngam mai, ngaich iyöng in e,

¹⁰Sön ngam kël Meh nö hachō-o chu: ṙapken chu inrē ngam lanāmö kël Meh.

¹¹Yē chu ngö ṙô, Nyatngö chin tö ngam sinngūlö ngaich ngam hanātö mahavīlen chu, nöng hatööm.

¹²Öt hanyatngen chu an tö Meh ngam sinngūlö, hat pöri ngam hatööm nö sā sakāmö: hĕngren nun tö sinngūlö tö hanātö inrē nö in Meh.

¹³Pò Meh vamī në rahēḵ chu: hamūli chin tö Meh el chūök kanūönö öp yöng re.

¹⁴Hòṅ ha-öinyö Meh chin; pò ngam vinī-iṅ chu nö pinhe-eṅkūö, pinngangkūö inrē: akahalōn Man tö ellōn chu.

¹⁵Öt nyatngö nun në tūmö alaha chu tö Meh: hē chu ulāikaṙen vinī-iṅ, akahalōn Me-eṅ töchu umuh.

¹⁶Meuk nup tö öl nö lēnta alaha chu nö ngaich minë mat meh, ngaich i mat līpöre Meh nö kūichi nö ṙòkhöre: nup tö vī-i i tum sakāmö, hē u nö öl nö rēhĕn.

¹⁷Ō Tēv, iṙôkö lanöökö lōn Öm in chu: i ṙôken nup tūmö u!

¹⁸Yē chu kaheūkö u, ngaich samötlöng ṙôken anū-ö tö kuyāyö: yē chu aṅhen, ngaich ṙòngmöng in Meh chū-ö.

¹⁹Ō Tēv, fëlngö yip tötlöök Man min: kē-ĕngre yin tö chu lökten yī-ö tarik tö yal tö mahām.

²⁰Pò cha nö öt löökö ṙô tö Meh: ngaich kē mine-eny Meh yip lā-al Meh nöng töl.

²¹Ō Mā Tēv, röh öich kunyahaṅ-elmat tö cha yip tö sumrīk tö Meh: röh öich haṙīvlōn in cha yip chamôhòlre nö lā-al Meh?

²²Surīkhen cha chin öich kô-en: kaheukten cha chin nö lā-al chu.

²³Kiluhu chu Man, Ō Mā Tēv, akah ellōn chu inrē! Kalaha chu, akah ellōn chu inrē!

²⁴Ngëicha yĕn talööku öp öt lanöökö nö in chu: ngaich hachō-o chu el talöökö tö örheūheu-aṅ.