Read Car_Nicobarese Salmai 140 Bible Online

Salmai 140 - Car_Nicobarese bible

Salmai 140

¹Ō Mā Tēv, ṙānyen chu ṙā-ang i tötlöök tarik: laklen chu tö tarik tö chökhuṙen.

²Yip töng lōn tö öt lanöökö ellōn re: öt heūmö yin nö hamūlöre nö kiyung.

³Hakeut litāk re yin sā pēch: tö kapahukūö nup pēch i minuh cha.

⁴Ō Mā Tēv, lākö chu tö kël yip tötlöök: laklen chu tö tarik tö chökhuṙen: yip tamölngenre nö kuringngen chu.

⁵Hayūnö chu yin vē mahakeūṙöre tö tinngöp, nūöt inrē: hanyāknyö inhāṅl yin nö i taseū talöökö; vī insuk chu yin.

⁶Ngö ṙô chin tö ngam Mā Tēv: Me-eṅ Mā Tēv chu. Ō Mā Tēv, kētö elnang re Man i në ṙô chu ve-elkui.

⁷Ō Tēv, Mā, kumlēḵ ngam inyööken chu: ramuptö kui chu hē el kinyūngö.

⁸Ō Mā Tēv, un kētu lōn ngam tötlöök: un ṙūölöng öp halēnlö cha tötlöök; hòṅ cha nö öt hakeūṙö re.

⁹Yip mahavīlen chu: hökngen nup öt lanöökö elvāng cha, nö kahultö kui cha.

¹⁰Hökngen nup töhūkūö ta-ök nö fuk kui cha: hökngen cha nö kavalhötvö nö i kūö tameūyö, el öp tö aṙū anūlö, hòn öt chōholre nö hēk.

¹¹Ötköp ön ngòh tö chōchö ṙô nö ing panam: chöhö ön ngòh töchökhuṙen tö tarik tö ötlanöökö, nö hòṅ afukngen ò.

¹²Akahalōn chin tö ngam Mā Tēv; nö lā ip tö hakihtuṙen, lā i yāich inrē.

¹³Ha-öinyö an min ngam mine-eny Meh tö yip tölöök: iyöng i kūö Meh yip min tö chiplö.