Read Car_Nicobarese Salmai 144 Bible Online

Salmai 144 - Car_Nicobarese bible

Salmai 144

¹Tökôlò An yēḵ ngam Mā Tēv, ihong chu: ngam mahachōtö tī chu kiyung, në kuntī chu inrē nö kilöön.

²Hanāngen neūkölōn chu, chūök chu kiyung, tö marô-òlkui chūök chamônghöl, ṙamānyen chu inrē: lanaklö chu, chūök chu inrē hayönglenre; tö mihôiṅ tö yip el katòh chu tarik.

³Mā Tēv, asuh ang ngòh tarik, töp lökten Meh miṙūöt tö ò: hēk ngòh kūön tarik, töp lökten Meh mikūöṙen tö ò?

⁴Höng sā tö rö-ö ön ngòh tarik chaṙēvi nuk sakāmö ò nöng sā nyat.

⁵Supōn tö ngam halīöngö, Ō Mā Tēv, Öm yônti! lūölkö minë rôngö, hòṅ u nö lūlu.

⁶Kavaltö ngam hanyālö, pirātngen cha: lirenyngö nup chòk Meh, Öm mihôiṅ tö cha.

⁷Löktö lātulöng hateutnyö kël re: kē-ĕ chu, ṙānyen chu ṙā-ang el öp yöng mak, ṙā-ang eltī yip aṅ tahëng;

⁸Yip tö ṙô tö töng rö-ö: ngaich nup lā hāmö kël cha nö kël minyôiny.

⁹Ō Tēv, in Meh chin min tiköknyö tufömngöre tinkökö: tikök salmai chin min öich ha-öinyö Meh, ip tö sömö inröt ranöng.

¹⁰Anga-aṅ An kamëtö inyööken nö i yip rācha: kamënyen Tāvit ök tarik Ò, nö i kūö chökhukūö sanët.

¹¹Kē-ĕ chu, ṙānyen chu, ṙā-ang eltī yip aṅ tahëng, yip kamhòṅkkö töng rö-ö: nup lā hāmö kël cha inrē nöng kël minyôiny.

¹²Hē yip kikōnyö kūön hī min nö sā sanīöpö chōn ip inyālö cha: yip kūön hī kikānö inrē nö sā ihong sinkeukngö tö hūlö, sā inlahen patī rācha.

¹³Hē nup chūök sāiny hī nö tööḵlö tö tökeuheūttöre aṅ panô-òṅ, ngaich nup sīṅp hī nö köṅnyu kūön, söm köṅny inrē nö el taṙeū hī;

¹⁴Hē nup nuā hī nö langan tö kum re: öt kiyūngö, ötkē-ĕyö, öt vahënyuvö nö el talöökö hī.

¹⁵Ṙāmölōn yip tarik i tö ngatī: hôṅ, ṙāmōlōn yip tarik, yip tö Tēvu tö ngam Mā Tēv.