Read Car_Nicobarese Salmai 145 Bible Online

Salmai 145 - Car_Nicobarese bible

Salmai 145

¹Tēv chu, hapōilen Meh chin, Ō Rācha: hakôlò ngam mine-eny Meh chin örheūheu.

²Kaheuk sakāmö chin min hakôlò Meh: Ha-öiny ngam mine-eny meh min inrē örheūheu.

³Tökiröng An ngam Tēv, tö hòṅ tumlönglöng nöinyö: öt chanöhen ap ṙôkö Ò.

⁴Hĕng köl chap söl ip tahëng min nö eū minë la-en Meh: vënyö nup tökiröng la-en Meh min inrē.

⁵Ngam tökôlò ineū-euṅ ngam minā-aṅ Meh: nup pinngangkūö la-en Men min inrē, piṙūtkö chu.

⁶Vē tarik min inrē nö kakkö kumlēḵ nup tö pahe-ev la-en Meh: vënyö ṙôkö Meh chū-ö min inrē.

⁷Ṙôtö kanöpölōn re yin min tö ṙôkö lanöökö Meh: ngaich tikökngö ngam lanöökö Meh min.

⁸Tö aheuk An ngam Mā Tēv, tööḵlö An inrē tö miṙēlōn: öt veūtö lanīnö, tö kiröngö miṙēlōn inrē.

⁹Löökö tī An ngam Mā Tēv tö taṙòkhöre: i kui nup la-en Ò nö ṙòkhöre nup miṙēlōn Ò.

¹⁰Ṙòkhöre nup la-en min nö ha-öinyö Meh, Ō Mā Tēv: hakôlò Meh min inrē yip töhet Meh.

¹¹Ṙô tö kanôlò ngam pūlngö yip min: kahòkkö minhôiṅyö Meh inrē;

¹²Nö mikahtölōn kūön tarik: tö nup minhôiṅyö la-en Ò.

¹³Tö örheūheu an ngam pūlngö Meh: köp ngam pūlngö min keuheūt michaplö tarik.

¹⁴Ṙapkö yip töfukngö An ngam Mā Tēv: ngaich hachohlö yip tö sangôngköti.

¹⁵In Meh mat yin vē taṙòkhöre: ngaich kētö nya-aṅkūö cha Me-eṅ ip tölöök ṙētak.

¹⁶Löpnyökūö eltī re Me-eṅ: ngaich hatöö-önglōn në tö aṅ.

¹⁷Tö chip An ngam Mā Tēv i nup talöökö Ò: tö aheūkölōn nö i nup la-en re.

¹⁸Röhta An ngam Mā nö in cha yip mahavëken Ò: in cha nö ṙòkhöre yip tökô-en nö havëken Ò.

¹⁹Hatööḵngölōn cha An yip tö pa-ekūö tö Ò: hang ṙô cha An min inrē, hayöölen cha inrē.

²⁰Aṅten cha An ngam Mā Tēv, yip tö hāngenlōn tö Ò: ṙòkhöre pöri yip tötlöök nö piyāyi.

²¹Ṙôtö nöinyö ngam Mā Tēv ön min ngih elvāng chu: hökngen taṙòkhöre tarik yēḵ nö örheūheu nö Ha-öiny ngam töhet minënyö Meh.