Read Car_Nicobarese Salmai 16 Bible Online

Salmai 16 - Car_Nicobarese bible

Salmai 16

¹Ō Tev, aṅten chu: tön in meh chin hayönglenre.

²Më-eṅ man Mā chu, ngö ṙô chin tö ngam Mā Tēv: Öt lanööku chin töp tövāngngö tö meh.

³Yip töhet pöri ing panam cha-a yip tölngö chūök nup kumchiklōn chu.

⁴Ṙuölöre ṙôken kanihngen yip min yip mahaṙīngö ngam Mā Tēv tö tahëng Tēv: öt kētö öp tö-ôkö chin min mahām in u, öt rēhĕn kē minë-eny u i minuhre.

⁵Ngam Mā Tēv an minchööḵ-ö chu ip amin chu, chūök òk chu inrē: haköpkö ngam chū-ö me-eṅ.

⁶Fuk i tölöök chūökö an ngam kūöngö chu: hòṅ, löök an ngam amin chu.

⁷Hakôlò ngam Mā Tēv chin min, ngam mahalēnö chu: hôṅ, haköpten chu an i ellōn tö el hatööm.

⁸I kūöre tī chin örheūheu tö ngam Mā Tēv: pòn lāhāmö chu anga-aṅ, öt hanlöinyken chin min.

⁹Lökten chin ṙāmölōn, haṙam-lōnre ngam ineū-euṅ chu inrē: ngih alaha chu inrē min iyöng el chūök ötpinlā-ngen.

¹⁰Pò meh min ötṙāngö ngam nômö chu nö el anūlö: öt-rēhĕn min me-eṅ halöngten ngam töhetre nö meuk chinhūngö.

¹¹Hameukhömat chu man min tö talöökö nômö; i kūö meh ap sanööḵngö ṙanāmölōn: lāhāmö meh ap kumchiklōn nö örheūheu.