Read Car_Nicobarese Salmai 18 Bible Online

Salmai 18 - Car_Nicobarese bible

Salmai 18

¹Ō Mā Tēv, kumlēḵ chu: hāngen chin tö meh.

²Ihong chu an ngam Mā Tēv, chūök chu kiyung, ṙamānyen chu inrē: Tēv chu, töngëh ihong chu: in ò chin min hayönglenre; lanaklö chu, sinrōl ngam inyööken chu inrē, tömarô-òl kui chūök chamônga.

³Havëkö ngam Mā Tēv chin min, ngam töhòṅ ha-öinyö: hòṅ chu min hayöökaṙen in yip lā-al re.

⁴Havīlen chu minë tökuvaha kinpaha: pahe-ekūö tī tö chu ngam ṙanöingö tī ngam ötlanöökö.

⁵Havīlen chu minë tökuvaha chūök kupah: yih minë tin- ngöp kinpaha nö i kui chu.

⁶Havëkö ngam Mā Tēv chū- ö i kanihngenre, hūkö ngam Tēv re inrē: el öp Töhet chūök re anga-aṅ nö hang ṙô chu, ngaich söl elnang ò ngam ṙô chu i kūö ò.

⁷Kayīna ngaich ngam panam, laröya inrē halöinyköre nup rööntö minë rôngö inrē, ngaich kayīna, pò ò nö līn.

⁸Löknyö elmeh ò ngaich ök lul nö meutnyi: ṙāpngökūö ngaich ap tameūyö nö löktö elvāng ò, öktikūö ngaich nuk ta-ök tö kūö e.

⁹Yupūttö ngam halīöngö anga- aṅ inrē, ngaich yôntī: kufëi ngaich ngam sinngūlö nö elröön ò.

¹⁰I uk öp kērup anga-aṅ, ngaich kiteū: hòṅ, yit anga- aṅ nö kiteū i rōi kël ngam kuföt.

¹¹Vī sinngūlö anga-aṅ nö in- nyatngö ò, nyatkui ò nö havīlen ò: sinngūlö minë mak, kufëi minë taṙul minë halīöngö.

¹²Kēngöre nuk tökufëi taṙul ò, kūö yanëchö nö i kūö ò: tökënngöre kumṙah, ta-ök tameūyö inrē.

¹³El halīöngö inrē ngam Mā Tēv nö kunṙôkö, kaknyöre ngam lamātulöng nö ṙô-òv: tökënngöre kumṙah tö-ök tameūyö inrē.

¹⁴Tīnngö nup hanyālöre anga- aṅ, pirātngö u inrē: hòṅ, hanyālö nö pōyen, ngaich ötkô-ò tī tö cha.

¹⁵Meūkö ngaich nuk talöökö nuk mak, lungāhaka ngaich minë rööntö ngam panam, i vinëköre tö meh, Ō Mā Tēv: i vaneutnyö ngam ku- föt elmeh meh.

¹⁶Tīnhöti anga-aṅ nö löktö lātulöng, kē-ĕ chu anga-aṅ nö ṙā-ang el nup töpōyen mak;

¹⁷Ṙānyen chu anga-aṅ ip töka- lēḵ lā-al chu, ṙā-ang in cha inrē yip tösumrīk tö chu: pò cha nö kalēḵ tö chu.

¹⁸Yih cha-a nö in chu hē chu ṙònghöichṙen kihngen: ngam Mā Tēv pöri chūök chu.

¹⁹Kēten chu anga-aṅ inrē el töpōiti chūökö: ṙānyen chu anga-aṅ, pò ò nö kuchīkölōn nö in chu.

²⁰Reushen chu an ngam Tēv, asā ap lanöökö chu: asā lanöökö eltī chu nö havan- höti nö in chu.

²¹Pò chu köp tö në talöökö ngam Mā Tēv: öt ṙāngö ngam Tēv re chū-ö i öt lanöökö.

²²Pò nup inkaha fālen aṅ in ò nö i kūö chu: ngaich rö-ö chū-ö inrē pehngö nup chöngö ò nö ṙā-ang in chu.

²³Teung chin inrē in ò: haköh- ngenre chin tö nup tökööl re.

²⁴Lökten an ngam Mā Tēv nö havanhöti nö in chu asā ngam lanöökö chu: asā ngam hanëtö eltī chu nö i kūö ò.

²⁵Hameuk tö miṙēlōnre më-eṅ in yip tö aṙē-ĕlōn: hameuk- töre min më-eṅ teung i tö- teung tarik.

²⁶Hameuktöre më-eṅ min het i yip töhet: hameuktöre më- eṅ min hapungtöre in yip kamānngöre.

²⁷Pò meh min hayööken tökihngen tarik: tumṙeūtu pöri tö meh yip mahakeū- ṙöre.

²⁸Pò meh min tōttökūö ngam ëāṅvö chu: ngam Mā Tēv, Tēv chu, anga-aṅ min ma- ahatlö ngam sinngūlö chu.

²⁹Pò chu tī meh lūḵ kumyung: lökten im Tēv re inrē kumööingö kui kinlōngö.

³⁰Töteung pöri ngam talöökö ngam Tēv: tökalaha an ngam ṙô ngam Tēv; lanaklö cha an nö ṙòkhöre yip maha- yönglenre nö in ò.

³¹Achīö ṙöng ap Tēv, Höng ngam Mā Tēv: achīö ap ihong, nö hol ngam Tēv hī?

³²Nyëk ṙat chu an ngam Tēv tö kumlēḵ: ngaich vīten ngam talöökö nö teungten.

³³Vīten në röön chu nö röön kan tīör: ngaich asöklen chu el chūök chu lātulöng.

³⁴Muhumveūten në kël chu an nö kiyung: lökten në kël chu nö sōntö mās linreny.

³⁵Ngaich man kē-ĕkūö chu tö lanaklö aṅ ip inyööken in meh: ṙapken chu inrē ngam lāhāmö kël meh, kiröng chū- ö inrē tö tī ngam ṙanëmen meh.

³⁶Ṙūönyu ṙôkti elröön chū-ö tö meh: ngaich öt taleūchi röön chū-ö.

³⁷Lūḵ yip lā-alre chin min, ngaich kôlö in cha: öt rēhĕn chin havöökūöre hanöng saha cha nö keuheūtngöre.

³⁸Tafūni tī chin min tö cha, tö lökten cha min nö öt choholre: fuk elröön chu yip min.

³⁹Pò meh hamöplö ṙat chu tö kumlēḵ i kinyūngö: tum- ṙeūtu yip tö meh nö lātaṙeū tö chu yip chamôhòlre nö lā-al chu.

⁴⁰Vīten yip lā-al chu man inrē nö hapung tö uk re tö chu: pò chu hōtu rökngen cha yip tösumrīk tö chu.

⁴¹Ayôṙa cha-a, öt hĕngtak mahayööken pöri: im Mā Tēv nö uroh, hö-ö pöri anga- aṅ nö sapṙô cha.

⁴²Pinyāchö cha chū-ö nö sā pitung tö fööṙi tö kuföt, kavalngen cha chū-ö sā tilin el talöökö.

⁴³Ṙānyen chu man ngaich ṙā- ang i kinlöönö tö vē tarik: vīlen chu më-eṅ ngaich yöng- kūö pumnāmö tarik: lök la-en chu yip min tarik töt mikahkūö chu.

⁴⁴Höng hang töre yip min tö chu ngaich hang chöngö chu: hökngenre yip min aṅ tahëng nö in chu.

⁴⁵Changāchi yip min aṅ tahëng: ngaich meutlö min nöng kichëyöre nö ṙā-ang el nup tö-öpnyukūö chūök cha.

⁴⁶Tö-aṅ an ngam Mā Tēv; tökôlò an yēḵ ngam ihong chu: hapōilöng an yēḵ ngam Tēv inyööken chu.

⁴⁷Anga-aṅ ngam Tēv mahava- halvah chu: ngam tumṙeū tö tarik nö lātaṙeū tö hī.

⁴⁸Kēnyen chu anga-aṅ nö ṙā- ang im lā-al chu; hôṅ, hachohlen chu më-eṅ lātu- löng tö yip chamôhòlre nö lā-al chu: ṙānyen chu man ngaich ṙā-ang i tö-angë tarik.

⁴⁹Lökten chin min kētö nöinyö meh in yip pumnāmö tarik: tikökṙôre inrē tö nöinyö ngam minë-eny meh.

⁵⁰Kētö yöng ṙinānyö ngam Rā- cha re an: hameuk tö hanā- ngen neūkölōnre nö im hacham elkuire, in Tāvit, ip kūön ò inrē nöng öreheūheu.