Read Car_Nicobarese Salmai 19 Bible Online

Salmai 19 - Car_Nicobarese bible

Salmai 19

¹Vënyö kanôlò ngam Tēv an ngam halīöngö: hameuk tö la-en minë kuntī ò minë taṙul.

²Ṙô-òv minë sakāmö i tum sumkam: hatööm i tum mitööm, hameuktö inkaha inrē.

³Öt ṙô-òv nun, öt rēhĕn nö ëluṙô: ötkô nup ṙô u nö hāngö.

⁴Ngaich nuk nö töökngö röön nö i në panam nö ṙòkhöre; söl i manā-angkūö ngih panam nuk ṙô u: In u anga-aṅ nö vīlö inrūkui ngam tavūöi;

⁵Ngam tösā kikōnyö töhapīhö nö ṙā-ang el urôhòre nö kunyī-inyre: ngaich sā töka-lēḵ tarik nö ṙāmölōn nö fal ip kū-öre.

⁶Ip manā-angkūö ngam haliö-ngö ap talöökö ò, ngaich söl i nup manā-angkūö anga-aṅ nö havīṙö e: öt hĕng tönyatngö tö ngam ṙanāchö ò.

⁷Töteung an ngam chöngö ngam Mā Tēv, mahavantö nômö: tököp an ngam chö-ngö ngam Mā Tēv, tö akaha tī tö töt akaha.

⁸Tö chip nun minë chöngö ngam Mā Tēv, töṙāmö ellōn tī: töhet an ngam chöngö ngam Mā tēv, ma-ahetlö elmat.

⁹Töhet an ngam pinhë-ekūö tö ngam Mā Tēv, tö-örheū-heu nö köp: tökô-en an ngam inkaha fālen aṅ im Mā Tēv, keuheūtlöre nö töchip.

¹⁰Töyahlö nun nö lōn tö humlum, hôṅ, mötlö tö nup tö pahīöya humlum: mötlö pinchākö inrē tö hönī tö nup tökatāka hönī el nup chūök u.

¹¹Hēk inrē nö lökten in u ngam tarik meh nö fēḵlöngö: Pōiyen raneushö i inköpö u.

¹²Chīö ap tökô nö akah vanāchö ò: halööklen chu tö nup töhayunka fālen.

¹³Haköpngö ngam tarikre man inrē, un i nup tö-iṙīöniṙen tökööl; un höktuṙen nö hayöngö chu: hòṅ chu teungten, ngaich chū-ö min löök ṙā-ang i nup tanôich-ngen fālen.

¹⁴Hökngen nup ṙô ngih elvāng chu, nup piṙūtkö ngih ellōn chu inrē nö töhō-ov nö i kūö meh: Ō Mā Tēv chu, ihong chu, ṙamānyen chu inrē.