Read Car_Nicobarese Salmai 21 Bible Online

Salmai 21 - Car_Nicobarese bible

Salmai 21

¹Ō Mā Tēv, ṙāmölōn an ngam rācha nö i kumlēḵ meh: yöng ṙanāmölōn ò min nö im inyööken aṅ in meh.

²Ngaich man kē-ĕkūö ò tö nup lōn ò: öt ma-inngö nup havëkö minë minuh ò. 1

³Pò meh urēhĕkūö ò öm kumtö inkôlò lanöökö: sumpīövlen ò man ngaich tö tövai hum-lum sapīöv nö i kui ò.

⁴In meh anga-aṅ nö havëkö nômö, ngaich kētö e më-eṅ in ò: rôta minë sakāmö inrē nöng örheūheu.

⁵Kiröng ap minā-aṅ ò im inyöö-ken tī meh: ineū-euṅ, minā-aṅ inrē, ṙātu tö meh nö nö i kui ò.

⁶Pò meh vī an nö tölngö tökôlò nö örheūheu: vīten ò man nö ṙāmölōn tö ṙanāmölōnre nö i kūö meh.

⁷Pò ngam rācha nö hayöng-lenre nö im Mā Tēv: ngaich lökten ngam hanāngen neūkölōn ngam Lamātulöng, anga-aṅ min nö öt halöinyka.

⁸Kôtökūö an min ngam kël meh tö yip tökunyahaṅ el-mat tö meh: kôtökūö an min ngam lāhāmö kël meh tö yip tösumrīk tö meh.

⁹Vīten cha man min nö sā töhūkūö tameūyö ip hē meh öm līn: ngeūktu yip min nö im lanīnö meh, ngaich ngam tameūyö min nö ṙāp-ngökūö tö cha.

¹⁰Yip ṙòng cha min nö halëli tö meh nö i kūö ngih panam: yip kulöl cha min inrē, nö ṙā-ang i yip kūön tarik.

¹¹Pò cha nö lōn tö tötlöök nö in meh: halēnlö chanöh ellōn re yin, nup töt han-teungngen tö cha.

¹²Pò meh min vīten cha nö hapung tö ukre: halēn ngam inröt linrenyre min më-eṅ öm lā-al cha i kūö cha.

¹³Ō Mā Tēv, hapōilöng man yēḵ im kumlēḵ meh! Ngaich tikökṙôre min īhö, ha-öiny ngam minhôiṅyö meh inrē.