Read Car_Nicobarese Salmai 22 Bible Online

Salmai 22 - Car_Nicobarese bible

Salmai 22

¹Tēv chu, Tēv chu, kūöyòh öm ṙāngen chu? Kūöyòh öm marôvat töm hinòlṙen chu, i minë ṙô chu ayôṙa inrē?

²Ō Tēv chu, havë-a chin tö el sakāmö, hö-ö pöri më-eṅ sapṙô: öt chēv chin inrē tö el hatööm.

³Töhet pöri më-eṅ: Ō më-eṅ, mī-iyöng el chūök töha-öinyö tö Israĕl.

⁴Hayönglenre yik yöng ih nö in meh: hayönglenre cha-a, ṙānyen cha më-eṅ.

⁵Havëken meh cha-a, ngaich ṙānyuvö: hayönglenre nö in meh, ngaich öt sirōngkūö.

⁶Höng kamlökö pöri chū-ö, öt tarik: minṙēngö tarik, töt hakūökaṙen tö tarik.

⁷Ṙòkhöre yip mahatīönken chu nö hayīölngen chu: kunyòk-nyö minuhre, kileung kuire nö ngö ṙô;

⁸Hayönglenre an nö im Mā Tēv; hökngen ò nö ṙānyen ò: hökngen ò nö ṙānyen ò, tön tö kuchīkölōn an nö in ò.

⁹Më-eṅ pöri kamënyen chu ṙā-ang el chūök kanūönö: ngaich vīten chu më-eṅ ha-yönglenre hē chu ṙòngmö pōḵ ap yöngre.

¹⁰Löktökūö el chūök kanūönö chin kavaltu in meh: lök tö ellōn yöng chu man öm Tēv chu.

¹¹Um man yēḵ marôvat tö chu; tön röhta ap kanihngen: öt hĕng tak mahayööken.

¹²Havīlen chu nun në kōiny nuā; tökalēḵ kōiny nuā aṅ Pāsan nö havīlen chu.

¹³Vā-alkūöre nun nö in chu: sā töyal, ap mamū-a ṙô lāyön.

¹⁴Ṙösnyu chin sā mak, ṙòkhöre në tangëḵ chu nö öt taptöre kūö: sā paröm an ngam ellōn chu; ayëri an nö ellōn chu.

¹⁵Nyôngö an ngam kumlēḵ chu sā raktit tanīöyö; panta inrē ngam litāk chu nö i samā chu: ngaich më-eṅ kēten chu el pitung kinpaha.

¹⁶Havīlöng chin tö në am kalōngi kūö chin tö vē töla-evṙen tö tötlöök: tufunngö eltī chu yin, uk röön chu inrē.

¹⁷Ṙòknyöre ṙô chin tö në tangëḵ chu: Ngëicha yin, hat-ēltö matre inrē tö chu.

¹⁸Michööḵöre yin tö në inyut chu: ngaich kalah taneū-ngenre cha-a tö ngam tö-aṙū-uti inyut chu.

¹⁹Uh pöri yēḵ më-eṅ marôvat tö chu, Ō Mā Tēv: Më-eṅ holṙen chu, hēṙen man yēḵ holṙen chu.

²⁰Ṙānyö ngih nômö chu im kūö sanët: ngam töng hĕng in chu ṙā-ang i minhôiṅyö ngam am.

²¹Hayööken chu ṙā-ang elvāng ngam lāyön: hôṅ, ṙā-ang i sinrōl nup hanchōn kōiny nuā; më-eṅ samap ṙô chu!

²²Ve-eny ngam minë-eny meh chin min in yip holre: ha-öinyö meh chin min el ṙôngö yip tömaṙôngö.

²³Ha-öinyan yin yī-ö töpa-ekūö tö ngam Mā Tēv: hapōilen ò ṙòkhöre yī-ö kūön Yāköp; ṙòkhöre yī-ö kūön Israĕl söklöre in ò öi pa-ekūö.

²⁴Pò ò nö öt höhölōn, ane inrē öt pa-ekūö tö kanihngen töhakihtuṙen: öt rēhĕn anga-aṅ nö hanyatngö kūöre tö ò; yē ò pöri nö havëken ò, hang anga-aṅ.

²⁵Ṙamā-ang in meh ap nöinyö tö chu in vē tömaṙôngö: i kūö cha chin min yip töpa-ekūö tö ò öich kētö nup töchūöku kinlēḵngô chu.

²⁶Nyā yip min nö tööḵngen yip töyāchö ellōn: Ha-öiny ngam Mā Tēv cha-a min, yip chamöhan; aṅ an yēḵ ngam fanöinylö meh nö örheūheu!

²⁷Ṙòkhöre i manā-angkūö ngih panam min nö köpölōn, ngaich havöötöre nö im Mā Tēv: ngaich ṙòkhöre min aṅ në pumnāmö tarik nö salāmö meh.

²⁸Pò ngam pūlngö nö pūlngö ngam Mā Tēv: anga-aṅ an inrē mahayöng nö i kui pumnāmö tarik.

²⁹Ṙòkhöre yip tökiröng alaha ing panam min nö nyā-av-kūö, salām inrē: ṙòkhöre cha-a inrē yip chamuh el tumlat nö sōntöre nö i kūö ò, anga-aṅ inrē öp tötkô nö haköp nômöre nö aṅ.

³⁰Hĕng tak öp min kūön lamök la-en ò: ngaich eūka min angū-ö tö ngam Mā ip tahëng tumkölchap.

³¹Yih min cha-a ngaich vënyö lanöökö ò: nö in yip tarik tökayôḵnyu min, tö ò nö anga-aṅ tö tī tö e.