Read Car_Nicobarese Salmai 27 Bible Online

Salmai 27 - Car_Nicobarese bible

Salmai 27

¹Ëāṅvö chu an ngam Mā Tēv, inyôken chu inrē; chiāp min pinhë-eṅkūö chu? Ngam Mā Tēv an kumlēḵ ngih nômö chu; chiāp min pahë-e chu?

²Yē yip töt löökö la-en nö yih nö in chu nö kā ngih alaha chu; yip lā-al chu, yip tökunyahaṅ elmat tö chu inrē: kavē-ĕre cha-a fukngö inrē.

³Pòrô tömaṙôngö nö havīlen chu nö lā-al chu, öt pa-ekūö ellōn chū-ö min: pòrô öp kinyūngö nö yih nö lā-al chu, sön chū-ö min höng nyatlö.

⁴Hĕng öp havëkö chu im Mā Tēv, chahöh chu min: hòṅ chu iyöng el patī ngam Mā Tēv min i rô-òten chu aṅ, öich ngëichkö vanāyö ngam Mā Tēv, hatīönkö ngam patī ò inrē.

⁵Pòn ip sakāmö kanihngen anga-aṅ min nö hayunngen chu el öp rūkui ò: el öp inrūkui ò tönyatngö min a-nga-aṅ nö hayunngen chu; hachohlen chu min anga-aṅ nö i kui öp ihong.

⁶Chônghak min ngam kui chu nö kööilö tö kui yip lā-al chu, mahavīlen chu: ngaich chū-ö min kētö ṙanāmölōn tökētu el ngam inrūkui ò; tikökṙôre chin min, hôṅ, tiköknyö nöinyö ngam Mā Tēv chin min.

⁷Ō Mā Tēv, hang ṙô chu yē chu havëken meh: aheūkö-lōn tö chu, sapṙô chu.

⁸Yē meh ngö ṙô, Chöh ngih kūö chu yin: ngaich ngö ṙô ngih ellōn chu tö meh, Chöh kūö ngam Mā Tēv chin min.

⁹Uh man yēḵ hayunngö kūöre tö chu. Un ṙā-ayö ngòh tarik meh nö im lanīnö: töha-ehelkui man holṙen chu. Uh chin yēḵ kavāli ma-rôvat, Ō Tēv inyööken chu, uh rēhĕn öich ṙa-ayö!

¹⁰Hē chu ṙā-ai tö nak yöngre: kē-ĕ chu pöri min ngam Mā Tēv.

¹¹Ō Mā Tēv, haköpten chu tö ngam talöökö meh: ha-chōkūö chu el ngam tölēn talöökö, tön hayūnö chin tö yip lā-alre.

¹²Uh chin kētu i lōn vē lā-alre: tön chōholre yip samūöcha nö lā-al chu yip mu-uhômnyö ötlinëken.

¹³Chaṙīvi chin yē chu öt ṙātö ellōnre: töre öich meuk ngam lanöökö ngam Mā Tēv.

¹⁴Höka im Mā Tēv: hangë-eṅre, hökngen ngam ellōn meh nö un pa-ekūö; hòṅ, höka man im Mā Tēv.