Read Car_Nicobarese Salmai 28 Bible Online

Salmai 28 - Car_Nicobarese bible

Salmai 28

¹Mā Tēv, havëken meh chin min; ihong chu, uh man yēḵ öthang ṙô chu: yē meh chēvngen öm in chu, ngaich chū-ö min höng sā cha yip chamuh el anūlö.

²Hang nup ṙô chu yēḵ vinë-elkui, yē chu havëken meh: yē chu hachônglö këlre kū-ö tö lā tuhēt el ngam töhet chūök meh.

³Uh chin yēḵ tūöki hol ngam tötlöök, hol yip töla-evṙen inrē tö tötlöök: yip tölāmö ṙô nö i holre, ellōn cha pöri öp öt lanöökö.

⁴Kē-ĕkūö cha, asā nup la-en cha, asā ötlanöökö nup vahī-ṙen cha inrē: kē-ĕkūö cha tö tösā ötlanöökö nup vahī-ṙen cha: kē-ĕkūö cha tö nup raneushö la-en cha.

⁵Pò cha nö ötkūöngenre tö la-en ngam Mā Tēv, öt rēhĕn tö nup vahīṙen kuntī ò: likölö cha an min, ngaich öt hēk nö asöklen cha.

⁶Tökôlò an ngam Mā Tēv! Pòn hang nup ṙô anga-aṅ vinë-elkui.

⁷Kumlēḵ chu an ngam Mā Tēv, lanaklö chu inrē; in chu ap ellōn chu nö nyatlö, hōluṙen chin inrē: lökten ngih ellōn chu nö pōilö ṙanāmölōn; ngaich ha-öi-nyan chū-ö min töp tinkö köre.

⁸Kumlēḵ chu an ngam Mā Tēv: ane an inrē töngëḵ chūök inyööken ngam hacham kui ò.

⁹Hayööken vē tarik meh, hakôlò vē amin meh inrē: ha-aṅlen cha inrē, tayūkö cha inrē örheūheu.